حِکمت مخ روښانه کوى
حکمت مشوره ورکوي چې د هغه پاچا په وړاندې احتیاط وکړئ چې هر څه یې خوښه وي هغه کوي. هیڅوک پر باد او د مرګ پر ورځ واک نه لري. د سزا ځنډ بدۍ ته زړه ورکوي، او صادقان ډېر ځله هغه څه مومي چې د بدکارانو حق دی. واعظ له ژوند څخه خوند اخیستل ستایي، او مني چې د خدای کار نه شي موندل کېدای.
8 1څوک د حکيم په شان دے؟ څوک پوهيږى چې د څيز معنىٰ څۀ ده؟ د انسان حِکمت د هغۀ مخ روښانه کوى، او د هغۀ د مخ سختى بدليږى.
2زۀ وايم چې د بادشاه حُکم ومنه، ځکه چې تا د خُدائ پاک په حضور کښې قسم کړے دے.
د بادشاه د واک سره چلند
3د هغۀ د حضور نه د تلو دپاره مۀ بيره کوه، او په بدۀ کار کښې مۀ ولاړېږه، ځکه چې بادشاه څۀ چې يې خوښه وى هغه کوى. 4ځکه چې د بادشاه خبره تر ټولو زيات اِختيار لرى، او څوک ورته وئيلے شى چې، ”تۀ څۀ کوې؟“ 5څوک چې حُکم ساتى هغۀ ته هيڅ زيان نۀ رسيږى، او د حکيم زړۀ وخت او طريقه پېژنى. 6هر کار خپل وخت او طريقه لرى، اګر چې د انسان مصيبت پرې درانه وى. 7ځکه چې هيڅوک نۀ پوهيږى چې څۀ به کيږى، او څوک ورته وئيلے شى چې دا به څنګه وى؟ 8هيڅوک په هوا باندې واک نۀ لرى چې هغه بنده کړى، او نۀ د مرګ په ورځ باندې. د دغه جنګ نه هيڅوک نۀ خلاصيږى، او بدى به هغه خلق چې دا کوى نۀ بچ کوى. 9ما دا ټول وليدل، چې ما خپل زړۀ هر هغه کار ته ورکړو چې د لمر لاندې کيږى. يو وخت داسې راغلو چې يو سړى په بل باندې د هغۀ د زيان دپاره واکمنى وکړله.
کله چې داد ځنډېدلے ښکارى
10بيا ما وليدل چې بدکاران ښخ شول او په آرام کښې کېښودل شول، او هغوئ د هغه پاک ځائ نه راتلل او تلل، او په هغه ښار کښې چې دا کار يې کړے وو د هغوئ ثنا وشوه. دا هم بېدوامه ده. a a v10 پاک ځائ د يروشلم عبادت خانې ته اِشاره کوى. 11ځکه چې د بدۀ کار سزا په چټکۍ سره نۀ ورکولے شى، نو د خلقو زړونه په بدى کولو پوره ټينګ شوى دى. 12اګر چې ګناهګار سل ځله بدى کوى او بيا هم اوږد ژوند کوى، خو زۀ پوهيږم چې د هغه چا سره به ښۀ کيږى چې د خُدائ پاک نه يريږى، چې د هغۀ په حضور کښې يريږى. 13د بدکار سره به ښۀ نۀ کيږى، او نۀ به د سورى په شان خپلې ورځې اوږدې کړى، ځکه چې هغه د خُدائ پاک نه نۀ يريږى.
14په زمکه باندې يو بېدوامه کار کيږى: چې صادقان هغه څۀ مومى چې د بدکارانو حق دے، او بدکاران هغه څۀ مومى چې د صادقانو حق دے. ما ووئيل چې دا هم بېدوامه ده. 15نو ما د خوشحالۍ ثنا وکړله، ځکه چې د لمر لاندې د انسان دپاره د دې نه ښۀ بل څۀ نشته چې خوراک، څښاک او خوشحالى وکړى. ځکه چې دا به د هغۀ د محنت په وخت کښې، د هغه ژوند په ورځو کښې چې خُدائ پاک ورته د لمر لاندې ورکړى دى، د هغۀ سره وى.
16کله چې ما خپل زړۀ حِکمت پېژندو او په زمکه باندې د کېدونکى کار ليدو ته ولګولو، اګر چې د انسان سترګې نۀ په ورځ نۀ په شپه خوب نۀ وينى، 17نو بيا ما د خُدائ پاک ټول کار وليدو، چې هيڅوک هغه کار نۀ شى موندلے چې د لمر لاندې کيږى. اګر چې انسان هر څو محنت وکړى، هغه به يې ونۀ مومى، او کۀ حکيم دا دعوىٰ هم وکړى چې زۀ پوهيږم، خو هغه يې نۀ شى موندلے.
