Kudimuka Kwisi Kenzula Mbunzu
Ngangu yisi longa keba ku thwala ya kinga wuna wisi hanga kyosu kazodini. Ka mutu ku wenina yi kiyeka ha pfunzi holo ha kilumbu kya lufwa. Mukanu wuzingidila wisi kodisa mbi, amana batu ba masonga mu mbala za lawu bisi tambula mana ma batu ba mbi mafweti tambula. Mulongi wisi zatula kyesi, amana wisi zimbula ni mudimu wa Nzambi wulendakanaku monika.
8 1Nati wenina hanga mutu wa kudimuka? Nati wuzayi disongidila dya dyambu? Kudimuka kwa mutu kwisi kenzula mbunzu yandi; amana ngolu ya mbunzu yandi yisi soba.
2Lunda mutsiku wa kinga, yisi zimbula, mukuma kya ndefi yaku ku thwala ya Nzambi.
Bukadulu mu Kiyeka kya Kinga
3Wakatukaku yi tswatsu ku thwala yandi, watelamaku mu dyambu dya mbi; mukuma kinga wisi hanga kyosu kima kina kisi muheka. 4Mukuma ndinga ya kinga yenina yi kiyeka kya lawu, amana nati kalenda kumuzimbwala: «Biki wisi hanga?» 5Wosu wuna wisi lunda mutsiku kazayiku ndunza; amana mbundu ya kudimuka yisi zaya tangwa yi nzila. 6Kosu dyambu dyenina yi tangwa dyandi yi nzila yandi, mbatanana kiwayi kya mutu kyenina zitu kya lawu hana yandi. 7Mukuma ka mutu ku wuzayi mana makhana kwisa, amana nati kalenda kumuzimbwala bwosu bwakala? 8Ka mutu ku wenina yi kiyeka ha pfunzi hanga kasimbidila yawu, kondi kiyeka ha kilumbu kya lufwa. Ka mutu ku kahúluka mu mvita meni yina, amana mbi kahululaku babana bisi yihanga. 9Yámona mamana moosu, mu kuhana mbundu yama kwena kosu kisalu kina kisi sadila ku sina dya tangwa; tangwa mutu mosi wáyala mukwawu mu kuhana ndunza kwena yandi.
Tangwa Mukanu Wubonikini ni Wuzyeta
10Buna yámona batu ba mbi bana bázikwa amana básolama; bakwísa yi bákatuka ku homa hatoma, amana bázatulwa mu mbanza mwamuna báhangila bwabuna. Dyadi phi dyenina dya tangwa dimosi. a a v10 Homa hatoma disongidila nzu ya Nzambi ya ku Yelusalemi. 11Mukuma mukanu wa kisalu kya mbi kalungisamoku yi tswatsu, mbundu za batu zidihani mvimba mu kuhanga mbi. 12Mbatanana musumuki wisi hanga mbi mbala khama, amana wukala zinga mvula lawu, kaasi nzayi ni byakala mboti kwena babana bisi yuka bweya bwa Nzambi, babana bisi yuka bweya ku thwala yandi. 13Batu ba mbi bakalaku mboti, amana balengidikaku bilumbu bya bawu hanga kininga, mukuma bisiku yuka bweya bwa Nzambi.
14Dyambu dya tangwa dimosi disi bwa ha tsi: batu ba masonga bisi tambula mana mafwana batu ba mbi, amana batu ba mbi bisi tambula mana mafwana batu ba masonga. Yizimbula ni dyadi phi dyenina dya tangwa dimosi. 15Buna yákumisa kyesi: keku kima kya mboti kwena mutu ku sina dya tangwa kuluta kudya, kunwa yi kusangwala. Dyadi disi mulanda mu kisalu kyandi, bilumbu bya luzingu bina Nzambi kámuheka ku sina dya tangwa.
16Muna tangwa yáhana mbundu yama mu kuzaya kudimuka, amana mu kumona kisalu kina kisi sadila ha tsi, mbatanana mutu kamónaku kilu mu mesu mandi, mu mwini kondi mu phipha. 17Buna yámona kisalu kyosu kya Nzambi: ka mutu ku kalenda kubakisa kisalu kina kisi sadila ku sina dya tangwa. Mbatanana wukwenda sanda yi ngolu, kamónaku yawu; ata mutu wa kudimuka katambwasa ni wuzayi, kalendaku kubakisa yawu.
