Ladangkei Senyühshem Akibü
Müt cheei nyaksinam, nyenhang, hoba shousi saongao langsikei tokei kho shaula athounoulonga; shatsinyat cheei hao toje haian natenbü yaangbü hapda dogo Jongsakbouei lauda. Müh kho ladangkei asamlabü, songsihonei ai pailet akuda, hoba phaia ai longlabü kho aoeikei aditenlabü.
6 1Chanyu phanga ngei hapbü amaibü che kia, hoba kho müt thüka kaangan apda: 2Mühghaüei müt che la nyaksinam, keibü hoba nyensang nyenhang kuda, hoba jembü soushou mangsühbü aieikei amühlabü—lausikei Mühghaüei hao to kho shaula athounou; aeiko yenbou cheei kho shauda. Ho longche shangabü, nasetshang kubü shatsinyat che ki.
3Müt cheei shousi shuong saongao bukkulonga, hoba po juong langkei kialonga—haoeibü salang lalokche kisikei—lausikei jembü soushou maibü peisileiei asenyühshemlonga, hoba hao akhünlonga, ngei lauda, hao toje haian bukbü na che maibou ki. 4Kho longche shanga louakei, hoba nakthüh to hauda; nakthühei kho nameibü khuilepda. 5Kho chanyu ahapsikei, ayingsi ai ong angesikei, kho ho müt toje aei hakso hapda. 6Hao po hajar nyibou langkei kisikei, maibü ladangkei aolinko kialonga, pendou kho kaoen chetham to ahaulep lo? 7Müteibü haujembü pendou jembü sembung shanga ki, lausikei jembü müh ladangkei asamlabü. 8Songsido kibü müt kho ngoubü müt toje ai pailetla? Shalebü mütei müt thedanga aila lela dogo ngean ai pailetla? 9Mangsühbü lam maan satbü toje nyekei hapbü maibou ki. Ho khokei longche shangabü, yei chasembü ki. 10Ai ong kibü pendou shangla nyenan apa, hoba müt ai kibü kho ngean apa; hoba hao himshuong toje hau kibou yoa lemen kümla athük.
11Ngüh juongan loulaje, pendou aei longche shangabü kilabü, hoba kho müt aola ai pailetla? 12Aishanga müt la jembü longche shanga langkei salang shisho ka, yemkao tegü dankhümlabü ho, ai maibü kho ao ngeda? Aishanga hao phaia chanyu phanga ai loushadlabü kho ao hao to lenla thükkei?
