Katang Ningyāng Maung
Mi kakhanena ngaraisang, khamathang kala nao shakhane leiya kha, hi kachiva kasāmkhangai kaji eina mangaya; Ngasāmmina chi, thikhami eina pharākhami nao kakhanena ali kahai eina kachāngra. Kasāmkhami ngasuiya kathui mangahan, ngathei kaji eina kakhanglak mangasa, kala thuili kharei khale kachiva mangathei.
6 1Okathuili ina makaphā akha theihaira, kala chi mikumoli ritlaksai: 2Varena mi akhali lan, sinā lupā, kala khangamkharei mi, awui wuklung ningkachāng khavāt akhala maleimana; chithālala Varena ali chi shai khavai mapomana; kha kha̱mi akhana chi shai. Hi aremana, kala kazāt hi miserhaira.
3Mi akhana nao shākha pharāda, zingkum kasāngkha okthuilaga, awui mirin karankha longlala, kha awui wuklung kaphāli ningyāng maunglakla, kala ali chifa khavai maleila, pharākatā mathā akha awui vanga phāmei da ina hānga. 4Chi arema eina kharāda tangkhamangli zata; kala tangkhamangna aming fakhammi. 5Chi zimik matheilala, kala khikhala matheilala, chithālala chiya mipā chiwui vanga ngasāmkakhui phāmei. 6Ana zingkum 1,000 khanishida ringlala, kaphā chi ringphā masamphangla, saikora apam akhalila vāra maningmala? 7Mikumowui ngalangkazār saikora awui khamorwui vangna, chithālala awui yāng katang masamphangmana. 8Chithākha thangkhamana mangkhama̱ china khi tongkaza leikhala? Kala kachāma mina kateibingwui mangāli acham-aram kasā chi theilaga khi tongzākhala? 9Mikwui theikahai chi ningkachāng ma̱zatlakha china phāmei. Hila aremana, masili khangahomna. 10Khalei chi saikora arui aming phokmi kahaira, kala mi hi khi ngasāra kaji theisera; kala a china pangmei chi eina reimei masārarmana.
11Tui kachungkha lei tharan, arema mataisang ngasaka, chithākha chi mikumowui kānkhanā khi leikhala? 12Kaja khaya̱ thāda kanthuimamān, arema mirinwui kasha̱khamang atamli, mikumowui vang khi kaphākhala kaji khipāna theira? Kaja awui thili okathuili khirakhala kaji khipāna ali hāngshapra?
