Ringpha Ngasakme Maleila Chāra̱
Ngasāmmina ngasakhami hi kharāmphaiba mi malei eina kathei, kala hingkhami kaji eina thikhami hi kahai kharāngli chiya. Ngathakhangai ngasāmna ot kahai kasāya. Kha mi kani hi kakhane wui ngaphāmli kharāngli: nathum kakhanglui kathuili kathakaluiya, nathum kasāngkhaluiya, ngasāmluiya. Kachang ngachamkhami kakhane khale thiyi eina ngachāmkhalakluiya.
4 1Latluida ina yangda, okathuili kasāsā rekakharek saikora theihaira: rekharek kahaiabing chāra̱ longa, kala athumli ringpha ngasakmi khipānakha maleimana; athumli rekakharekabingna pangshap singtita, kha aruila ringpha ngasakmi maleimana. 2Chiwui vang eina, achā thikahaibing chi, aruila ringda lei kharingabingwui vanga ringphamei da ina hānga. 3Aruila mapharārangsai mi, okathuili kasāsā makaphā chi matheirangsai mi chi, khaniniwui vanga phāmei. 4Ngalangkazār kala kathem saikora hi mi akhana awui khongnainaoli yuikashiwui eina rāsai da ina theihaira. Hila aremana, kala masili khangahomna. 5Mangkhama̱na apāng napshānda a khalatta shimān ngasaka. 6Ngalangkazār kala masili khangahom eina panghom khaniwui vanga, chingri eina panghom akha phāmei.
7Latluida ina okathuili arema kachikathā akha theihaira:
8Khavāknao maleila, naomayara lah achinā maleila, mi akha mamang lei; awui ngalangkazār khanao maleimana, kha awui mik lanna kapen mavailakmana. "Khipāwui vang ina ot sāda, i khalattali kaphā chi maleikhala?" da ana ngahāna. Hila khaksuina, makaphā otna.
9Akhawui vanga khani phāmei, khikhalajila athumwui ngalangkazārwui eina kaphā tongzā samkaphanga. 10Akha tazangakha, khangatei akhana ali khāngmathota. Kha akha mamang tāzangda ali khāngkhame maleiakha, chikathā mili lukhamashan phālaka! 11Chithāda eina, mi khani ngarumlaga pivāakha, athum lumra. Kha akha mamang kathada lumshaprakhala? 12Akha mamang chi yuikhuihaira; khani chiya ngasungshapra. Khara̱ kathum eina napshānda sākahai chi ngalāngda maza̱mana.
Thangkhama Yaronnao kala Mangkhama̱ Awunga
13Aruila hāngkachithei khuisang matheiluime, kasara mangkhama̱ awungawui vanga, kachāma thangkhama yaronnao phāmei. 14Yaronnao chi phātopwui eina mung khavai kharāpaira, lah chikathā wungramtungli kachāma sāda pharāhaira. 15Okathuili yaothuira khalei kharingabing saikora chi, awungawui pam kakā yaronnao chi shurda leikahai ina theihaira. 16Awui mangāli rākahai mibing saikora chi mashing makhuila. Kha khaleilaga rākahaibing chiya ali ningyāng maungmana. Hila aremana, kala masili khangahomna.
