Fendzerani Toera Kubvesera
Pita ku nyumba ya Mulungu toera kubvesera, nee kulonga; mafala ako akhale pang'ono na pereka pinadumbira iwe. Kufuna kobiri nkhabe kukwanira nthawe zonsene, cuma cinakwanisa kumala m'bizimusi ibodzi yakuipa, na iwe usabuluka wakusowa nguwo ninga mudabwera iwe. Kukomerwa na mbali yako ya basa ndi mphaso ya Mulungu.
5 1Koserani minyendo yanu mungapita m'nyumba ya Mulungu. Fendzerani toera kubvesera, tayu toera kupereka ntsembe ya mapswiru—iwo nkhabe dziwa kuti asacita pyakuipa. 2Lekani kucimbiza mulomo wanu, na lekani ntima wanu kucimbika toera kulonga pamaso pa Mulungu—Mulungu ali kudzulu, imwe muli pa dziko, natenepa mafala anu mbakhale machepa. 3Thangwi ndoto isabwera thangwi ya mabasa mazinji, na fala ya pswiru isabwera thangwi ya mafala mazinji. 4Mungapikira cipikiro kuna Mulungu, lekani kudembuka kucikwanirisa—Iye nkhabe kukomerwa na mapswiru. Kwanirisani pire pidapikira imwe. 5Mphyadidi kukhonda kupikira kupiringana kupikira mbukhonda kucikwanirisa. 6Lekani mulomo wanu kukucitisani kudawa, nee kupanga nthumwa kuti ikhali cidodo. Thangwi yanji Mulungu asafunika kuipirwa na fala yanu, mbafudza basa ya manja anu? a a v6 Nthumwa ndi nyabasa wa templo peno nyantsembe adatambira na kulemba pipikiro m'mbuto mwa Mulungu. 7Thangwi mu ndoto zizinji na mafala mazinji muli nkhundzi wakupita mwakucimbiza. Natenepa gopani Mulungu.
Kuthabusa na Phindu ya Dziko
8Mungaona anyakusauka mbakuthabuswa, na ciyeruziro cakulungama na kulungama mbapyakupwazwa m'dziko, lekani kudzumatirwa—ntsogoleri m'bodzi asaonerwa na unango wankulu kupiringana iye, na anango akulu kakamwe asaima pa iwo. 9Mbwenye phindu ya dziko ndi ya anthu onsene; ngakhala mambo asatumikirwa na munda.
10Ule anafuna kobiri nkhabe kukhuta nayo; ule anafuna upfumi nkhabe kukhutiswa na phindu yace. Pyenepi pontho ndi pyakupita mwakucimbiza. 11Upfumi ungakula, asawanjikambo ale anaudya—mphindu yanji ya mwenekaco kusiyapo kuuona na maso ace basi?
12Kugona kwa nyabasa ndi kwakutapira, angadya pang'ono peno pizinji; mbwenye kudzala kwa mpfumi nkhabe kuntawirisa kugona.
13Ndaona cakuipa cakuwawa ntima pantsi pa dzuwa: upfumi unakoyiwa na mwenekaco, mbaubweresera iye nyatwa. 14Upfumi unowu wataika mu malonda akuipa, na pidabala iye mwana, nkhabe cinthu cidasala toera kumusiyira iye. 15Ninga mudabwera iye m'mimba mwa mai wace, anabwerera wakukhundu, mbaenda ninga mudabwera iye, mbakhonda kukwata cinthu mu basa yace toera kuphata m'manja mwace. 16Pyenepi pontho ndi cakuipa cakuwawa: ninga mudabwera iye, ndi muna mwenda iye. Asaphindulanji mukuphatira basa thangwi ya mphepo? 17Ntsiku zace zonsene asadya mu cidima, na kutsukwala kukulu, matenda, na ukali.
18Pyenepi ndapiona: mphyadidi na mphyakuthema kudya, kumwa, na kuona pyadidi mu basa yonsene inaphata munthu pantsi pa dzuwa mu ntsiku zace zakucepa za umaso unampasa Mulungu—thangwi penepo ndi gawo yace. 19Pontho, Mulungu angapasa munthu upfumi, mpfuma, na mphambvu toera kupikomerwa, toera kutambira gawo yace na kugumana kutsandzaya mu basa yace—penepo ndi muoni wa Mulungu. 20Iye nkhabe kukumbuka kazinji ntsiku za umaso wace, thangwi Mulungu asamphatisa basa na kutsandzaya kwa ntima wace.
