Afọ Na-ejughị Eju
Mmadụ nwere ike inwe akụnụba, nsọpụrụ, na narị ụmụ, ma ọ bụ na e kweghị ya ka o rite uru ọ bụla nʼime ha; Onye Nkuzi ahụ kwuru na nwa a mụrụ nwụrụ anwụ nwere izu ike karịa ya. Agụụ anaghị eju, amamihe anaghị azụta uru, ọ dịghịkwa onye maara ihe na-esote.
6 1Ọ dị ihe ọjọọ m hụrụ nʼokpuru anyanwụ, nke na-adịkwa ụmụ mmadụ arọ nke ukwuu: 2Nwoke Chineke nyere akụ, na ụba, na nsọpụrụ, nke na-akọ ya ihe ọ bụla mkpụrụobi ya chọrọ—ma Chineke anaghị ekwe ka o rie site na ya; kama ọbịa na-eri ya. Nke a bụ ihe na-agafe agafe, ọrịa jọgburu onwe ya.
3Ọ bụrụ na nwoke amụọ ụmụ narị, biekwa ọtụtụ afọ—agbatịakwa ndụ ya ruo ebe ọ bụla—ma mkpụrụobi ya ejughị afọ nʼihe ọma, e lighịkwa ya ozu, asị m na nwa a mụrụ nwụọ ka ya mma. 4Ọ na-abịa nʼefu, na-alakwa nʼọchịchịrị; ọchịchịrị na-ekpuchikwa aha ya. 5Ọ bụ ezie na ọ hụbeghị anyanwụ ma ọ maghịkwa ihe ọ bụla, ọ na-enwe izuike karịa nwoke ahụ. 6Ọ bụladị na o biri puku afọ ugboro abụọ ma ọ nụtụbeghị ụtọ ihe ọma, ọ bụ na ha niile anaghị aga otu ebe? 7Ọrụ niile mmadụ na-adọgbu onwe ya nʼime ya bụ maka ọnụ ya, ma agụụ ya adịghị eju afọ mgbe ọ bụla. 8Olee uru onye maara ihe nwere karịa onye nzuzu? Gịnị bụ uru onye ogbenye na-enweta site nʼịmata otu o si ekwesị ịkpa agwa nʼihu ndị ọzọ? 9Ihe anya na-ahụ ka mma karịa ọchịchọ na-awagharị awagharị. Nke a kwa bụ ihe na-agafe agafe, ịchụso ifufe. 10Ihe ọ bụla dị adị ka akpọọrọ aha ya mbụ, amakwaara ihe mmadụ bụ; ọ pụghịkwa ịrụso onye dị ike karịa ya ụka.
11Ka okwu na-abawanye, otu a ka ihe niile na-abawanyekwa nʼagafe agafe, oleekwa otu nke ahụ si abara onye ọ bụla uru? 12Nʼihi na onye maara ihe dị mma nye mmadụ nʼụbọchị ole na ole nke ndụ ya na-agafe agafe, nke na-agafe dịka onyinyo? Nʼihi na onye pụrụ ịgwa ya ihe ga-eme mgbe ọ gasịrị nʼokpuru anyanwụ?
