Hāshokme 8

8 ¹Khipāna thangkhama kathāna? Khipāna ot akhawui kakhalat theikhala? Miwui thangkhameina awui maipānla kahor ngasaka, kala awui maipānwui khamakang chi onhaowa.

²Ina hāngna, Varewui mangāli nawui khangashit sākahaiwui vang eina awungawui ningkhami mayonlu.

Awungawui Pangshap Azingli

³Awui mangāwui eina shok khavai thākta masaalu, lah makaphā mangli maphaningalu; kaja awungana awui ningkachāng athishurda sai. ⁴Kaja awungawui tuili pangshap peida khaleina, kala khipāna ali, "Na khi saila?" da hāngshaprakhala? ⁵Ningkhami mayona china sākashi matheimara; thangkhama wuklungna atam kala apong thei. ⁶Ot kachiva̱wui vang atam kala apong lei, chithālala miwui kakhanangna awuitungli ritlak eina shirena. ⁷Kaja khi rāra chi khipākhana matheimana, kala kathāda leira chi khipāna ali hāngshaprakhala? ⁸Khipākhana masili katong khavai pangshap maleimana, lah kathiwui zimiksho tungli pangshap maleimana. Chikathā raili khipākha zatphok mangasāmana, kala makaphāna chi sāsabingli mahuimirarmana. ⁹Hi saikora ina theihaira, kala okathuili sākahai ot kachiva̱li iwui ning mihaira; mi akhana khangatei mi akhawuitungli sākashi khavai munga atam akha lei.

Mashunwui Bichar Huihai Tharan

¹⁰Chieina ina makhayābing chifa kala ngasām kahai theihaira; athumna kathara apamwui eina rāhaida vāserhaowa, kala athumna hikathā sākahai keinung chili sochikata. Hila aremana. ^a a v10 Kathara apam kaho hi Jerusalemwui khorumshim chili hāngkhamina. ¹¹Makaphā otsakwui bichar chi arui eina makasāhaiwui vang eina, mibingwui ning makaphā sākhavai peida ningtongda phaninga. ¹²Morei kaphunga akhana makaphā shākhashida sāda rarlak eina ringhailala, chithālala Vareli khangachee mibing, awui mangāli khangacheebingli kaphā samphangra da ina thei. ¹³Makhayābing chi kaphā masamphangrarmana, kala khaya̱ kathāda athumwui atam masāngsangrarmana, kaja athumna Vareli mangacheemana.

¹⁴Okathuili arema ot akha shokkahaina: khangarong mibingna makhayābingwui samphangkhangayi khui, kala makhayābingna khangarong mibingwui samphangkhangayi khui. Hila aremana da ina hānga. ¹⁵Chieina ina ringphā chi sochikata: okathuili mi akhawui vang eina phāshak, mang kala ringphā chi eina phāmei kahai khikha maleimana. Varena okathuili ali mikahai mirinwui atam chi peida, awui ngalangkazārli hi ana shurra.

¹⁶Ina thangkhamei theikhavai kala okathuili sākahai ot theikhavai iwui ning mikahai tharan—mi akhawui mikna zimikla ngayāla pi matheimana— ¹⁷Chieina Varewui otsak saikora ina theihaira: okathuili sākahai ot chi khipākhana masamphangshaprarmana. Mi akhana panglāk eina phāhailala masamphangrarmana; thangkhama mina thei da hānghailala, athumna masamphangrarmana.