Jeremia 34 FHB Father's Heart Bible™

34 ¹Kiugo kĩrĩa kĩokire kũrĩ Jeremia kuuma kũrĩ Ithe witũ rĩrĩa Nebukadineza mũthamaki wa Babuloni, na mbũtũ yake yothe ya ita, na mothamaki mothe marĩa aathagĩrĩra, na ndũũrĩrĩ ciothe, maarũaga na Jerusalemu na matũũra maayo mothe manene, kĩarĩ atĩrĩ:

²Ithe witũ wa Isiraeli ekuuga atĩrĩ: Thiĩ ũkeere Zedekia mũthamaki wa Juda atĩrĩ: Ithe witũ ekuuga atĩrĩ: Niĩ nĩngũneana itũũra rĩĩrĩ inene mookoinĩ ma mũthamaki wa Babuloni, naake nĩakarĩcina na mwaki. ³Wee ndũkahonoka kuuma mookoinĩ make, no ti-itherũ nĩũkanyiitwo na ũneanwo kũrĩ we. Maitho maku nĩmakoona maitho ma mũthamaki wa Babuloni, nako kanua gake karĩaranĩrie na kanua gaku, nawe ũthiĩ Babuloni.

⁴No rĩrĩ, igua kiugo kĩa Ithe waku, wee Zedekia, mũthamaki wa Juda: Ithe witũ ekuuga atĩrĩ, ndũgaakua na rũhiũ rwa njora.

⁵Nĩũgaakua na thaayũ. O ta ũrĩa indo cia mũtararĩko ciacinĩĩirwo maithe maku, mathamaki arĩa maarĩ mbere yaku, no taguo magaagũcinĩra wee, na magaagũcakaĩra makiuga atĩrĩ, ‘Ĩiya, mwathi witũ!’ Niĩ nĩndoiga ũguo, ũguo nĩguo Ithe waku ekuuga.

⁶Naake Jeremia ũrĩa mũnabii akĩĩra Zedekia mũthamaki wa Juda ciugo icio ciothe kũu Jerusalemu, ⁷hĩndĩ ĩrĩa mbũtũ ya ita ya mũthamaki wa Babuloni yaatharĩkĩire Jerusalemu na matũũra mothe marĩa maatigaarĩte ma Juda—nĩmo Lakishi na Azeka; nĩmo matũũra maarĩ na thingo cia hinya marĩa maatigaarĩte kũu Juda.

Ithe Atuĩra Kĩrĩĩkanĩro Kĩthũkie Ciira

⁸Kiugo kĩrĩa kĩokire kũrĩ Jeremia kuuma kũrĩ Ithe witũ thuutha wa mũthamaki Zedekia kũgĩa kĩrĩĩkanĩro na andũ othe arĩa maarĩ Jerusalemu, akĩmaanĩrĩria wĩyathi: ⁹atĩ o mũndũ aarekererie ngombo ciake cia Ahiburu, arũme na atumia, nĩgeetha gũtikagĩe mũndũ ũngĩtua Mũjuda ũrĩa ũngĩ, mũrũ wa ithe, ngombo. ¹⁰Nao anene othe na andũ othe arĩa maatoonyete kĩrĩĩkanĩroinĩ magĩathĩka, o mũndũ akĩrekereria ngombo ciake cia arũme na cia atumia, matigacooke kũmarũmia ũkomboinĩ; nĩmathĩkire na makĩmarekereria. ¹¹No thuutha ũcio magĩcooka na magĩcookeria ngombo icio cia arũme na cia atumia iria maarĩĩkĩtie kũrekereria, na makĩmahatĩrĩria magĩcooka ũkomboinĩ.

¹²Naguo kiugo kĩa Ithe witũ gĩgĩkinyĩra Jeremia, kĩkĩmwĩra atĩrĩ:

¹³Ithe witũ wa Isiraeli ekuuga ũũ: “Niĩ mwene nĩndagĩire na kĩrĩĩkanĩro na maithe manyu mũthenya ũrĩa ndaamarutire bũrũri wa Misiri, ngĩmaruta nyũmbainĩ ya ũkombo, ngĩmeera atĩrĩ: ¹⁴Mĩaka mũgwanja yathira, o mũndũ no nginya arekererie mũrũ wa ithe ũrĩa Mũhiburu ũrĩa wendetio kũrĩ we na agagũtungatĩra mĩaka ĩtandatũ; mũrekererie athiĩ. No maithe manyu matiigana kũnjigua kana kũrũmbũiya ũhoro wakwa. ¹⁵Inyuĩ matukũinĩ maya nĩmũgarũrũkire na mũgĩĩka ũrĩa kũrĩ na kĩhooto maithoinĩ makwa, o mũndũ akĩanĩrĩria wĩyathi kũrĩ mũndũ wao ũrĩa ũngĩ, mũkĩgĩa kĩrĩĩkanĩro mbere yakwa thĩinĩ wa nyũmba ĩrĩa ĩĩtanĩtio na rĩĩtwa rĩakwa. ¹⁶No inyuĩ mũgĩcooka na mũgĩthaahia rĩĩtwa rĩakwa: o ũmwe wanyu akĩcookeria ngombo ciake cia arũme na cia atumia iria aarĩkĩtie kũrekereria ithiĩ na wĩyathi, akĩmahatĩrĩria magĩcooka ũkomboinĩ rĩngĩ.”

¹⁷Nĩ ũndũ ũcio Ithe witũ ekuuga atĩrĩ: “Inyuĩ mũtiinjathĩkĩire na kũanĩrĩria wĩyathi, o mũndũ kũrĩ mũrũ wa ithe na kũrĩ mũndũ wao. Nĩ ũndũ ũcio niĩ ngũmwanĩrĩria wĩyathi—ũguo nĩguo Ithe wanyu ekuuga—wa gũkaaneanwo kũrĩ rũhiũ rwa njora, na mũthiro, na ng'aragu; na nĩngamũtua kĩndũ gĩa kũmakia mothamakinĩ mothe ma thĩ. ¹⁸Na nĩngaaneana andũ arĩa maathũkirie kĩrĩĩkanĩro gĩakwa, makĩaga kũrũmia ciugo cia kĩrĩĩkanĩro kĩrĩa maagĩire kĩo mbere yakwa—o ta njaũ ĩrĩa maatinanĩirie icunjĩ igĩrĩ, makĩgerera gatagatĩ ga icunjĩ icio. ^a a v18 Mahĩndĩinĩ ma tene, hĩndĩ ya kũgĩa kĩrĩĩkanĩro, andũ arĩa maagĩaga kĩrĩĩkanĩro nĩmagereire gatagatĩ ga icunjĩ igĩrĩ cia nyamũ ĩrĩa yathĩnjĩtwo, makĩĩrooria ũndũ o taguo ũmakore mangĩkaaga kũrũmia kĩrĩĩkanĩro kĩu. ¹⁹Nĩo anene a Juda na a Jerusalemu, na anene a nyũmba ya mũthamaki, na athĩnjĩri Ngai, na andũ othe a bũrũri arĩa maagereire gatagatĩ ga icunjĩ cia njaũ ĩyo. ²⁰Nĩngaamaneana kũrĩ thũ ciao, kũrĩ arĩa marendaga kũmaruta muoyo. Nacio ciimba ciao ikaarĩĩo nĩ nyoni cia rĩerainĩ na nyamũ cia thĩ. ²¹Nake Zedekia mũthamaki wa Juda na anene ake nĩngaamaneana kũrĩ thũ ciao, kũrĩ arĩa marendaga kũmaruta muoyo, na kũrĩ mbũtũ ya ita ya mũthamaki wa Babuloni ĩrĩa ĩmweherereire. ²²Niĩ nĩ ngũruta watho, ũguo nĩguo Ithe wanyu ekuuga, atĩ macookio itũũra rĩĩrĩ inene; nao nĩmakaarĩrũa, na marĩtahe, na marĩcine na mwaki. Na nĩngatua matũũra ma Juda werũ mũtheri ũtarĩ mũndũ ũtũũraga kuo.”