Ot Saikorawui Atam
Kachiva hi chiwui kathakha leiya, pharā kala thikhami, ral kala ngasāmkhami, kala mi khale Varivarana sākhami kachiva hi mangathei, kaja a mi wui kharaluili kathui mangahan kachiva hi kasangli. Khamashung kaphungli kharāmi ngasāngli. Mi kala sa hi kharing kakhane eina hing kala thikhaphung kakhane ngasoda.
3 1Kaja ot saikorawui atam akha lei, kala kazingramwui azingli ot kachiva̱wui vang atam akha lei: 2pharā khavai atam akha, kala thi khavai atam akha; lingsang khavai atam akha, kala lingsang kahai chi phurshok khavai atam akha; 3shaothat khavai atam akha, kala raimi khavai atam akha; sākhai khavai atam akha, kala sākā khavai atam akha; 4chapa khavai atam akha, kala mana̱ khavai atam akha; chapngachā khavai atam akha, kala pheichak chak khavai atam akha; 5lunggui horhai khavai atam akha, kala lunggui rākazip khavai atam akha; hungrei khavai atam akha, kala hungrei makhavai atam akha; 6phā khavai atam akha, kala shimān khavai atam akha; singtit khavai atam akha, kala horhai khavai atam akha; 7latsho khavai atam akha, kala sem khavai atam akha; kasaikha pam khavai atam akha, kala hāng khavai atam akha; 8leishi khavai atam akha, kala yangkakharing khavai atam akha; raiwui vang atam akha, kala chingri kahaiwui vang atam akha.
9Ot kasā mina awui ngalangzār chiwui eina khi tongkakhui leikhala? 10Varena mibingli katong ngasak khavai mikahai ot chi ina theihaira. 11Ana ot saikora awui atamli khamathā sāngasakta, kala miwui wuklungli katang mavai kaji chi haimi. Chithālala Varena haokaphok eina khanao eina tangda sākahai chi khipānakha maphākhuirarmana. 12Athumwui vang ringlakha ringphākhui kala kaphā sā maningla kaphā katei maleimana da ina thei. 13Kala mi kachiva̱na phāshak, phazā kala awui ot kasā saikorali ringphākhui hi Varewui lemmetna. 14Varena sā saikora katang mavaila nganingchinga kaji ina thei; chili khikha ngarumsang masamphangmana, kala chi eina khikha khuithui masamphangmana. Mibingna awui mangāli khangachee khavai ana chi sākahaina. 15Ara leikahai chi arui leihaira, kala aja lei khavai chi arui leihaira; kala Varena kashamhaokahai chi phākhuira.
Mashunwui Apamli Makaphā Makhayā
16Kala ina okathuili theiluiya: bichar pamli makaphā lei, kala khamashung khangarong pamli makaphā lei. 17Ina iningli hānga: "Varena khangaronga kala makhayā chili bichar sāra, kaja apam chili ot saikora kala otsak saikorawui vang atam akha lei." 18Ina iningli hānga: "Varena mibingli tamyanga, chieina athumna kachichā sāyur maningla kaji theira." 19Mikumo kala sāyur angasut akhamanga: akha thi thada, khangatei akhala thi; athum khanini khaksui akhamanga. Mina sāyurli mataikhamei maleimana; kaja saikora aremana. 20Saikora apam akhamāngli vāra; saikora chifa eina kharāna, kala saikora chifali hanungra. 21Miwui manglā kajuili kaunika, kala sāyurwui manglā ngaleili katānika, kaji khipāna theikhala? 22Chieina miwui vang awui ot kasāli ringphākakhui chi lāngda khamathā kaji khikha maleimana da ina thei; kaja chi awui yarna. Kaja awui thili khi rāshoki kaji khipāna athumli chitheishapra?
