Nganingchinga Kaji
Thikhami shimli kazat hi kasāmkhangai shimli kazat eina kharāngli, kaja hingkhami miyana thikhami hi a kharaluili khuiluiya. Khamayur hi ngayanmakhami eina kharāngli, ngathāmhai hi ngayarkhangai eina kharāngli, kala kani kathum kahai kachiva hi mi kharāluiya. Ngasāmmina ngathei kaji paikhuiya kala a ali mangathei kachida ngashuiya: Varivarana mi hi khamashung eina sāya; mina a ngayung kangaya lamkhoi sāya.
7 1Kaphā ming chi nganamkaphā thaoliva phāmei, kala kathi zimiksho chi naosak zimiksholiva phāmei. 2Sikafa shimli vākahai chi morkasong shimli vākajiwui vanga phāmei, kaja chi mi kachiva̱wui akuplamna, kala kharingabingna chi athumwui ningli hairanu. 3Kakhanang chi khamana̱liva phāmei, kaja mai khanangzana ningli kaphā ngasaka. 4Thangkhamabingwui ning chi sikafa shimli lei, kha mangkhama̱bingwui ning chi khamathān shimli lei. 5Thangkhamawui khamachin nganā chi mangkhama̱bingwui laa nganākajiwui vanga phāmei. 6Kaja ham azingli ka̱shāt mermer kachui thāda, chithāda mangkhama̱wui khamana̱na. Hila aremana. 7Kachangkhatta, rekakhareka thangkhama mili mangkhama̱ ngasaka, kala pheizāna ningli shimān ngasaka. 8Ot akhawui akuplam chi awui haokaphokliva phāmei, kala khāngkathei manglā chi langkaso manglāliva phāmei. 9Namanglāli malungvāt khavai thākta masaalu, kaja malungvāta mangkhama̱bingwui sa̱sāli pama. 10"Khisāda kachama atambing chi hibingliva phameikhala?" da mahāngalu; kaja na hi ngahānkhami chi thangkhameiwui eina maningmana. 11Thangkhamei chi shimluili ngasoda kaphāna, kala ngashun kathei mibingwui vang mataikhamei akhana. a a v11 'Ngashun kathei mibing' da kahāng hi kharingabingli—ringchingda khalei mibingli—hāngkhavai Hebrewbingwui tui akhana. 12Kaja thangkhamei chi ngayinkakhui akhana, lupā ngayinkakhui akha thāda; kha theikakhuiwui mataikhamei chi hina: thangkhameina awui kakā miwui mirin chi haikhame ngasaka. 13Varewui otsak chi machukkhuilu: ana khayeikazam sākahai chi khipāna ngatar sāshapkhala? 14Kashāng zimiksholi ringphālu, kala yangkashi zimiksholi phaninglu: Varena hi akhala khangatei akhala saikora sāmi, chieina awui thili shokra kahai khikhala mina maphākhuirarmana.
15Iwui arema atamli ina saikora theihaira: khamashunga mi akha awui khamashung khangarongli thikahaina, makhayā mi akha awui makhayā otsakli okpeida ringkahaina. 16Na tarākha khamashunga masaalu, kala nakhalatta tarākha thangma masaalu; khisāda nakhalatta sāshimān khuirakhala? 17Na tarākha makhayā masaalu, kala mangkhama̱ masaalu; khisāda nawui atam mararanglakha thirakhala? 18Hi singtit chi kaphāna, kala chila mahorhaialu; kaja Vareli khangachee china khanini eina yāmshoka. 19Thangkhameina thangkhama mili keinung akhali khalei khamungabing tharāli pangmei ngasaka. 20Kachangkhat eina okathuili kaphā sāda morei masā khalei khamashunga mi akhala maleimana. 21Chila, mibingna kahāng saikora naning eina makhuialu, chithākha naraona nali khonshikasā nana shāpaishina, 22kaja nawui wuklungna thei, thang kachungkha na khalattana kateibingli khonshi kahaina. 23Ot saikora hi thangkhamei eina ina chāng tamyanga. Ina hānga, "Ina thangmei phalungra"; kha chi iwui eina tāthuihaowa. 24Leikahai saikora katāli lei kala kathuk, kathuk kachungkhana; khipāna chi phāshapkhala? 25Thangkhamei kala saikorawui khān theikhavai, phākhui khavai kala phai khavai, kala mangma̱wui makaphā kala kapā kahai mangma̱ theikhavai ina iwui ning horsanga. 26Sha̱nao chi kathiliva khaimei kaji ina samphanghaira: awui wuklung chi khalen kala khaihlanna, awui pāng chi mari khanghuina. Varewui mangāli kaphā mi chi awui eina yāmshoka; kha morei kaphunga chi ali manna.
27"Yanglu, hi ina samphanghaira," da Hāshokmena hānga, "akha eina akhali mataida khān phākhui khavai, 28chi imanglāna phaichinga kha masamphangmana. 1,000wui ngachaili mayarnao akhava ina samphanga, kha saikora hiwui ngachaili sha̱nao akhala ina masamphangmana. 29Yanglu, hi akhamāng ina samphanghaira: Varena mikumoli mashungrik sākahai, kha athumna khangarān kachungkha phai."
