Ecclesiastes 6

6 ¹Adunay usa ka daotan nga akong nakita ilalom sa adlaw, ug kini mabug-at kaayo alang sa katawhan: ²Usa ka tawo nga gihatagan sa Dios ug bahandi, katigayonan, ug kadungganan, nga walay nakulang sa tanang gipangandoy sa iyang kalag—apan wala siya tugoti sa Dios nga makakaon niini; usa hinuon ka dumuloong ang mikaon niini. Kini lumalabay, usa ka makalolooy nga sakit.

³Kon ang usa ka tawo manganak ug usa ka gatos ka bata ug mabuhi ug daghang katuigan—bisan unsa pa ka taas sa iyang kinabuhi—apan ang iyang kalag wala matagbaw sa mga maayong butang, ug wala pa gani siya ilubong, moingon ako nga ang usa ka bata nga nahimugso nga patay mas maayo pa kay kaniya. ⁴Kini moabot diha sa aso ug mopahawa ngadto sa kangitngit; ang kangitngit motabon sa iyang ngalan. ⁵Bisan tuod wala gayod kini makakita sa adlaw o makaila ug bisan unsa, aduna kini mas daghang pahulay kay niadtong tawhana. ⁶Bisan pa mabuhi siya ug 1,000 ka tuig sa makaduha nga walay bisan kanus-a nakapahimulos sa maayo, dili ba ang tanan paingon man sa samang dapit? ⁷Ang tanang kahago sa tawo alang sa iyang baba, apan ang iyang gana dili gayod matagbaw. ⁸Unsa may kabintahaan sa maalamon kay sa buangbuang? Unsa may makuha sa kabos nga tawo pinaagi sa pagkahibalo kon unsaon niya paggawi atubangan sa uban? ⁹Mas maayo pa ang makita sa mga mata kay sa paglatagaw sa tinguha. Kini usab lumalabay, usa ka paggukod sa hangin. ¹⁰Bisan unsa nga naglungtad gihinganlan na daan, ug kon unsa ang tawo, nahibaloan na; ug dili siya makalalis sa usa nga mas kusgan kay kaniya.

¹¹Kon mas daghan ang mga pulong, mas lumalabay ang tanan, ug sa unsang paagi makaginansiya niana ang si bisan kinsa? ¹²Kay kinsa may nasayod kon unsa ang maayo alang sa tawo sulod sa pipila ka adlaw sa iyang lumalabay nga kinabuhi, nga milabay sama sa anino? Kay kinsa may makasulti kaniya kon unsa ang mahitabo human kaniya ilalom sa adlaw?