ንምስማዕ ቅረብ

ንምዝራብ ዘይኮነ ንምስማዕ ናብ ቤት እግዚኣብሄር ኪድ፤ ቃላትካ ውሑድ ይኹን፥ ነቲ ዝተመባፃዕካዮ ድማ ፈፅም። ገንዘብ ምፍቃር ከቶ ኣየፅግብን፥ ሃብቲ ብሓደ ሕማቕ ንግዲ ክጠፍእ ይኽእል፥ ከምቲ ዝመፃእካ ድማ ጥራሕካ ትኸይድ። ካብ ዕዮኻ ብፅሒትካ ምሕጓስ ውህብቶ እግዚኣብሄር እዩ።

ምዕራፍ 5።

ናብ ቤት እግዚኣብሄር ክትኣቱ እንተለኻ፥ ኣካይዳኻ ሓሉ። መስዋእቲ ዓያሹ ንምቕራብ ዘይኮነስ፥ ንምስማዕ ቅረብ፤ ንሳቶም ክፉእ ይገብሩ ምህላዎም ኣይፈልጡን እዮም። ኣፍካ ኣይተቕልጥፍ፥ ልብኻ ድማ ኣብ ቅድሚ እግዚኣብሄር ንምዝራብ ኣይተሃወኽ፤ እግዚኣብሄር ኣብ ሰማይ እዩ፥ ንስኻ ድማ ኣብ ምድሪ ኢኻ እሞ፥ ቃላትካ ውሑድ ይኹን። ሕልሚ ካብ ብዙሕ ዕዮ፥ ድምፂ ዓሻ ድማ ካብ ብዙሕ ዘረባ ይመፅእ እዩ። ንእግዚኣብሄር መብፅዓ ምስ ተመባፃዕኻ፥ ብዓያሹ ባህ ኣይብሎን እዩ እሞ፥ ንምፍፃም ኣይትደንጒ። ነቲ ዝተመባፃዕኻዮ ፈፅም። መብፅዓ ተመቢፅካ ኻብ ዘይምፍፃም፥ ዘይምምባፅዕ ይሐይሽ። ኣፍካ ኣብ ሓጢኣት ኣየእትወካ፤ ነቲ መልእኽተኛ ድማ “ጌጋ እዩ ነይሩ” ኣይትበሎ። እግዚኣብሄር ስለምንታይ ብድምፅኻ ተቘጢዑ፥ ንስራሕ ኢድካ የጥፍኦ? ^a ኣብ ብዙሕ ሕልምን ብዙሕ ዘረባን ጊዜያዊ ከንቱነት ኣሎ። ስለዙይ ንእግዚኣብሄር ፍራሕ።

ግፍዕን ረብሓ እታ ምድርን

ኣብ ሓደ ኣውራጃ ድኻ ክግፋዕ፥ ፍርድን ፅድቅን ድማ ክጥሓስ እንተ ርኢኻ፥ ኣይትገረም፤ ልዕሊ ሓደ ሹመኛ ዝለዓለ ይሕልዎ፥ ልዕሊ እዚኣቶም ድማ ዝለዓሉ ደው ኢሎም ኣለዉ። ረብሓ እታ ምድሪ ግና ንኹሉ እዩ፤ ንጉስ እኳ ብግራት ይግልገል።

ገንዘብ ዘፍቅር ኣይፀግብን፤ ሃብቲ ዘፍቅር ድማ ብኣታዊ ኣይፀግብን። እዙይውን ጊዜያዊ እዩ። ሃብቲ እናበዝሐ፥ እቶም ዝበልዕዎ ድማ ይበዝሑ፤ ንበዓል ዋናኡ፥ ብዓይኑ ካብ ምርኣይ ብዘይካ፥ እንታይ ረብሓ ኣለዎ?

ድቃስ ሰራሕተኛ፥ ሒደት ኮነ ብዙሕ እንተ በልዐ፥ ጥዑም እዩ፤ ፅጋብ እቲ ሃብታም ግና ክድቅስ ኣይሓድጎን።

ኣብ ትሕቲ ፀሓይ ዘሕዝን ክፉእ ነገር ርኣኹ፦ ሃብቲ ብዋናኡ ተዓቂቡ ንጉድኣቱ ኾይኑ። እቲ ሃብቲ ድማ ብሕማቕ ንግዲ ጠፍአ፤ ወዲ ምስ ወለደ ኸዓ፥ ዝገድፈሉ ገለ እኳ ኣይተረፎን። ካብ ማህፀን ኣዲኡ ኸም ዝመፀ፥ ጥራሑ ይምለስ፤ ከምቲ ዝመፀ ይኸይድ፥ ካብ ፃዕሪ ድማ ብኢዱ ዝማላእ ገለ እኳ ኣይወስድን። እዙይውን መሪር ክፉእ ነገር እዩ፦ ከምቲ ዝመፀ፥ ከምኡ ይኸይድ። ንንፋስ ኢሉ ካብ ምድካሙ እንታይ ይረብሕ? ኵሉ መዓልቲታት ህይወቱ ብፀልማት ይበልዕ፥ ብብዙሕ ጭንቀትን ሕማምን ቍጥዐን።

እዙይ ርኣኹ፦ ኣብ ትሕቲ ፀሓይ ኣብቲ ዝፅዕረሉ ኵሉ ፃዕሪ፥ ምብላዕ፥ ምስታይ፥ ፅቡቕ ምርኣይን፥ በተን እግዚኣብሄር ዝህቦ ውሑዳት መዓልቲታት ህይወት፥ ፅቡቕን ዝግባእ እዩ፤ ግደ ሰብ እዙይ እዩ እሞ። ከምኡ ድማ፥ እግዚኣብሄር ንሓደ ሰብ ሃብትን ጥሪትን እንተ ሃቦ፥ ክሕጎሰሉ ድማ ስልጣን እንተ ሃቦ፥ ግደ ክቕበል፥ ብፃዕሪ ድማ ክሕጎስ፥ እዙይ ውህበት እግዚኣብሄር እዩ። እግዚኣብሄር ብሓጐስ ልቡ ይሕዝ ስለ ዘሎ፥ መዓልቲታት ህይወቱ ብዙሕ ኣይዝክርን እዩ።