ጥበብ ንገፅ የብርሆ

ጥበብ ኣብ ቅድሚ እቲ ዝደለዮ ዝገብር ንጉስ ጥንቃቐ ትምዕድ። ንፋስ ኮነ መዓልቲ ሞት ዝዓግት ሓደ እኳ የለን። ፍርዲ ቀልጢፉ ስለ ዘይፍፀም ልቢ ደቂ ሰብ ናብ ክፉእ ይድፍእ፥ ፃድቃን ድማ ነቲ ንሓጥኣን ዝግባእ ብዙሕ ጊዜ ይረኽቡ። እቲ መምህር ንሓጐስ የመጉስ፥ ተግባር እግዚኣብሄር ክርከብ ከም ዘይኽእል ድማ ይእመን።

ምዕራፍ 8።

ከም ጠቢብ መን ኣሎ? ትርጉም ነገር መን ይፈልጥ? ጥበብ ሰብ ገፁ የብርሆ፤ ተሪር ገፁ ድማ ይልወጥ።

ትእዛዝ ንጉስ ሓሉ እብለካ ኣለኹ፥ ስለ እቲ ኣብ ቅድሚ እግዚኣብሄር ዝመሓልካዮ ማሕላ።

ስልጣን ንጉስ ምሕላፍ

ካብ ቅድሚኡ ንምኻድ ኣይትቀላጠፍ፤ ኣብ ክፉእ ነገርውን ኣይትፅናዕ፤ ንጉስ ዝደለዮ ዅሉ ይገብር እዩ እሞ። ቃል ንጉስ ልዑል ስልጣን ሒዙ ኣሎ እሞ፥ “እንታይ ትገብር ኣለኻ?” ኢሉ ዝብሎ መን ኣሎ? ትእዛዝ ዝሕሉ ዝኾነ ሰብ ክፉእ ኣይፈልጥን፤ ጥበበኛ ልቢ ኸዓ ጊዜን መንገድን ይፈልጥ። ንዅሉ ነገር ጊዜኡን መንገዱን ኣለዎ፤ ሽግር ሰብ ግና ኣብ ልዕሊኡ የመና ይኸብድ። ዝመፅእ ዘሎ ነገር ዝፈልጥ ሰብ የለን እሞ፥ ከመይ ከም ዝኸውን ዝነግሮ መን ኣሎ? ንፋስ ክዓግቶ ዝኽእል ሰብ የለን፤ ኣብ መዓልቲ ሞትን ስልጣን የብሉን፤ ካብቲ ውግእ እቲ ሓራ ዝወፅእ የለን፤ ክፋእ ከዓ ነቶም ዝገብርዎ ኣየድሕኖምን። ነዝ ዅሉ ረአኹ፤ ልበይ ድማ ኣብቲ ኣብ ትሕቲ ፀሓይ ዝግበር ዅሉ ተግባር ሃብኩ፤ ሓደ ሰብ ንኻልእ ንጕድኣቱ ዝገዝኣሉ ጊዜ ነበረ።

ፍትሒ ዝደንጐየ ዝመስለሉ

ሽዑ ነቶም ሓጢኣተኛታት ተቐቢሮም ዓሪፎም ረአኹ፤ ካብቲ ቅዱስ ቦታ ይመፁን ይኸዱን ነበሩ፤ ኣብታ ኸምኡ ዝገበሩላ ኸተማ ድማ ተነኣዱ። እዙይውን ከንቱ እዩ። ^a ፍርዲ ክፉእ ተግባር ቀልጢፉ ስለ ዘይፍፀም፥ ልቢ ደቂ ሰብ ክፉእ ንምግባር ፍፁም ተዳልዩ ኣሎ። ሓጥእ ክፉእ ሚእቲ ሻዕ እኳ እንተ ገበረ፥ ዕድሚኡ ድማ እኳ እንተ ነውሐ፥ ነቶም ንእግዚኣብሄር ዝፈርሑ፥ ኣብ ቅድሚኡ ዝፈርሑ ፅቡቕ ከም ዝኾነሎም ግና ኣነ እፈልጥ እየ። ነቶም ሓጢኣተኛታት ግና ፅቡቕ ኣይኮኖምን፤ ንእግዚኣብሄር ስለ ዘይፈርሁ ኸዓ ዕድሚኦም ከም ፅላሎት ኣይነውሕን እዩ።

ኣብ ምድሪ ዝኸውን ከንቱ ነገር ኣሎ፦ ፃድቃን ነቲ ንሓጥኣን ዝግባእ ይረኽቡ፥ ሓጥኣን ድማ ነቲ ንፃድቃን ዝግባእ ይረኽቡ። እዙይውን ከንቱ እዩ በልኩ። ስለዙይ ንሓጐስ ኣመጐስክዎ፤ ኣብ ትሕቲ ፀሓይ ካብ ምብላዕን ምስታይን ምሕጓስን ንሰብ ዝሐይሽ የብሉን እሞ። ኣብቲ እግዚኣብሄር ኣብ ትሕቲ ፀሓይ ዝሃቦ መዓልቲታት ህይወቱ፥ እዙይ ኣብ ጻዕሩ የሰንዮ።

ጥበብ ንምፍላጥን ኣብ ምድሪ ዝግበር ዘሎ ስራሕ ንምርኣይን ልበይ ምስ ገበርኩ፥ ዓይኒ ሰብ ለይትን መዓልትን ድቃስ ኣይርእን እዩ። ሽዑ ኵሉ ግብሪ እግዚኣብሄር ረአኹ፦ ኣብ ትሕቲ ፀሓይ ዝግበር ዘሎ ስራሕ ክፈልጦ ዝኽእል ሰብ የለን። ሰብ ክንደይ እኳ ፈቲኑ እንተ ደለዮ ኣይረኽቦን፤ እቲ ጠቢብ “እፈልጥ እየ” እኳ እንተ በለ፥ ክረኽቦ ኣይክእልን እዩ።