ከቶ ዘይፀግብ
ሓደ ሰብ ሃብትን ክብረትን ሚእቲ ውሉድን ክህልዎ ይኽእል፥ ካብኡ ገለ ኽፍሊ ኽበልዕ ግና ዘይተፈቕደሉ፤ እቲ መምህር ምዉት ኮይኑ ዝተወለደ ህፃን ካብኡ ኣዝዩ ዝበለፀ ዕረፍቲ ኣለዎ ይብል። ነፍሲ ኸቶ ኣይትፀግብን፥ ጥበብ ዝኾነ ረብሓ ኣይገዝእን፥ ድሕሪኡ እንታይ ከም ዝስዕብ ዝፈልጥ ከዓ የለን።
6 1ኣብ ትሕቲ ፀሓይ ዝረአኽዎ ክፉእ ኣሎ፥ ኣብ ልዕሊ ሰብ ከዓ ኸቢድ እዩ፦ 2እግዚኣብሄር ንሓደ ሰብ ጥሪትን ሃብትን ክብረትን ዝህቦ፥ ነፍሱ ኻብ እትደልዮ ኸዓ ዘይጎድሎ፥ እግዚኣብሄር ግና ካብኡ ኽበልዕ ዘየፍቀደሉ፥ ጓና ደኣ ኣብ ክንድኡ ዝበልዖ እዩ። እዙይ ከንቱን ዘሕዝን ሕማምን እዩ።
3ሓደ ሰብ ሚእቲ ውሉድ እንተ ወለደ፥ ብዙሕ ዓመታትውን እንተ ነበረ፥ ዕድሚኡ ኽንደይ ይንዋሕ ብዘየገድስ፥ ነፍሱ ግና ብፅቡቕ ነገር እንተ ዘይፀገበት፥ ንሱ ኸዓ እንተ ዘይተቐበረ፥ ካብኡ ምዉት ኮይኑ ዝተወልደ ህፃን ይሐይሽ እብል ኣለኹ። 4ብኸንቱ ይመፅእ፥ ናብ ፀልማት ድማ ይኸይድ፤ ስሙ ኸዓ ብፀልማት ይኽደን። 5ንፀሓይ እኳ እንተ ዘይረአየ፥ ገለ እኳ እንተ ዘይፈለጠ፥ ካብቲ ሰብ እቱይ ዝበለፀ ዕረፍቲ ኣለዎ። 6ሽሕ ዓመት ክልተ ሻዕ እኳ እንተ ነበረ፥ ፅቡቕ ከዓ ኸቶ እንተ ዘይተሓጎሰ፥ ኵሉ ናብ ሓደ ቦታ ኣይከይድንዶ? 7ኵሉ ፃዕሪ ሰብ ንኣፉ እዩ፥ ነፍሱ ግና ከቶ ኣይትፀግብን። 8እቲ ጠቢብ ካብቲ ዓሻ እንታይ ይበልፅ? እቲ ድኻ ኣብ ቅድሚ ሰብ ከመይ ኢሉ ኸም ዝመላለስ ብምፍላጥ እንታይ ይረክብ? 9ካብ ዝንባለ ትምኒት፥ ርእየት ኣዒንቲ ይሐይሽ። እዙይውን ከንቱ እዩ፥ ንፋስ ምስዓብ ከዓ እዩ። 10ዘሎ ዅሉ ቕድሚ ሕዚ ተሰምዩ እዩ፥ ሰብ እንታይ ምዃኑውን ይፍለጥ እዩ፤ ካብኡ ምስ ዝሕይል ድማ ክማጎት ኣይክእልን እዩ።
11ቃላት እናበዝሐ እናኸደ፥ ከንቱነት እናበዝሐ ይኸይድ፥ ንሰብ ከዓ እንታይ ይጠቕሞ? 12ኣብተን ከም ፅላሎት ዝሓልፍ ውሑዳት መዓልቲታት ናይ ከንቱ ህይወቱ፥ ንሰብ እንታይ ፅቡቕ ከም ዝኾኖ ዚፈልጥ መን ኣሎ? ድሕሪኡ ኣብ ትሕቲ ፀሓይ እንታይ ከም ዝኸውን ዚነግሮ መንከ ኣሎ?
