Mon aram diya keu nathaka suku-pani
Sikhoi diya manuh dukh diya dikhe aru shanti diya kun bhi nai, aru jinda thaka khan pora mora khan bhal ase koi. Bisi kaam tu jolon pora he kore. Tinu ekjon pora dui jon bhal: giri jaile tuli dibole, garom rakhibole, ekhai thakibole manuh. Sob pora morom kora raja bhi joldi kun bhi nabisare.
4 1Aru moi arubi saise, aru surjo laga nichete howa sob atyachar dekhise: atyachar khai thaka khan suku-pani kori ase, aru tarkhan ke mon aram diya keu nai; tarkhan ke atyachar kora khan laga hath te takot thakise, kintu etiya bhi mon aram diya keu nai. 2Karne, agete mori juwa mora manuh khan ke, etiya bhi jinda thaka jivit manuh khan pora bisi khushi ase, eneka moi koise. 3Kintu duijon pora bhi bhal to, etiya tak jonom nohoa jon ase, kun pora surjo laga nichete kora biya kaam dekha nai. 4Moi dekhise je sob mehnat aru kushol kaam to ekjon pora dusra ekjon laga upor te irsha kora pora ahhe. Eitu bhi niswas nisina ase, hawa ke khedi kora kaam ase. 5Murkho pora tar laga hath khan joori loi kene nijor ke khotom kore. 6Mehnat aru hawa ke khedi kora logot te duita mutti pora, shanti logot te ek mutti he bhal ase.
7Aru moi surjo laga nichete niswas nisina ekta jinis dekhise:
8Ekjon manuh ekla ase, tar logote sathi nai, putro ya bhai bhi nai; tar laga mehnat tu khotom nai, kintu tar laga suku khan dhun-sompoti pora kitia bhi bhorta nohoi. “Moi kun karne kaam kori ase,” tai hudi ase, “aru nijor ke bhal jinis pora rukhai ase?” Eitu bhi ekta niswas ase—ekta biya kaam ase.
9Ekjon pora duijon he bhal ase, kilemane tarkhan laga mehnat pora bhal labh pai: 10Jodi ekjon giri jai, dusra jon pora tar ke uthai di bole pare. Kintu jun ekla thaki kene giri jai, aru tar ke uthai dibole keu nai, eneka manuh to hai dukhiya ase. 11Aru, jodi duijon eke logote ghumai, tarkhan gorom thakibo. Kintu ekjon pora ekla kineka gorom thakibo? 12Ekjon ekla thakile tar ke jiti lobo pare; kintu duijon pora rukhabo pare. Tinta taar pora bona ekta rusi joldi nabhange.
Buddhiman jawan aru murkho raja
13Kun bura murkho raja etiya aru chetawni luwa najane, tai pora ekjon gorib kintu buddhiman jawan he bhal ase. 14Hoi to hei jawan to raja hobole bondhi ghor pora ulai ahhise, ya tai hei rajyo bhitor te gorib hoi kene jonom hoise. 15Moi dekhise je surjo laga nichete phura-phuri kora sob jivit manuh khan hei jawan laga piche jaise, kun pora raja laga jaga lobo. 16Tar age te thaka sob manuh khan ginti koribo napara thakise. Kintu pichete aha khan tar logote khushi thaka nai. Eitu bhi niswas nisina ase, hawa ke khedi kora kaam ase.