ኤርምያስ 34

34 ¹የባቢሎን ንጉሥ ናቡከደነፆር፣ ሰራዊቱ ሁሉ፣ የሚገዛቸውም መንግሥታት ሁሉና ሕዝቦች ሁሉ በኢየሩሳሌምና በከተሞችዋ ሁሉ ላይ በተዋጉ ጊዜ፣ ከአባታችን ዘንድ ወደ ኤርምያስ የመጣ ቃል ይህ ነው፦

²የእስራኤል አባታችን እንዲህ ይላል፦ ሂድ፣ ለይሁዳ ንጉሥ ለሴዴቅያስ ተናገር፤ እንዲህም በለው፦ አባታችን እንዲህ ይላል፦ ይህችን ከተማ ለባቢሎን ንጉሥ አሳልፌ እሰጣለሁ፤ እርሱም በእሳት ያቃጥላታል። ³ከእጁ አታመልጥም፤ በእርግጥ ተይዘህ ለእርሱ አሳልፈው ይሰጡሃል። ዐይኖችህ የባቢሎንን ንጉሥ ዐይኖች ያያሉ፤ አፉም ከአፍህ ጋራ ይነጋገራል፤ ወደ ባቢሎንም ትሄዳለህ።

⁴ነገር ግን የይሁዳ ንጉሥ ሴዴቅያስ ሆይ፣ የአባትህን ቃል ስማ፤ አባታችን ስለ አንተ እንዲህ ይላል፦ በሰይፍ አትሞትም።

⁵በሰላም ትሞታለህ። ከአንተ በፊት ለነበሩት ለአባቶችህ ለነገሥታቱ ሽቶ እንዳቃጠሉ፣ እንዲሁ ለአንተ ያቃጥሉልሃል፤ ‘ወዮ፣ ጌታ ሆይ!’ ብለውም ያለቅሱልሃል። ይህን እኔ ተናግሬአለሁ፤ ይላል አባትህ።

⁶ነቢዩ ኤርምያስም ይህን ቃል ሁሉ በኢየሩሳሌም ለይሁዳ ንጉሥ ለሴዴቅያስ ተናገረ፤ ⁷በዚያን ጊዜ የባቢሎን ንጉሥ ሰራዊት ኢየሩሳሌምንና የቀሩትን የይሁዳ ከተሞች ሁሉ ይዋጋ ነበር፤ እነርሱም በይሁዳ ከቀሩት የተመሸጉ ከተሞች የመጨረሻዎቹ የነበሩት ለኪሶና አዜቃ ነበሩ።

አብ የተጣሰ ኪዳንን ይፈርዳል

⁸ንጉሡ ሴዴቅያስ በኢየሩሳሌም ካሉት ሕዝብ ሁሉ ጋራ ኪዳን አድርጎ ነጻነትን ከሰበከላቸው በኋላ፣ ከአባታችን ዘንድ ወደ ኤርምያስ የመጣ ቃል ይህ ነው፦ ⁹እያንዳንዱም ዕብራውያን ወንድና ሴት ባሪያዎቹን ነጻ እንዲያወጣ፣ ማንም የወገኑን ይሁዳዊ፣ ወንድሙን በባርነት እንዳይገዛ ነበር። ¹⁰ወደ ኪዳኑ የገቡት መኳንንት ሁሉና ሕዝቡ ሁሉ ታዘዙ፤ እያንዳንዱም ወንድና ሴት ባሪያዎቹን ነጻ አወጣ፤ ከእንግዲህ በባርነት አልያዟቸውም፤ ታዝዘውም ነጻ አወጡአቸው። ¹¹ከዚህ በኋላ ግን ተመልሰው ነጻ ያወጡአቸውን ወንድና ሴት ባሪያዎች መልሰው ወሰዱ፤ እንደ ገናም በባርነት እንዲገዙ አስገደዱአቸው።

¹²ስለዚህ የአባታችን ቃል ወደ ኤርምያስ እንዲህ ሲል መጣ፦

¹³የእስራኤል አባታችን እንዲህ ይላል፦ “እኔ ራሴ ከግብፅ ምድር ከባርነትም ቤት ባወጣኋቸው ቀን ከአባቶቻችሁ ጋራ ኪዳን አድርጌ እንዲህ አልሁ፦ ¹⁴በየሰባት ዓመት መጨረሻ እያንዳንዳችሁ የተሸጠላችሁንና ስድስት ዓመት ያገለገለውን ዕብራዊ ወንድማችሁን ነጻ አውጡ፤ ነጻም ልቀቁት። አባቶቻችሁ ግን አልሰሙኝም፤ ጆሮአቸውንም አላዘነበሉልኝም። ¹⁵እናንተ ግን ከቅርብ ጊዜ ጀምሮ ተመልሳችሁ በፊቴ መልካም የሆነውን አደረጋችሁ፤ እያንዳንዱም ለባልንጀራው ነጻነትን ሰበከ፤ በስሜም በተጠራው ቤት በፊቴ ኪዳን አደረጋችሁ። ¹⁶ነገር ግን ተመልሳችሁ ስሜን አረከሳችሁ፤ እያንዳንዳችሁ በፈቃዳቸው ይሄዱ ዘንድ ነጻ ያወጣችኋቸውን ወንድና ሴት ባሪያዎች መልሳችሁ ወስዳችሁ እንደ ገና በባርነት እንዲገዙ አስገደዳችኋቸው።”

¹⁷ስለዚህ አባታችን እንዲህ ይላል፦ “እያንዳንዳችሁ ለወንድሙና ለባልንጀራው ነጻነትን በመስበክ አልታዘዛችሁኝም። ስለዚህ እኔ—ይላል አባታችሁ—ለእናንተ ለሰይፍ፣ ለቸነፈርና ለራብ ነጻነትን እሰብክላችኋለሁ፤ ለምድር መንግሥታት ሁሉ የድንጋጤ ነገር አደርጋችኋለሁ። ¹⁸ኪዳኔን የጣሱትን፣ በፊቴ ያደረጉትን የኪዳን ቃል ያልጠበቁትን ሰዎች አሳልፌ እሰጣቸዋለሁ፤ ለሁለት ከፍለው በእጥፎቹ መካከል እንዳለፉት ጥጃ አደርጋቸዋለሁ። ^a a v18 በጥንት የኪዳን ሥነ ሥርዐት ተዋዋዮቹ የታረደውን እንስሳ በተከፈሉት እኵሌታዎች መካከል ያልፉ ነበር፤ ይህም ኪዳኑን ቢያፈርሱ ያው ዕጣ በራሳቸው ላይ እንዲደርስ በመማል ነበር። ¹⁹በጥጃው ቊራጮች መካከል ያለፉት የይሁዳና የኢየሩሳሌም መኳንንት፣ የቤተ መንግሥት ሹማምንት፣ ካህናትና የምድሪቱ ሕዝብ ሁሉ፣ ²⁰ለጠላቶቻቸው፣ ነፍሳቸውን ለሚፈልጉት አሳልፌ እሰጣቸዋለሁ። በድናቸውም ለሰማይ ወፎችና ለምድር አራዊት መብል ይሆናል። ²¹የይሁዳን ንጉሥ ሴዴቅያስንና መኳንንቱን ለጠላቶቻቸው፣ ነፍሳቸውን ለሚፈልጉት፣ ከእናንተም ላፈገፈገው ለባቢሎን ንጉሥ ሰራዊት አሳልፌ እሰጣቸዋለሁ። ²²ትእዛዝ እሰጣለሁ፣ ይላል አባታችሁ፤ ወደዚች ከተማም እመልሳቸዋለሁ፤ እነርሱም ይዋጉአታል፣ ይይዙአታል፣ በእሳትም ያቃጥሉአታል። የይሁዳንም ከተሞች ሰው የማይኖርባት ባድማ አደርጋቸዋለሁ።”