Oniwaasu 7

7 ¹Orúkọ rere sàn ju tùràrí olówó iyebíye lọ, ọjọ́ ikú sì sàn ju ọjọ́ ìbí lọ. ²Ó sàn láti lọ sí ilé ọ̀fọ̀ ju láti lọ sí ilé àsè lọ, nítorí ìyẹn ni òpin olúkúlùkù, àwọn alààyè sì gbọdọ̀ fi sọ́kàn. ³Ìbànújẹ́ sàn ju ẹ̀rín lọ, nítorí ojú tí ó bàjẹ́ dára fún ọkàn. ⁴Ọkàn ọlọ́gbọ́n wà ní ilé ọ̀fọ̀, ṣùgbọ́n ọkàn àwọn òmùgọ̀ wà ní ilé ìgbádùn. ⁵Ó sàn láti gbọ́ ìbáwí ọlọ́gbọ́n ju láti gbọ́ orin àwọn òmùgọ̀ lọ. ⁶Nítorí bí ariwo ẹ̀gún tí ń jó lábẹ́ ìkòkò, bẹ́ẹ̀ ni ẹ̀rín òmùgọ̀. Èyí náà jẹ́ asán. ⁷Dájúdájú, ìninilára ń sọ ọlọ́gbọ́n di òmùgọ̀, àbẹ̀tẹ́lẹ̀ sì ń ba ọkàn jẹ́. ⁸Òpin ọ̀rọ̀ kan sàn ju ìbẹ̀rẹ̀ rẹ̀ lọ, ẹ̀mí sùúrù sì sàn ju ẹ̀mí ìgbéraga lọ. ⁹Má ṣe yára nínú ẹ̀mí rẹ láti bínú, nítorí ìbínú ń gbé àyà àwọn òmùgọ̀. ¹⁰Má ṣe wí pé, “Èéṣe tí àwọn ọjọ́ àtijọ́ fi sàn ju ìwọ̀nyí lọ?” Nítorí kì í ṣe láti inú ọgbọ́n ni ìwọ fi ń béèrè èyí. ¹¹Ọgbọ́n dára pẹ̀lú ogún, àǹfààní ni fún àwọn tí ń rí oòrùn. ^a a v11 ‘Àwọn tí ń rí oòrùn’ jẹ́ gbólóhùn Hébérù fún àwọn alààyè — àwọn tí ó ṣì wà láàyè. ¹²Nítorí ọgbọ́n jẹ́ ààbò, gẹ́gẹ́ bí owó ti jẹ́, ṣùgbọ́n àǹfààní ìmọ̀ ni èyí: ọgbọ́n ń pa ẹ̀mí ẹni tí ó ni í mọ́. ¹³Ṣàgbéyẹ̀wò iṣẹ́ Ọlọ́run: ta ni ó lè tọ́ ohun tí ó ti sọ di wíwọ́? ¹⁴Ní ọjọ́ àásìkí, kí inú rẹ dùn, ní ọjọ́ ìpọ́njú, kí ìwọ ronú pé: Ọlọ́run ti dá èyí bí ó ti dá èkejì, kí ẹnikẹ́ni má ṣe lè ṣàwárí ohunkóhun tí yóò wá lẹ́yìn rẹ̀.

¹⁵Ní àwọn ọjọ́ asán mi, mo ti rí gbogbo rẹ̀: olódodo tí ń kú nínú òdodo rẹ̀, ẹni búburú tí ń wà pẹ́ nínú ìwà búburú rẹ̀. ¹⁶Má ṣe jẹ́ olódodo àṣejù, má sì ṣe sọ ara rẹ di ọlọ́gbọ́n àṣejù; èéṣe tí ìwọ yóò fi pa ara rẹ run? ¹⁷Má ṣe búburú jù, má sì ṣe jẹ́ òmùgọ̀—èéṣe tí ìwọ yóò fi kú kí àkókò rẹ tó dé? ¹⁸Ó dára láti di èyí mú, kí o má sì jọ̀wọ́ ìyẹn náà lọ́wọ́, nítorí ẹnikẹ́ni tí ó bá bẹ̀rù Ọlọ́run yóò la àwọn méjèèjì kọjá. ¹⁹Ọgbọ́n ń sọ ọlọ́gbọ́n di alágbára ju àwọn alákòóso mẹ́wàá tí ń bẹ nínú ìlú lọ. ²⁰Dájúdájú kò sí olódodo kankan lórí ilẹ̀ ayé tí ń ṣe rere tí kì í sì í dẹ́ṣẹ̀ láé. ²¹Pẹ̀lúpẹ̀lú, má ṣe fi gbogbo ohun tí ènìyàn ń sọ sọ́kàn, kí ìwọ má ba à gbọ́ tí ìránṣẹ́ rẹ ń bú ọ, ²²nítorí ọkàn ara rẹ mọ̀ pé ní ọ̀pọ̀ ìgbà, ìwọ fúnra rẹ ti bú àwọn ẹlòmíràn. ²³Mo fi ọgbọ́n dán gbogbo èyí wò. Mo wí pé, “Èmi ti pinnu láti gbọ́n”—ṣùgbọ́n ó kọjá agbára mi. ²⁴Ohunkóhun tí ó bá wà jìnnà réré, ó sì jìn, ó jìn gidigidi—ta ni ó lè ṣàwárí rẹ̀? ²⁵Mo yí ọkàn mi padà láti mọ̀, láti ṣàwárí, àti láti wá ọgbọ́n àti àpapọ̀ àwọn nǹkan, àti láti mọ ibi ìwà òmùgọ̀ àti ìwèrè tí í ṣe ìsínwín. ²⁶Mo rí i pé obìnrin náà korò ju ikú lọ: ọkàn rẹ̀ jẹ́ ìdẹkùn àti àwọ̀n, ọwọ́ rẹ̀ jẹ́ ẹ̀wọ̀n. Ẹni rere níwájú Ọlọ́run yóò bọ́ lọ́wọ́ rẹ̀; ṣùgbọ́n ẹlẹ́ṣẹ̀ ni yóò kó sí àwọ̀n rẹ̀.

²⁷Olùkọ́ni náà wí pé, “Wò ó, èyí ni ohun tí mo rí,” “ní fífi ọ̀kan kún òmíràn láti rí àpapọ̀ rẹ̀, ²⁸èyí tí ọkàn mi ń wá kiri ṣùgbọ́n tí n kò rí. Ọkùnrin kan nínú ẹgbẹ̀rún ni mo rí, ṣùgbọ́n obìnrin kan nínú gbogbo wọ̀nyí ni n kò rí. ²⁹Wò ó, èyí nìkan ni mo rí: Ọlọ́run dá ènìyàn ní òdodo, ṣùgbọ́n wọ́n wá ọ̀pọ̀ ète.”