傳道書 8

8 ¹邊個好似有智慧嘅人咁呢?邊個知道一件事嘅意思呢?人嘅智慧令佢容光煥發,連佢繃緊嘅面容都變得柔和。

²我話你知,要遵守王嘅命令,因為你曾經喺神面前起過誓。

點樣面對王嘅權力

³唔好急住離開佢面前,亦都唔好堅持喺邪惡嘅事上,因為王想點做就點做。 ⁴王嘅話語有至高嘅權柄,邊個可以對佢講:「你做緊乜嘢呀?」 ⁵凡遵守命令嘅人必不遭害;有智慧嘅心曉得時機同方法。 ⁶每一件事都有佢嘅時機同方法,雖然人嘅愁苦重重咁壓喺佢身上。 ⁷因為冇人知道將來會點,亦都冇人可以話俾佢知事情會點樣發生。 ⁸冇人可以掌管風,將佢留住,亦都冇人可以掌管死亡嘅日子。冇人喺呢場爭戰中可以退役,邪惡亦都唔會拯救行邪惡嘅人。 ⁹我見到呢一切,我專心留意日光之下所做嘅一切事——就係人管轄人,以致互相殘害嘅時候。

當公義好似遲遲未到

¹⁰ 跟住我見到惡人被埋葬,得以安息;佢哋出入聖所,喺佢哋行過惡嘅城入面反而受到稱讚。呢樣都係虛空。 ^a a v10 聖所係指耶路撒冷嘅聖殿。 ¹¹因為判決惡行嘅刑罰唔係好快就執行,所以世人嘅心一心一意去行惡。 ¹²罪人雖然作惡一百次,重可以長壽,但係我知道敬畏神嘅人,就係喺佢面前存敬畏之心嘅人,佢哋必然得福。 ¹³惡人卻唔會得福,佢哋嘅日子亦都唔會好似影兒咁延長,因為佢哋唔敬畏神。

¹⁴世上有一件虛空嘅事發生:義人所得到嘅,竟然係惡人應得嘅報應;惡人所得到嘅,竟然係義人應得嘅賞賜。我話,呢樣都係虛空。 ¹⁵所以我稱讚享樂,因為人喺日光之下,冇乜嘢好過食嘢、飲嘢、快快樂樂;喺神賜俾佢日光之下一生嘅日子入面,喺佢勞碌之中,呢樣就伴住佢。

¹⁶當我專心去認識智慧,去觀察世上所做嘅工作嘅時候——就算人不分晝夜,眼都合唔埋—— ¹⁷我就見到神一切嘅作為:冇人可以查明日光之下所做嘅工作。無論人點樣費盡心力去尋查,都尋唔到;就算有智慧嘅人聲稱自己知道,佢都查唔明白。