Megu Kemoyo
Mipü cene, ceneko, mu thechu therho ba sheri, Jihovae pü süo menyü thi mhapühri tsomo; Kemethae poti, kesapü münü nu pü ceri veku relüyo. Menyü taküta mote, mhashee kedipü ri kemeve mote, mu thüma la dipü vorito sopü ri sekemo.
6 1Na phekhrolü I kengo mesakemo thi bazo, mu süo thüma la kümüzhie kekro tazo: 2Jihovae mipüce cene, ceneko, mu thechu therho tsü, pü menyü thi mhapühri tsomo—vele Jihovae süo celü püh ti thisü mo tayo; süo rüsomipü ti süyo. Hio kemezhe zo, hesheherü küthi zo.
3Mipüe ne krapü münü süde tütse kekro rhüba zori—pü rhühta the kelhoupü sheri—vele pü khri mhaphrü lü megu moze, mu pü khrüva sheri mo lize, kesapü münü nu süo ceri veku zo, I poto. 4Süo kemhülü vori, de zübülü ta; zübü pü za netho süyo. 5Süo na ngo mote, mhapühri se mo sheri, thüma süo ceri kerelü thethi veku bate. 6Pü tütse 1,000 künao dopü rhüba, mhaphrü kadayi mo sheri, metü sameji kedelü ta mome? 7Thüma kümüzhie metü pü ta la zo, vele pü menyü megu tamo. 8Mhashee künyomi ceri kemeve kedipü ba? Küdimie thüma mhü lü mha keyi seo lü kepra kedipü ngo ba? 9Menyü taküta ceri mhü ngo veku. Hio sheri kemezhe zo, tükhra kropüh zo. 10Mha kehopühri ba metü za metü kha kesü, mu thüma dipü bitü se kebazo; mu pü ceri keku kuku pü zü pü kelakre thiyi tayomo.
11Dzüpo kekro kelüce, kemezhe sheri neku kekro bazo, mu süo thümace dipü kümüve ngo ba? 12Kekrelamori, keso bitü püthüvo pü kemezhe rhühta tüso tsalü, thüma la dipü mhaphrü bate sopüe se ba? Kekrelamori, pü asa na phekhrolü dipü meta sheri ukoce sopüe po süyi ve?
