Hikima Takan Haskaka Fuska
Hikima tana ba da shawara a yi hankali a gaban sarkin da yake yin abin da ya ga dama. Ba wanda yake iko da iska ko da ranar mutuwa. Jinkirin hukunci yana ƙarfafa mugunta, kuma sau da yawa adalai sukan sami abin da ya cancanci mugaye. Mai-Wa'azi yana yabon jin daɗi, yana kuma yarda cewa ba za a iya gane aikin Allah ba.
8 1Wane ne kamar mai hikima? Wa ya san ma'anar wani al'amari? Hikimar mutum takan haskaka fuskarsa, akan kuma sauya taurin fuskarsa.
2Ina ce maka, ka kiyaye umarnin sarki, saboda rantsuwar da ka yi a gaban Allah.
Yadda Za a Bi da Ikon Sarki
3Kada ka yi hanzarin barin gabansa, kada kuma ka tsaya cikin mugun al'amari, gama sarki yakan yi duk abin da ya ga dama. 4Gama maganar sarki tana da iko mafi girma, wa kuma ya isa yă ce masa, “Me kake yi?” 5Duk wanda ya kiyaye umarni ba zai san wata cuta ba; zuciya mai hikima kuwa takan san lokaci da hanya. 6Kowane al'amari yana da lokacinsa da hanyarsa, ko da yake wahalar mutum takan yi masa nauyi ƙwarai. 7Gama ba wanda ya san abin da zai zo, wa kuma zai iya gaya masa yadda zai kasance? 8Ba wanda yake da iko a kan iska yă riƙe ta, ko kuwa a kan ranar mutuwa. Ba a sakin kowa daga wannan yaƙi, mugunta kuma ba za ta ceci masu aikata ta ba. 9Dukan wannan na gani, na kuma mai da zuciyata ga kowane aiki da ake yi a duniya—lokacin da mutum yakan yi mulki a kan wani har yă cuce shi.
Sa'ad da Adalci Yake Kamar An Jinkirta
10Sa'an nan na ga an binne mugaye aka sa su hutawa; sukan shigo sukan fito daga wuri mai tsarki, aka kuma yabe su a cikin birnin da suka aikata haka. Wannan ma abu ne mai wucewa. a a v10 Wuri mai tsarki yana nufin haikali na Urushalima. 11Domin ba a gaggauta zartar da hukunci a kan mugun aiki ba, saboda haka zukatan mutane sun cika da niyyar aikata mugunta. 12Ko da yake mai zunubi yakan aikata mugunta sau ɗari ya kuma yi tsawon rai, duk da haka na san zai zama da lafiya ga masu tsoron Allah, waɗanda suke tsoro a gabansa. 13Amma mugaye ba za su zauna lafiya ba, ba kuwa za su yi tsawon kwanaki kamar inuwa ba, domin ba sa tsoron Allah.
14Akwai abu mai wucewa da yake faruwa a duniya: masu adalci suna samun abin da ya dace da mugaye, mugaye kuma suna samun abin da ya dace da masu adalci. Na ce wannan ma abu ne mai wucewa. 15Saboda haka na yabi jin daɗi, gama babu abin da ya fi wa mutum kyau a duniya face yă ci, yă sha, yă kuma yi farin ciki. Wannan zai kasance tare da shi cikin aikinsa, kwanakin rayuwar da Allah ya ba shi a duniya.
16Sa'ad da na kafa zuciyata don in san hikima, in kuma ga aikin da ake yi a duniya—ko da yake idanun mutum ba sa barci dare da rana— 17sai na ga dukan aikin Allah, cewa ba wanda zai iya gane aikin da ake yi a duniya. Ko mutum ya nemi gaske-gaske, ba zai same shi ba; ko da masu hikima sun ce sun sani, ba za su iya gane shi ba.