Ecclesiastes 6

6 ¹There be one evil wey I don see under di sun, and e dey heavy well-well for mankind: ²One man wey God give wealth, riches, and honor, so dat notin wey im soul want dey miss—but God no let am chop from am; na stranger come chop am instead. Dis one na notin wey dey pass like vapor, one miserable sickness.

³If man born hundred pikin and live plenty years—no matter how long im life be—but im soul no satisfy with good tins, and dem no even bury am, I dey talk say pikin wey die for belle better pass am. ⁴E dey come inside vapor and e dey go inside darkness; darkness cover im name. ⁵Even doh e never see di sun or know anytin, e get rest pass dat man. ⁶Even if e live thousand years two times over without ever enjoy good tin, no be di same place everybody dey go? ⁷All di sweat wey person dey sweat na for im mouth, but im appetite no dey ever satisfy. ⁸Wetin di wise man get pass di foolish man? Wetin poor person dey gain by knowing how to carry imsef for front of oda people? ⁹Wetin eye dey see better pass wetin desire dey waka find. Dis one too na notin wey dey pass like vapor, na to dey chase wind. ¹⁰Whatever dey exist, dem don already name am, and wetin man be, dem sabi am; and e no fit argue with di one wey strong pass am.

¹¹Di more words wey plenty, na di more everytin dey pass like vapor, and how dat one take profit anybody? ¹²Because who sabi wetin good for person for di small days of dia life wey dey pass like vapor, wey dey go like shadow? Because who fit tell dem wetin go happen after dem under di sun?