Arekabi Matĩĩa ithe wao
Jeremia akahe andũ a Rekabu ndibei, nao makarega tondũ mũndũ wao wa tene Jonadabu aamerire matikanyue. Gwathĩka gwao kũrĩ ithe wao wa mũndũ ũrĩa wakuire tene nĩkũringithanagio na ũrĩa Juda yaregire kũigua Ithe witũ, ũrĩa warĩtie rĩngĩ na rĩngĩ. Njiarwa cia Jonadabu ikeeranĩrwo handũ ha gũtũũra.
35 1Kiugo kĩrĩa gĩokire kũrĩ Jeremia kuuma kũrĩ Ithe witũ matukũinĩ ma Jehoiakimu mũrũ wa Josia, mũthamaki wa Juda:
2“Thiĩ nyũmba ya Arekabi, warie nao, ũmarehe thĩinĩ wa kanyũmba ka mwena wa nyũmba yakwa, ũmahe ndibei manyue.”
3Nĩ ũndũ ũcio ngĩoya Jaazania mũrũ wa Jeremia, mũrũ wa Habazinia, na ariũ a ithe wake na aariũ aake oothe na nyũmba yothe ya Arekabi, 4na ngĩmarehe nyũmbainĩ ya Ithe witũ, thĩinĩ wa kanyũmba ka aariũ a Hanani mũrũ wa Igidalia, mũndũ wa Ithe witũ, hakuhĩ na kanyũmba ka anene, igũrũ rĩa kanyũmba ka Maaseia mũrũ wa Shalumu, mũrangĩri wa kĩhingo. 5Ngĩcooka ngĩiga mbakũri ciyũrĩte ndibei na ikombe mbere ya aariũ a nyũmba ya Arekabi, ngĩmeera atĩrĩ, “Nyuai ndibei.”
6No makiuga atĩrĩ, “Ithuĩ tũtikũnyua ndibei, amu ithe witũ Jonadabu mũrũ wa Rekabu nĩatwathire atĩrĩ: ‘Inyuĩ na ciana cianyu mũtikananyua ndibei o na rĩ. 7Mũtigaake nyũmba, kana mũhaande mbeũ, o na kana mũhaande mũgũnda wa mĩthabibũ; mũtikagĩe na kĩndũ o na kĩmwe. Tũũrai hemainĩ matukũ manyu mothe, nĩ geetha mũtũũre matukũ maingĩ bũrũriinĩ ũrĩa mũtũũraga.’ 8Nĩ ũndũ ũcio nĩtwathĩkĩire Jonadabu mũrũ wa Rekabu, ithe witũ, maũndũinĩ mothe marĩa aatwathire: tũtikanyue ndibei matukũ maitũ mothe—ithuĩ, na atumia aitũ, na aariũ aitũ, na airĩĩtu aitũ, 9na tũtigaake nyũmba cia gũtũũra. Tũtirĩ mũgũnda wa mĩthabibũ kana mũgũnda kana mbeũ, 10no nĩtũtũũrĩte hemainĩ, tũgĩathĩkaga na tũgĩĩkaga maũndũ mothe marĩa ithe witũ Jonadabu aatwathire. 11No rĩrĩa Nebukadineza mũthamaki wa Babuloni aatharĩkĩire bũrũri ũcio, nĩtwoigire atĩrĩ, ‘Ũkai, tũthiĩ Jerusalemu nĩguo tũũrĩre mbũtũ cia ita cia Babuloni na cia Aramu.’ Nĩ ũndũ ũcio tũtũũraga Jerusalemu.”
12Ningĩ kiugo kĩa Ithe witũ gĩgĩũka kũrĩ Jeremia, atĩrĩ:
13Ũũ nĩguo Ithe wa mbũtũ cia ita cia igũrũ, Ithe wa Isiraeli, ekuuga: Ĩra andũ a Juda na arĩa matũũraga Jerusalemu atĩrĩ: Kaĩ mũtegwĩtĩkĩra gũtaarwo na mũthikĩrĩrie ciugo ciakwa? ũguo nĩguo Ithe witũ ekuuga. 14Watho wa Jonadabu mũrũ wa Rekabu, ũrĩa aathire ciana ciake atĩ itikanyue ndibei, nĩũrũmĩtwo; nginya ũmũthĩ matinyuaga ndibei, tondũ nĩmathĩkĩire watho wa ithe wao. No niĩ nĩndamwarĩirie kaingĩ na kaingĩ, no mũtiigana kũnjigua.
15Ndaamũtũmĩire ndungata ciakwa ciothe, nĩo anabii, kaingĩ na kaingĩ, ngĩmeera atĩrĩ, ‘O ũmwe wanyu nĩagarũrũke atigane na mũthiĩre wake mũũru, na arũnge ciĩko ciake. Mũtikarũmĩrĩre ngai ingĩ nĩguo mũcitungatĩre, na nĩmũgũtũũra bũrũriinĩ ũrĩa ndaamũheire inyuĩ na maithe manyu ma tene.’ No mũtiigana kũnjigua kana kũrũmbũiya. 16Njiaro cia Jonadabu mũrũ wa Rekabu nĩciarũmĩtie watho wa ithe wao, no andũ aya matiigana kũnjigua.
17Nĩ ũndũ ũcio Ithe wa mbũtũ cia ita cia igũrũ, Ithe wa Isiraeli, ekuuga atĩrĩ: “Nĩ ngũrehithĩria Juda na andũ othe a Jerusalemu mathĩĩna mothe marĩa ndaamoigĩrĩire, tondũ ndaamaarĩirie no matiathikĩrĩirie, ndaametire no matiigana gũcookia.”
18Naake Jeremia akĩĩra nyũmba ya Arekabi atĩrĩ, “Ũũ nĩguo Ithe wa mbũtũ cia ita cia igũrũ, Ithe wa Isiraeli, ekuuga: Tondũ nĩmwathĩkĩire watho wa ithe wanyu Jonadabu, na mũkĩrũmia mawatho maake mothe, na mũgĩĩka ũrĩa wothe aamwathire, 19nĩ ũndũ ũcio Ithe wa mbũtũ cia ita cia igũrũ, Ithe wa Isiraeli, ekuuga atĩrĩ: Jonadabu mũrũ wa Rekabu ndakaaga mũndũ wa rũciaro rwake ũrĩa ũkaarũgamaga mbere yakwa hĩndĩ ciothe.”