ଆଦି ପୁସ୍ତକ 34 FHB Father's Heart Bible™

34 ¹ଲେୟା ଯାକୁବଙ୍କ ନିମନ୍ତେ ଜନ୍ମ ଦେଇଥିବା କନ୍ୟା ଦୀଣା ସେହି ଦେଶର ଯୁବତୀମାନଙ୍କୁ ଦେଖିବା ନିମନ୍ତେ ବାହାରକୁ ଗଲା। ²ସେହି ଦେଶର ଅଧିପତି ହିବୀୟ ହମୋରର ପୁତ୍ର ଶିଖିମ ତାହାକୁ ଦେଖି ଧରି ତାହା ସହିତ ଶୟନ କରି ତାହାକୁ ଭ୍ରଷ୍ଟ କଲା। ³ତାହାର ପ୍ରାଣ ଯାକୁବଙ୍କ କନ୍ୟା ଦୀଣାଠାରେ ଆସକ୍ତ ହେଲା, ସେ ସେହି ବାଳିକାକୁ ପ୍ରେମ କଲା ଓ ତାହାର ମନକୁ ଆଶ୍ଵାସନା ଦେଇ କଥା କହିଲା। ⁴ତେଣୁ ଶିଖିମ ଆପଣା ପିତା ହମୋରକୁ କହିଲା, “ଏହି ବାଳିକାକୁ ମୋʼ ନିମନ୍ତେ ବିବାହ ନିମନ୍ତେ ଆଣିଦିଅ।”

⁵ଶିଖିମ ଆପଣା କନ୍ୟା ଦୀଣାକୁ ଅଶୁଚି କରିଅଛି ବୋଲି ଯାକୁବ ଶୁଣିଲେ, କିନ୍ତୁ ତାହାଙ୍କ ପୁତ୍ରମାନେ କ୍ଷେତ୍ରରେ ପଶୁପଲ ସହିତ ଥିବାରୁ, ସେମାନେ ନ ଆସିବା ପର୍ଯ୍ୟନ୍ତ ଯାକୁବ କିଛି କହିଲେ ନାହିଁ। ⁶ଏଥିଉତ୍ତାରେ ଶିଖିମର ପିତା ହମୋର ଯାକୁବଙ୍କ ସହିତ କଥାବାର୍ତ୍ତା କରିବା ନିମନ୍ତେ ତାହାଙ୍କ ନିକଟକୁ ବାହାରି ଆସିଲା। ⁷ଯାକୁବଙ୍କ ପୁତ୍ରମାନେ କ୍ଷେତ୍ରରୁ ଫେରି ଆସିଲେ, ଆଉ ଯେତେବେଳେ ସେମାନେ ଏହା ଶୁଣିଲେ, ସେତେବେଳେ ସେହି ଲୋକମାନେ ଅତ୍ୟନ୍ତ ଦୁଃଖିତ ଓ କ୍ରୋଧିତ ହେଲେ, କାରଣ ଶିଖିମ ଯାକୁବଙ୍କ କନ୍ୟା ସହିତ ଶୟନ କରି ଇସ୍ରାଏଲ ମଧ୍ୟରେ ଏକ ଲଜ୍ଜାଜନକ କର୍ମ, ଅର୍ଥାତ୍‍ ଅକର୍ତ୍ତବ୍ୟ କର୍ମ କରିଥିଲା। ⁸ତହିଁରେ ହମୋର ସେମାନଙ୍କ ସହିତ କଥାବାର୍ତ୍ତା କରି କହିଲା, “ମୋହର ପୁତ୍ର ଶିଖିମ ତୁମ୍ଭମାନଙ୍କ କନ୍ୟା ପ୍ରତି ଆସକ୍ତ ହୋଇଅଛି, ବିନୟ କରୁଅଛି, ତାହାକୁ ବିବାହ ନିମନ୍ତେ ତାହା ସଙ୍ଗେ ଦିଅ। ⁹ଆଉ ତୁମ୍ଭେମାନେ ଆମ୍ଭମାନଙ୍କ ସହିତ ବିବାହ ସମ୍ବନ୍ଧ କର, ତୁମ୍ଭମାନଙ୍କ କନ୍ୟାମାନଙ୍କୁ ଆମ୍ଭମାନଙ୍କୁ ଦିଅ ଓ ଆମ୍ଭମାନଙ୍କ କନ୍ୟାମାନଙ୍କୁ ଆପଣାମାନଙ୍କ ନିମନ୍ତେ ଗ୍ରହଣ କର। ¹⁰ପୁଣି, ତୁମ୍ଭେମାନେ ଆମ୍ଭମାନଙ୍କ ସହିତ ବାସ କର, ଦେଶ ତୁମ୍ଭମାନଙ୍କ ସମ୍ମୁଖରେ ମୁକ୍ତ ଅଛି; ତୁମ୍ଭେମାନେ ଏହି ଦେଶରେ ବସତି କରି ବାଣିଜ୍ୟ କର ଓ ସମ୍ପତ୍ତି ଅର୍ଜନ କର।”

¹¹ଆଉ ଶିଖିମ ତାହାର ପିତା ଓ ଭ୍ରାତୃଗଣଙ୍କୁ କହିଲା, “ଆପଣମାନଙ୍କ ଦୃଷ୍ଟିରେ ମୁଁ ଅନୁଗ୍ରହ ପ୍ରାପ୍ତ ହେବି; ଆପଣମାନେ ମୋତେ ଯାହା କହିବେ, ତାହା ମୁଁ ଦେବି। ¹²ଆପଣମାନେ ମୋʼ ଠାରୁ ଯେତେ ବଡ଼ ଯୌତୁକ ଓ ଉପହାର ମାଗିଲେ ହେଁ ମୁଁ ତାହା ଦେବି; କେବଳ ସେହି ବାଳିକାକୁ ବିବାହ ନିମନ୍ତେ ମୋତେ ଦିଅନ୍ତୁ।”

¹³ଶିଖିମ ସେମାନଙ୍କ ଭଗିନୀ ଦୀଣାକୁ ଭ୍ରଷ୍ଟ କରିଥିବାରୁ ଯାକୁବଙ୍କ ପୁତ୍ରମାନେ ଛଳନାରେ ଶିଖିମକୁ ଓ ତାହାର ପିତା ହମୋରକୁ ଉତ୍ତର ଦେଲେ, ¹⁴“ଆମ୍ଭେମାନେ ଏହି କର୍ମ କରି ପାରୁ ନାହିଁ, ଆମ୍ଭମାନଙ୍କ ଭଗିନୀକୁ ଅସୁନ୍ନତ ଲୋକ ସଙ୍ଗେ ବିବାହ ଦେଇ ପାରୁ ନାହିଁ; କାରଣ ତାହା ଆମ୍ଭମାନଙ୍କ ପ୍ରତି ଅପମାନଜନକ। ¹⁵କେବଳ ଏହି ବିଷୟରେ ଆମ୍ଭେମାନେ ସମ୍ମତ ହୋଇ ପାରୁ, ଯଦି ତୁମ୍ଭମାନଙ୍କର ପ୍ରତ୍ୟେକ ପୁରୁଷ ସୁନ୍ନତ ହୋଇ ତୁମ୍ଭେମାନେ ଆମ୍ଭମାନଙ୍କ ପରି ହୁଅ, ତେବେ ସମ୍ମତ ହେବୁ। ¹⁶ତେବେ ଆମ୍ଭେମାନେ ଆମ୍ଭମାନଙ୍କ କନ୍ୟାମାନଙ୍କୁ ତୁମ୍ଭମାନଙ୍କୁ ଦେବୁ ଓ ତୁମ୍ଭମାନଙ୍କ କନ୍ୟାମାନଙ୍କୁ ଆପଣାମାନଙ୍କ ନିମନ୍ତେ ଗ୍ରହଣ କରିବୁ, ପୁଣି, ଆମ୍ଭେମାନେ ତୁମ୍ଭମାନଙ୍କ ସହିତ ବାସ କରି ଏକ ଗୋଷ୍ଠୀ ହେବୁ। ¹⁷ମାତ୍ର ଯଦି ତୁମ୍ଭେମାନେ ଆମ୍ଭମାନଙ୍କ କଥା ନ ଶୁଣି ସୁନ୍ନତ ନ ହୁଅ, ତେବେ ଆମ୍ଭେମାନେ ଆମ୍ଭମାନଙ୍କ କନ୍ୟାକୁ ନେଇ ଚାଲିଯିବୁ।”

¹⁸ସେମାନଙ୍କ ଏହି କଥା ହମୋରକୁ ଓ ତାହାର ପୁତ୍ର ଶିଖିମକୁ ସନ୍ତୋଷଜନକ ହେଲା। ¹⁹ଆଉ ସେହି ଯୁବକ ଯାକୁବଙ୍କ କନ୍ୟାଠାରେ ଆନନ୍ଦିତ ଥିବାରୁ ଏହି କର୍ମ କରିବାକୁ ବିଳମ୍ବ କଲା ନାହିଁ; ପୁଣି, ସେ ଆପଣା ପିତୃଗୃହର ସମସ୍ତଙ୍କଠାରୁ ଅଧିକ ସମ୍ମାନିତ ଥିଲା। ²⁰ତେଣୁ ହମୋର ଓ ତାହାର ପୁତ୍ର ଶିଖିମ ଆପଣାମାନଙ୍କ ନଗର-ଦ୍ଵାରକୁ ଆସି ନଗରସ୍ଥ ଲୋକମାନଙ୍କୁ କହିଲେ, ²¹“ଏହି ଲୋକମାନେ ଆମ୍ଭମାନଙ୍କ ସହିତ ଶାନ୍ତିପ୍ରିୟ; ଏଣୁ ସେମାନେ ଏହି ଦେଶରେ ବାସ କରନ୍ତୁ ଓ ଏଥିରେ ବାଣିଜ୍ୟ କରନ୍ତୁ; ଦେଖ, ଏହି ଦେଶ ସେମାନଙ୍କ ନିମନ୍ତେ ଯଥେଷ୍ଟ ପ୍ରଶସ୍ତ ଅଛି; ଆମ୍ଭେମାନେ ସେମାନଙ୍କ କନ୍ୟାମାନଙ୍କୁ ବିବାହ ନିମନ୍ତେ ଗ୍ରହଣ କରିବୁ ଓ ଆମ୍ଭମାନଙ୍କ କନ୍ୟାମାନଙ୍କୁ ସେମାନଙ୍କୁ ଦେବୁ। ²²କେବଳ ଏହି ସର୍ତ୍ତରେ ସେହି ଲୋକମାନେ ଆମ୍ଭମାନଙ୍କ ସହିତ ବାସ କରି ଏକ ଗୋଷ୍ଠୀ ହେବାକୁ ସମ୍ମତ ହେବେ, ଯେ ସେମାନେ ଯେପରି ସୁନ୍ନତ, ସେହିପରି ଆମ୍ଭମାନଙ୍କ ମଧ୍ୟରେ ପ୍ରତ୍ୟେକ ପୁରୁଷ ସୁନ୍ନତ ହେବ। ²³ତାହା କଲେ, ସେମାନଙ୍କ ପଶୁପଲ ଓ ସମ୍ପତ୍ତି ଓ ସେମାନଙ୍କ ସମସ୍ତ ପଶୁ କʼଣ ଆମ୍ଭମାନଙ୍କର ହେବ ନାହିଁ? କେବଳ ଆମ୍ଭେମାନେ ସେମାନଙ୍କ ସହିତ ସମ୍ମତ ହେଉ, ତେବେ ସେମାନେ ଆମ୍ଭମାନଙ୍କ ସହିତ ବାସ କରିବେ।”

²⁴ତହିଁରେ ତାହାର ନଗର-ଦ୍ଵାର ଦେଇ ବାହାରକୁ ଯିବା ସମସ୍ତେ ହମୋରର ଓ ତାହାର ପୁତ୍ର ଶିଖିମର କଥାରେ ମନୋଯୋଗ କଲେ, ପୁଣି, ତାହାର ନଗର-ଦ୍ଵାର ଦେଇ ବାହାରକୁ ଯିବା ପ୍ରତ୍ୟେକ ପୁରୁଷ ସୁନ୍ନତ ହେଲେ। ²⁵ଏଥିଉତ୍ତାରେ ତୃତୀୟ ଦିନରେ, ଯେତେବେଳେ ସେମାନେ ବେଦନାଗ୍ରସ୍ତ ଥିଲେ, ସେତେବେଳେ ଯାକୁବଙ୍କ ପୁତ୍ର ଦୀଣାର ଦୁଇ ଭ୍ରାତା ଶିମୀୟୋନ ଓ ଲେବୀ ପ୍ରତ୍ୟେକେ ଆପଣା ଆପଣା ଖଡ଼୍ଗ ନେଇ ନିର୍ଭୟ ନଗର ବିରୁଦ୍ଧରେ ଯାଇ ପ୍ରତ୍ୟେକ ପୁରୁଷକୁ ବଧ କଲେ। ²⁶ଆଉ ସେମାନେ ହମୋରକୁ ଓ ତାହାର ପୁତ୍ର ଶିଖିମକୁ ଖଡ଼୍ଗ ଧାରରେ ବଧ କରି ଶିଖିମର ଗୃହରୁ ଦୀଣାକୁ ନେଇ ଚାଲିଗଲେ। ²⁷ଏଥିଉତ୍ତାରେ ଯାକୁବଙ୍କ ପୁତ୍ରମାନେ ହତ ଲୋକମାନଙ୍କ ନିକଟକୁ ଆସି ନଗରକୁ ଲୁଣ୍ଠନ କଲେ, କାରଣ ସେଠାକାର ଲୋକମାନେ ସେମାନଙ୍କ ଭଗିନୀକୁ ଭ୍ରଷ୍ଟ କରିଥିଲେ। ²⁸ସେମାନେ ସେମାନଙ୍କ ମେଷପଲ ଓ ଗୋପଲ ଓ ଗର୍ଦ୍ଦଭ ଓ ନଗରସ୍ଥ ଓ କ୍ଷେତ୍ରସ୍ଥ ସମସ୍ତ ଦ୍ରବ୍ୟ ନେଇଗଲେ। ²⁹ଆଉ ସେମାନେ ସେମାନଙ୍କ ସମସ୍ତ ସମ୍ପତ୍ତି ଓ ସମସ୍ତ ବାଳକ ଓ ସ୍ତ୍ରୀମାନଙ୍କୁ ବନ୍ଦୀ କରି ନେଇଗଲେ, ପୁଣି, ଗୃହ ମଧ୍ୟସ୍ଥ ସମସ୍ତ ଦ୍ରବ୍ୟ ଲୁଣ୍ଠନ କଲେ। ³⁰ସେତେବେଳେ ଯାକୁବ ଶିମୀୟୋନ ଓ ଲେବୀକୁ କହିଲେ, “ତୁମ୍ଭେମାନେ ଏହି ଦେଶ ନିବାସୀ କିଣାନୀୟ ଓ ପରିଷୀୟ ଲୋକମାନଙ୍କ ନିକଟରେ ମୋତେ ଦୁର୍ଗନ୍ଧମୟ କରାଇ ମୋʼ ଉପରେ କ୍ଲେଶ ଆଣିଅଛ; ମୋହର ଲୋକ ଅଳ୍ପ; ଯଦି ସେମାନେ ମୋʼ ବିରୁଦ୍ଧରେ ଏକତ୍ର ହୁଅନ୍ତି, ତେବେ ସେମାନେ ମୋତେ ଆକ୍ରମଣ କରିବେ, ଆଉ ମୁଁ ଓ ମୋହର ପରିବାର ବିନଷ୍ଟ ହେବୁ।”

³¹ମାତ୍ର ସେମାନେ କହିଲେ, “ସେ କʼଣ ଆମ୍ଭମାନଙ୍କ ଭଗିନୀକୁ ବେଶ୍ୟା ତୁଲ୍ୟ ବ୍ୟବହାର କରିବ?”