傳道書 4

4 ¹我又再觀察，睇見日光之下一切嘅欺壓：受欺壓嘅人喊個唔停，卻冇人安慰佢哋；權力喺欺壓佢哋嘅人手上，仍然冇人安慰佢哋。 ²所以我斷定：已經死咗嘅人，比起仲生存嘅人更加有福。 ³但係比呢兩種人更好嘅，就係仲未出世、未曾見過日光之下所行嘅惡嘅人。 ⁴我又睇見，一切嘅勞碌同一切嘅本事，原來都係出於人對鄰舍嘅嫉妒。呢樣都係虛空，好似捕風噉。 ⁵愚昧人抱住雙手， 最終害咗自己。 ⁶得一把、心裏平靜， 好過得兩把、勞勞碌碌噉去捕風。

⁷我又睇見日光之下有一樣虛空嘅事：

⁸有個人孤孤單單，冇同伴，冇仔又冇兄弟；佢嘅勞碌冇止境，佢對眼永遠都唔滿足於財富。佢問：「我究竟係為邊個噉樣做嘢，令自己得唔到享受呢？」呢樣都係虛空，係一件苦差。

⁹兩個人好過一個人，因為佢哋一齊勞碌會有好嘅回報： ¹⁰如果一個跌倒，另一個可以扶佢起身。但係孤身跌倒、冇人扶佢起身嘅，就真係慘啦。 ¹¹再者，兩個人瞓埋一齊就會暖；但係一個人點樣先至暖得起呢？ ¹²一個人會被人制伏，兩個人就抵擋得住。三股合成嘅繩，唔容易斷。

有智慧嘅後生仔同愚昧嘅王

¹³貧窮但有智慧嘅後生仔，好過年老又愚昧、唔再識得聽勸告嘅王。 ¹⁴呢個後生仔或者係由監獄出嚟做王，又或者係喺自己嘅國度裏面出身貧寒。 ¹⁵我睇見日光之下一切活動嘅人,都跟隨呢個後生仔——就係繼承王位嘅人。 ¹⁶喺佢之前嘅眾民多到數唔盡；然而之後嘅人卻唔喜歡佢。呢樣都係虛空，好似捕風噉。