Jeremiah 34 FHB Father's Heart Bible™

34 ¹Jitia Babylon laga raja Nebuchadnezzar, tar sob sipahi khan, aru tar raj kora sob rajyo khan aru sob manuh khan Jerusalem aru tar sob sheher khan birodh te lorai korise, titia amar Pitri pora Jeremiah ke aha kotha tu eneka ase:

²Israel laga amar Pitri koi ase: Ja, Judah laga raja Zedekiah ke kotha kobi, tar ke kobi: amar Pitri koi ase: Moi eitu sheher ke Babylon laga raja laga hath te di ase; tai eitu ke jui pora julai dibo. ³Tumi tar hath pora polabo naparibo, kintu hosa pora dhori lobo aru tar ke di dibo. Tumar suku pora Babylon laga raja laga suku dikhibo, aru tar mukh tumar mukh logot kotha kobo, aru tumi Babylon te jabo.

⁴Kintu, O Judah laga raja Zedekiah, tumar Pitri laga kotha huni bi: amar Pitri koi ase tumi talwar pora namoribo.

⁵Tumi shanti te moribo. Tumar age te thaka raja khan, tumar baba khan nimite jineka sugandh julai disele, tineka tarkhan pora tumar nimite bhi julai dibo aru tumar nimite kandi kene kobo, ‘Hai, probhu!’ Moi eitu koise, tumar Pitri koi ase.

⁶Titia bhabobadi Jeremiah pora Jerusalem te Judah laga raja Zedekiah ke eitu sob kotha koise, ⁷jitia Babylon laga raja laga sipahi khan Jerusalem aru Judah te bachi thaka sob sheher khan ke—Lachish aru Azekah, Judah te bachi thaka ses gorhbondi sheher khan ke—lorai korise.

Pitri pora ekta bhanga vachan laga bichar kore

⁸Raja Zedekiah pora Jerusalem te thaka sob manuh khan logot vachan kori kene tarkhan ke mukti laga khobor diya pichete, amar Pitri pora Jeremiah ke aha kotha tu eneka ase: ⁹sob manuh pora nijor Hebrew mota aru maiki nokor khan ke mukti dibole, titia kun bhi tar sathi Judah manuh, tar bhai ke, nokor nabonabole. ¹⁰Vachan te joma hua sob adhikari khan aru manuh khan pora mani loise, sob manuh pora nijor mota aru maiki nokor khan ke mukti di kene, tarkhan ke aru bandhan te narakhise; tarkhan pora mani loi kene mukti dise. ¹¹Pichete tarkhan ghuri kene mukti di diya mota aru maiki nokor khan ke aru wapas loi loise, aru tarkhan ke joborjoisti kene aru nokor bonaise.

¹²Titia amar Pitri laga kotha Jeremiah ke ahi kene koise:

¹³Israel laga amar Pitri eneka koi ase: “Moi nijor pora tumar baba khan ke Egypt laga desh pora, nokor laga ghor pora, ulai ana dinte tarkhan logot ekta vachan korisile, koi kene: ¹⁴Sat saal pura huwa pichete, sob manuh pora tumi ke bikri kora aru choi saal sewa kora nijor Hebrew bhai ke mukti dibo lage; tar ke mukti dibi. Kintu tumar baba khan pora Moi laga kotha huna nai, aru Moi ke dhyan diya nai. ¹⁵Thik etiya tumikhan ghuri kene Moi laga suku te thik kaam korise, sob manuh pora nijor usorte thaka manuh ke mukti laga khobor di kene, Moi laga nam thaka ghor te Moi laga age te ekta vachan korise. ¹⁶Kintu tumikhan ghuri kene Moi laga nam ke apobitro korise: tumikhan sob pora, mukti pora jabole chari diya mota aru maiki nokor khan ke aru wapas loi loise, aru tarkhan ke joborjoisti kene aru nokor bonaise.”

¹⁷Etu karne amar Pitri koi ase: “Tumikhan sob manuh pora nijor bhai aru usorte thaka manuh ke mukti laga khobor di kene Moi laga kotha mana nai. Etu karne Moi tumikhan nimite mukti laga khobor di ase—tumar Pitri koi ase—talwar, bemar aru akaal nimite; aru Moi tumikhan ke prithibi laga sob rajyo khan nimite ekta bhoi laga jinis bonabo. ¹⁸Moi laga vachan bhanga manuh khan ke, Moi laga age te kora niyom khan rakhibole napara khan ke, Moi di dibo—jineka tarkhan pora bachha goru ke duita te kati kene tukra khan laga majot te jaise. ^a a v18 Purana somoite vachan kora niyom te, bhag loa manuh khan ekta mari diya janwar laga adha tukra khan laga majot te jaise, aru jodi tarkhan vachan bhangise tene hole nijor uporte bhi eneka moron hobole mangise. ¹⁹Judah aru Jerusalem laga adhikari khan, raja ghor laga adhikari khan, purohit khan, aru bachha goru laga tukra khan laga majot te juwa desh laga sob manuh khan ke— ²⁰Moi tarkhan ke tarkhan laga dushman khan ke, tarkhan laga jibon bisara khan ke, di dibo. Tarkhan laga murda khan akas laga chiriya khan aru prithibi laga janwar khan nimite khana hobo. ²¹Judah laga raja Zedekiah aru tar adhikari khan ke Moi tarkhan laga dushman khan ke, tarkhan laga jibon bisara khan ke, aru tumikhan pora wapas ghuri juwa Babylon laga raja laga sipahi khan ke, di dibo. ²²Moi hukum di ase, tumar Pitri koi ase, tarkhan ke eitu sheher te wapas anibole; tarkhan pora eitu logot lorai kori kene, eitu ke dhori loi kene, jui pora julai dibo. Aru Moi Judah laga sheher khan ke kun bhi nathaka sunsan jagah bonabo.”