Kukhonda Kukhuta Ntima
Munthu anakwanisa kukhala na cuma, ulemu, na ana dzana mbwenye mbakhonda kutawirwa kukomerwa na cinthu ciri consene; Mpfunzisi asalonga kuti mwana wakubalwa wakufa ali na kupuma kupiringana iye. Njala nkhabe kukhuta nthawe zonsene, nzeru nkhabe kugula phindu, na nkhabe munthu anadziwa pinadzatowera.
6 1Pana cinthu cakuipa cidaona Ine pantsi pa dzuwa, cakuti cisalemera kakamwe anthu: 2Mamuna anapaswa na Mulungu mpfuma, upfumi na cilemedzo, mbakhonda kusoweka cinthu cibodzi cinafuna ntima wace—mbwenye Mulungu nkhabe kuntawirisa toera kudya pya iwo; mbwenye mulendo ndiye anadya pyenepi. Pyenepi ndi pyakupita mwakucimbiza, utenda wakuwawa.
3Mamuna angabala ana dzana, mbakhala pyaka pizinji—maseze umaso wace ukhale uphapi—mbwenye ntima wace nkhabe kukhuta na pinthu pyadidi, pontho iye nkhabe kuikhwa n'thaka tayu, Ine ndisalonga kuti mwana adafa mbadzati kubalwa ali pa mwai wadidi kupiringana iye. 4Iye asabwera mwapezi mbaenda mu cidima; cidima cisaphimbira dzina yace. 5Maseze iye cipo adaona dzuwa nee kudziwa cinthu cibodzi, iye ali na kupuma kwakupiringana mamuna ule. 6Maseze akhale maso pyaka cikwi cibodzi kaiwiri, mbakhonda kutsandzaya pyadidi, kodi onsene nkhabe kuenda pa mbuto ibodzi ene? 7Basa yonsene ya munthu ndi ya mulomo wace, mbwenye njala yace nkhabe kukhuta. 8Kodi munthu wa ndzeru ali na phindu yanji kupiringana dzemwa? Kodi nyakusauka asaphindula ninji mu kudziwa kufamba kwace pamaso pa anthu anango? 9Mwadidi kuona kwa maso kupiringana kuzungaira kwa cifuno. Pyenepimbo ndi pyakupita mwakucimbiza, kuthamangira mphepo. 10Cinthu consene ciripo capaswa kale dzina, pontho pisadziwika kale kuti munthu ndi ninji; iye nkhabe kwanisa kuketesana na ule wa mphambvu kupiringana iye.
11Mafala angathimizirika, pyakupita mwakucimbiza pisathimizirikambo, pontho pyenepi pisaphindula munthu tani? 12Thangwi mbani anadziwa cadidi kwa munthu mu ntsiku zakucepa za umaso wace wakupita mwakucimbiza, zinapita ninga n'thundzi? Thangwi mbani anakwanisa kumpanga pinafuna kucitika pakumala pa umaso wace pantsi pa dzuwa?
