Iinyembezi EzingenaMthuthuzeli

UMfundisi ubona ucudiso olungenamthuthuzeli, athi abafileyo banoyolo ngaphezu kwabaphilayo. Umona uqhuba uninzi lomsebenzi. Kodwa ababini balungile ngaphezu komnye: kukho okuphakamisayo xa usiwa, akufudumeze, ame nawe. Nkqu nokumkani othandwayo kamsinya akasafunwa.

Isahluko 4.

Ndabuya ndakhangela, ndakubona konke ukucudiswa okwenziwa phantsi kwelanga: abacudisiweyo babenezinyembezi, kungekho bani ubathuthuzelayo; abacudisi babo babenamandla, kwaye kungekho mthuthuzeli. Ngoko ndathi abafileyo, sebeselefile, banoyolo ngaphezu kwabaphilileyo, abasaphilileyo. Olunga ngaphezu kwabo bobabini ngulowo ungekazalwa, ongakubonanga ububi obenziwa phantsi kwelanga. Ndabona konke ukusebenza nabo bonke ubungcibi kuphuma emoneni ammonela ngawo ummelwane ummelwane wakhe. Nako oku kuyinkohlakalo, kukusukela umoya. Isinyabi siyazisonga izandla zaso, sizonakalise ngokwaso. Olunga unobubele isandla esinye esizele kunesibini esizele ngokubulaleka nokusukela umoya.

Ndabuya ndabona into eyinkohlakalo phantsi kwelanga:

Indoda ehleli yodwa, ingenamlingane, ingenanyana nangomnakwayo; ukusebenza kwayo akunasiphelo, kodwa amehlo ayo akazali butyebi. Ithi: “Ndisebenzela bani na, ndizincisa okulungileyo?” Nako oku ngumoya, ngumsebenzi ombi.

Ababini balungile ngaphezu komnye, ngokuba banomvuzo olungileyo ngokusebenza kwabo: Ukuba omnye uyawa, omnye uyamphakamisa. Kodwa yeha kulowo uwa eyedwa, kungekho bani umphakamisayo. Kananjalo, ukuba abantu ababini balala kunye, bayafudumala. Kodwa angafudumala njani na omnye yedwa? Omnye yedwa angeyiswa; ababini bangema. Nomtya oneentsontelo ezintathu awaphuki ngokukhawuleza.

Umfana Olumkileyo Nokumkani Osisinyabi

Ulungile umfana olihlwempu, olumkileyo, ngaphezu kokumkani omdala, osisinyabi, ongaseyazi ukuthabatha isilumkiso. Umfana lowo angaba ephume entolongweni waya kubusa, nokuba uzalelwe ebuhlwempwini kuloo bukumkani. Ndabona bonke abaphilileyo abahamba phantsi kwelanga belandela loo mfana, umlandeli wokumkani. Babengenakubalwa bonke abantu abaphambi kwakhe. Kodwa abeza emva kwakhe abavuyiswanga nguye. Nako oku kuyinkohlakalo, kukusukela umoya.