Kwaga Kũiganĩra

Mũndũ no akorwo na ũtonga, gĩtĩĩo na ciana igana, na no ndetĩkĩrio gũkenera o na kĩndũ; Mũrutani oigaga atĩ mwana ũciarĩtwo akuĩte arĩ na ihurũko gũkĩra we. Merirĩria matiiganaga, ũũgĩ ndũguraga ũtũũgĩru, na gũtirĩ mũndũ ũĩ kĩrĩa gĩgookaga thuutha.

Gĩcunjĩ 6.

Nĩ harĩ ũũru ndĩĩoneete gũkũ thĩ kwaraga riũa, naguo nĩũritũhĩire andũ mũno: Mũndũ ũrĩa Ngai aaheaga ũtonga, na indo nyingĩ, na gĩtĩĩo, akaaga ũndũ o na ũmwe ngoro yake ĩĩrirĩirie—no Ngai ndamwĩtĩkagĩria arĩĩe indo icio; handũ ha ũguo, irĩĩagwo nĩ mũgeni. Ũndũ ũyũ nĩ wa tũhũ, na nĩ mũrimũ mũũru.

Mũndũ angĩciara ciana igana rĩmwe na atũũre mĩaka mĩingĩ—o na matukũ ma muoyo wake maingĩhe atĩa—no ngoro yake ĩage kũiganĩra nĩ maũndũ mega, o na ndathikwo-rĩ, niĩ nguuga atĩ mwana ũciarĩtwo arĩ mũkuũ nĩ mwega gũkĩra we. Ũcio ũũkaga ũrĩ wa tũhũ, naguo ũgathiĩ nduma-inĩ; narĩo rĩĩtwa rĩaguo rĩkahumbĩrwo nĩ nduma. O na gũtuĩka gũtirĩ hĩndĩ wonire riũa kana ũkĩmenya ũndũ o na ũrĩkũ, no nĩũrĩ na ũhurũko mũingĩ gũkĩra mũndũ ũcio. O na angĩtũũra mĩaka ngiri ĩgĩrĩ atakenirio nĩ maũndũ mega-rĩ, githĩ oothe matithiiaga o handũ hamwe? Wĩra wothe wa mũndũ nĩ wa kanua gake, no ngoro yake ndĩiganagĩra o na rĩ. Mũndũ mũũgĩ arĩ na uumithio ũrĩkũ gũkĩra mũndũ mũkĩĩgu? Nake mũthĩĩni oonaga uumithio ũrĩkũ nĩ ũndũ wa kũmenya ũrĩa angĩĩthiĩĩra mbere ya andũ arĩa angĩ? Nĩ kaba kuona na maitho gũkĩra merirĩria kũũrũũra. Ũndũ ũyũ o naguo nĩ wa tũhũ, na nĩ gũteng'eria rũhuho. Kĩndũ o gĩothe kĩrĩa kĩrĩho nĩ kĩarĩkĩtie gũtuuo rĩĩtwa, na ũrĩa mũndũ atariĩ nĩũĩku; naake ndangĩhoota gũkararania na ũrĩa ũmũkĩrĩte hinya.

O ũrĩa ciugo ciingĩhaga, noguo maũndũ mothe makĩragĩrĩria kũhaana ta ma tũhũ, nake mũndũ oonaga uumithio ũrĩkũ harĩ ũguo? Nĩ ũndũ-rĩ, nũũ ũũĩ kĩrĩa kĩrĩ kĩega harĩ mũndũ matukũ-inĩ macio manini ma muoyo wake wa tũhũ, marĩa ahĩtũkagia ta kĩĩruru? Ningĩ nũũ ũngĩmwĩra ũrĩa gũgaatuĩka thuutha wake gũkũ thĩ kwaraga riũa?