Oniwaasu 6

6 ¹Ibi kan wà tí mo ti rí lábẹ́ oòrùn, ó sì wúwo lórí ọmọ ènìyàn: ²Ọkùnrin kan tí Ọlọ́run fún ní ọrọ̀, àti ọlà, àti ọlá, tí kò sì ṣe aláìní ohunkóhun tí ọkàn rẹ̀ ń fẹ́—síbẹ̀ Ọlọ́run kò jẹ́ kí ó jẹ nínú rẹ̀; àlejò ni ó jẹ ẹ́ dípò rẹ̀. Èyí jẹ́ asán, àrùn tí ó kún fún ìbànújẹ́.

³Bí ọkùnrin kan bá bí ọgọ́rùn-ún ọmọ, tí ó sì wà láàyè fún ọ̀pọ̀ ọdún—bí ọjọ́ ayé rẹ̀ ti wù kí ó pẹ́ tó—ṣùgbọ́n tí ọkàn rẹ̀ kò ní ìtẹ́lọ́rùn pẹ̀lú ohun rere, tí a kò sì sìn ín pàápàá, mo wí pé ọmọ tí a bí ní òkú sàn ju òun lọ. ⁴Ó dé nínú èéfín, ó sì lọ sínú òkùnkùn; òkùnkùn sì bo orúkọ rẹ̀. ⁵Bí ó tilẹ̀ jẹ́ pé kò rí oòrùn rí, bẹ́ẹ̀ ni kò sì mọ ohunkóhun, ó ní ìsinmi ju ọkùnrin náà lọ. ⁶Àní bí ó tilẹ̀ wà láàyè fún ẹgbẹ̀rún ọdún lẹ́ẹ̀méjì tí kò sì gbádùn ohun rere rí, kì í ha ṣe ibi kan náà ni gbogbo wọn ń lọ? ⁷Gbogbo làálàá ènìyàn jẹ́ fún ẹnu rẹ̀, síbẹ̀ ọkàn rẹ̀ kì í kún láé. ⁸Èrè wo ni ọlọ́gbọ́n ní ju aṣiwèrè lọ? Kí ni tálákà jàǹfààní nípa mímọ bí yóò ṣe hùwà níwájú àwọn ẹlòmíràn? ⁹Rírí ojú sàn ju ìrìn kiri ìfẹ́-ọkàn lọ. Èyí pẹ̀lú jẹ́ asán, lílé afẹ́fẹ́. ¹⁰Ohunkóhun tí ó wà, a ti sọ orúkọ rẹ̀ tẹ́lẹ̀, a sì mọ ohun tí ènìyàn jẹ́; òun kò sì lè bá ẹni tí ó ní agbára ju ara rẹ̀ lọ jà.

¹¹Bí ọ̀rọ̀ bá ṣe ń pọ̀ sí i, bẹ́ẹ̀ ni gbogbo rẹ̀ ń di asán sí i, báwo ni èyí sì ṣe ṣe ẹnikẹ́ni ní èrè? ¹²Nítorí ta ni ó mọ ohun tí ó dára fún ènìyàn ní ọjọ́ díẹ̀ ìgbésí ayé rẹ̀ asán, tí ó ń kọjá bí òjìji? Nítorí ta ni ó lè sọ fún un ohun tí yóò ṣẹlẹ̀ lẹ́yìn rẹ̀ lábẹ́ oòrùn?