Nganā Khavai Rānganailu
Varivarawui shimli ngathāmhai kazat, tuishi kazat mangahan; nawui tui kakhane kakhaluiya kala kasāmkhami hi ngaphāmluiya. Ngasen ngachamkhaluiya hi kathui mangahan, ngaraisang hi ot kangaya kakhaneli kharāluiya, kala na kharakha kachida khale mangasāmna khala kazatluiya. Na otwui kakhaphakha kaji kasāmkhangai hi Varivarawui kharakhami.
5 1Vare shimli zang tharan nawui pheikār ngasharlu. Mangkhama̱wui pha̱kaphayā chigat khavai maningla, nganā khavai rānganailu; kaja athumna makaphā sālikhala kaji matheimana. 2Nawui khamor mazathaolu, kala nawui ning Varewui mangāli khamatui khavai mathāk ngasakalu; kaja Vare kazingramli lei, nava okathuili lei, chieina nawui tui kateokha hānglu. 3Kaja mang hi ot kachungkhawui eina kharāna, kala mangkhama̱wui akhon tui kachungkhawui eina kharāna. 4Nana Vareli tuingashit sā tharan, chi mikhavai mahuinganongalu; kaja ana mangkhama̱bingli maleishimana. Nawui ngashit kahai chi milu. 5Tuingashit sāda maungshung kajiwui vanga, tuingashit masāla phāmei. 6Nawui khamorna nali morei sā ngasak khavai masaalu, kala paomeli 'hi khayonna' da mahānglu. Khisāda Varena nawui akhonla malungvātta nawui pāng eina sākakhui chi sashimānrakhala? a a v6 Paome hi khorumshimwui akhavā lah pāngmon, Varewui vang eina tuingashit khuisangda kapisangmi chi ana. 7Kaja mang kachungkha kala tui kachungkhali arema lei. Chiwui vang eina Vareli ngacheelu.
Rekakharek kala Ngaleiwui Tongkazā
8Nathumna kachāma mili rekakharek sā, kala ngaleili mashun kala khamashung khangarong kahai chi theiakha, matakhak kahai masaalu; kaja akhavā akhali juimei akhana yangmi, kala juimeibingna athumtungli nganinga. 9Chithālala ngaleiwui tongkazā hi mi saikorawui vangna; awungalila luina otram ngatha̱mi.
10Lupāli khangama mina khikha mashapmana; lan leishi mina heiun mashapmana. Hila aremana. 11Lan mavāt tharan, chi kazābingla mavāt; akhavāli amik eina yangchinga kajiwui vang tangda, khi tongzā leikhala?
12Ana kateokha zālala kachungkha zālala, ot kasā miwui pikakhui shima; kha kashānga miwui kachungkha china ali pi khavai makhami.
13Ina okathuili kachot khayang makaphā akha theihaira: akhavāna kayonching lan, awui vang kachot khavaina. 14Chi lan makaphā ot akhali shimānhaowa, kala ana naomayara akha fathuida, ali horhai khavai khikha maleithuwa. 15Ava̱va̱wui naopamwui eina kharā thada, asāmsai eina latunga; kharā thada zatra, awui ngalangkazār eina apāngli khuivai khavai khikha makhuimara. 16Hila kakhā makaphā akhana: ana kharā thada, chithāda zatra. Masiwui vang khanangda khi tongzā leikhala? 17Awui mirin peida malung vātkhangasak kachungkha, kazāt kala malungvāt eina ana tangkhamangli zāra.
18Hi ina theihaira: Varena ali khami mirin atam kasha̱kha peida, okathuili mina ngalang zārda ot kasā saikorali phākashak, phākazā kala kaphā theikhui hi kaphā kala phamei; kaja chi ali yarkahaina. 19Kala, Varena mi akhali lan, sha̱kei kala chi singlaga ringphākhui khavai pangshap mida, awui yar khuisangda kala awui ngalangkazārli khamathān samphangda—hi Varewui lemmetna. 20Ana awui mirin atambing chi kateokhamāng phaningungra, kaja Varena awui ningwui khamathān eina ali ngalang zārkhavai ngasaka.
