Oniwaasu 4

4 ¹Mo tún wò, mo sì rí gbogbo ìninilára tí ń ṣẹlẹ̀ lábẹ́ oòrùn: àwọn tí a ń ni lára wà nínú ẹkún, kò sì sí ẹni tí ó tù wọ́n nínú; àwọn tí ń ni wọ́n lára ní agbára lọ́wọ́, síbẹ̀ kò sí olùtùnú. ²Nítorí náà, mo wí pé àwọn òkú tí ó ti kú ṣáájú ní ìdùnnú ju àwọn alààyè tí ó ṣì wà láàyè lọ. ³Ṣùgbọ́n ẹni tí a kò tí ì bí, tí kò tíì rí ibi tí a ń ṣe lábẹ́ oòrùn, sàn ju àwọn méjèèjì lọ. ⁴Mo sì rí i pé gbogbo làálàá àti ọgbọ́n iṣẹ́ máa ń wá láti inú ìlara tí aládùúgbò ẹni ń ní sí ẹnìkejì rẹ̀. Èyí pẹ̀lú jẹ́ ohun tí ń kọjá lọ, ìlépa afẹ́fẹ́. ⁵Òmùgọ̀ ka ọwọ́ rẹ̀ pọ̀, ó sì ba ara rẹ̀ jẹ́. ⁶Ẹ̀kúnwọ́ kan pẹ̀lú ìfọkànbalẹ̀ sàn ju ẹ̀kúnwọ́ méjì pẹ̀lú làálàá àti ìlépa afẹ́fẹ́ lọ.

⁷Mo tún rí ohun tí ń kọjá lọ lábẹ́ oòrùn:

⁸Ọkùnrin kan wà nìkan ṣoṣo, kò ní ẹnikẹ́ni, kò ní ọmọ tàbí arákùnrin; làálàá rẹ̀ kò ní òpin, síbẹ̀ ojú rẹ̀ kò kún fún ọrọ̀ láé. “Ta ni mo ń ṣe iṣẹ́ fún,” ni ó ń béèrè, “tí mo sì ń fi ohun rere du ara mi?” Èyí pẹ̀lú jẹ́ èémí lásán—iṣẹ́ búburú.

⁹Ẹni méjì sàn ju ẹnìkan lọ, nítorí wọ́n ní èrè rere fún làálàá wọn: ¹⁰Bí ọ̀kan bá ṣubú, ẹnìkejì rẹ̀ yóò gbé e dìde. Ṣùgbọ́n ìkáàánú ni fún ẹni tí ó ṣubú nìkan, tí kò sí ẹni tí yóò gbé e dìde. ¹¹Bẹ́ẹ̀ pẹ̀lú, bí ẹni méjì bá sùn pọ̀, ara wọn yóò móoru. Ṣùgbọ́n báwo ni ẹnìkan ṣe lè móoru nìkan? ¹²A lè ṣẹ́gun ẹni tí ó dá wà nìkan; ṣùgbọ́n ẹni méjì lè kọjú ìjà. Okùn tí a fi okùn mẹ́ta pọ̀ kì í já kíákíá.

Ọ̀dọ́mọdé Ọlọ́gbọ́n àti Ọba Òmùgọ̀

¹³Ọ̀dọ́mọdé tálákà tí ó gbọ́n sàn ju ọba àgbàlagbà òmùgọ̀ tí kò mọ ọ̀nà láti gba ìkìlọ̀ mọ́ lọ. ¹⁴Ọ̀dọ́mọdé náà lè ti inú ọgbà ẹ̀wọ̀n jáde wá láti jẹ ọba, tàbí kí a bí i ní tálákà nínú ìjọba kan náà. ¹⁵Mo rí gbogbo àwọn alààyè tí ń rìn kiri lábẹ́ oòrùn tí wọ́n ń tẹ̀lé ọ̀dọ́mọdé náà, arọ́pò ọba. ¹⁶Àìníye ni gbogbo àwọn ènìyàn tí ó wà ṣáájú rẹ̀. Síbẹ̀ àwọn tí ó dé lẹ́yìn kò ní inú dídùn sí i. Èyí pẹ̀lú jẹ́ ohun tí ń kọjá lọ, ìlépa afẹ́fẹ́.