Haokaphok 34

34 ¹Leahna Jacobli kapharā sha̱nao Dinahna ngalei ngalānaobingli theikhavai shokhaowa. ²Hivpā Hamorwui nao ngalei wungnao Shechemna ali theida tukkhuida ngasopi, kala ali makhangatun ot sai. ³Awui ning Jacobwui naongalāva̱ Dinahli ngavaptitta, kala ana sha̱nao chili leishida awui ningli hānga. ⁴Chieina Shechemna avāva̱ Hamorli hānga, "Iwui vang sha̱nao hi ipreiva̱ sākhavai khuimilu."

⁵Jacobna Shechemna awui naongalāva̱ Dinah makhao ngasaka da shāhaowa, kha awui naomayarabing luili awui sha̱keili leihaoda, chiwui vang athum rāranglakha eina tangda Jacob kasaikha pama. ⁶Chieina Shechemwui avāva̱ Hamorna Jacobli tui hāngkhavai shokhaowa. ⁷Jacobwui naomayarabing luiwui eina rāhaowa. Athumna chi shālaga, mibing ningyāng khanang ngasakta malungvātlakhaowa, kaja Shechemna Jacobwui naongalāva̱li ngasopilaga Israelwui alungli sā khavai maningkhamana maphākakhui ot sāhaira. ⁸Hamorna athumli hānga, "Iwui nao Shechemna nathumwui naongalāva̱li ningkachāngna pemthuihaowa. Ina nathumli kapona, apreiva̱ sākhavai ali khamilu. ⁹Ithumli ngalā ngakhotsa; nathumwui naongalāva̱ ngarā ithumli khamilu, kala ithumwui naongalāva̱ ngarā nathum khalattawui vang khuilu. ¹⁰Ithumli ngasopamlu; ngalei chi nathumwui mangāli theida lei; chili pamda leih londa lan samphanglu."

¹¹Shechemna sha̱naowui avāva̱ eina achinā ngarāli hānga, "Nathumwui mangāli ili lumashankhami samphangmilu; nathumna ili kahāng saikora ina mira. ¹²Nathumna ili manho eina lemmet kayākhashida ngahānlu; ina miphalungra. Sha̱nao chimāng ipreiva̱ sākhavai ili khamilu."

¹³Jacobwui naomayarabingna Shechem eina awui avāva̱ Hamorli minamlak eina ngahānkai, kaja Shechemna athumwui achināva̱ Dinah makhao ngasaka. ¹⁴Athumna athumli hānga, "Ahui marimkashoka mi akhali ithumwui achināva̱ khami hi ithum masārarmara; chi ithumwui vang maikashi ngasakra. ¹⁵Ithumna hi maningla ngaraichāda: nathum ithum kathā ngasāda, nathumwui mayarnao kachiva̱ saikora ahui rimshokakha. ¹⁶Chithākha ithumna ithumwui naongalāva̱ ngarā nathumli khamila, kala nathumwui naongalāva̱ ngarā ithum khalattawui vang khuira; ithumna nathumli ngasopamda mi akhana ngasāra. ¹⁷Kha nathumna manganāsangla ahui marimshok phaningakha, ithumna ithumwui naongalāva̱ khuilaga thuihaora."

¹⁸Athumwui tui chi Hamor eina awui nao Shechemna ningyāng unglakhaowa. ¹⁹Yaronnao chi kapan maleilakmana, kaja ana Jacobwui naongalāva̱li ningyāng unglaka. Ana avāva̱wui shimkhurli khayā kāmeithuida sai. ²⁰Hamor eina awui nao Shechemna athumwui keinung ngaveili rāda, athumwui keinungwui mibingli hānga: ²¹"Mi hibing ithumla chingri kahaina. Athumli ngaleili leira ngasaklaga chili leih khalon sāranu, kaja ngalei chi athumwui vang mashālak kahaina. Ithumna athumwui naongalāva̱ ngarāli preiva̱ sākhavai khuira kala ithumwui naongalāva̱ ngarāli athumli mira. ²²Mi hibingna ithumla mi akha thāda ngasoleipam khavai hi khami akhamāng ngaraichāda: ithum ngachaili mayarnao kachiva̱, athum ahui rimshok kahai thāda, ahui rimshokra jiya. ²³Athumwui sha̱kei, lan, kala athumwui sāyur saikora hi ithumwuina masāmara? Ithumna athumla ngaraichai jimāng, kala athum ithumla leipaira."

²⁴Awui keinung ngavei eina shokkharā saikorana Hamor eina awui nao Shechemli nganāsanga, kala mayarnao kachiva̱ ahui rimshokhaowa. ²⁵Kakathumathang athum kachotpamlakha Jacobwui naomayara khani Dinahwui achinā ngarā Simeon eina Levina, kachiva̱na awui raighai khuida, yansāngsa̱ eina leisā keinung chili shokngararra, kala mayarnao kachiva̱ shaothata. ²⁶Athumna Hamor eina awui nao Shechemli raighai eina shaothata, Shechemwui shim eina Dinahli khuilaga thuihaowa. ²⁷Jacobwui naomayarabing chi kathibing chili rāda keinung chi ngapona, kaja apam chiwui mibingna athumwui azara̱li sākhamāng ngasakhaira. ²⁸Athumna athumwui yao, sei, gadhā, kala keinungli kala luili khalei ot saikora khuihaowa. ²⁹Athumna athumwui lan saikora, naoshinaobing saikora, kala apreiva̱ ngarāli tukthuida, shimli khalei ot saikora ngaponkhui. ³⁰Jacobna Simeon eina Levili hānga, "Apam hili leikasā Canaannaobing eina Periznaobingli ili nganamshi ngasakta nathumna ili kakhanangli horsangmihaira. Iwui mibing kateokhamānga; athum ili mamayāmada ngarumkha, ili angararra, kala I eina iwui shimkhur sāshimānhaora."

³¹Kha athumna hānga, "Ana ithumwui azara̱li khayorva̱ thāda sāki kajila?"