Oge Dị maka Ihe Ọbụla

Ihe niile nwere oge ya — ọmụmụ na ọnwụ, agha na udo — ọ dịghị onye pụrụ ịghọta ihe niile Chineke mere, ọ bụ ezie na o tinyere ebighị ebi nʼobi mmadụ. Nrụrụ aka nọ ebe ikpe ziri ezi kwesịrị ịnọ. Mmadụ na anụmanụ na-eku otu ume, na-ekerịtakwa otu ili.

Isi 3.

Ihe niile nwere oge ya, oge dịkwara ihe ọbụla nʼokpuru eluigwe: oge a na-amụ nwa, na oge ịnwụ anwụ; oge ịkụ ihe, na oge ihopu ihe a kụrụ akụ; oge igbu egbu, na oge ịgwọ ọrịa; oge ịkwada ihe, na oge iwuli ihe; oge ịkwa ákwá, na oge ịchị ọchị; oge iru ụjụ, na oge ịgba egwu; oge ịtụfu nkume, na oge ịchịkọta nkume; oge ịmakụ mmadụ, na oge ịhapụ ịmakụ mmadụ; oge ịchọ ihe, na oge ihufu ihe; oge ichekwa ihe, na oge ịtụfu ihe; oge ịdọwa ihe, na oge ịdụ ákwà; oge ịgba nkịtị, na oge ikwu okwu; oge ịhụ nʼanya, na oge ịkpọ asị; oge agha, na oge udo.

Gịnị bụ uru onye ọrụ na-enweta site nʼịdọgbu onwe ya nʼọrụ? Ahụla m ọrụ Chineke nyere ụmụ mmadụ ka ha nọrọ na-arụsi ọrụ ike. O mere ka ihe niile maa mma nʼoge ya, tinyekwa mgbe ebighị ebi nʼobi mmadụ—maọbụ, ọ dịghị onye pụrụ ịghọta ihe Chineke mere site na mmalite ruo na ọgwụgwụ. Amaara m na ọ dịghị ihe dị mma karịa ka ha ṅụrịa ndụ ma na-eme ezi ihe mgbe ha dị ndụ. Ọzọkwa, ka onye ọbụla rie, ṅụọ, chọtakwa afọ ojuju nʼọrụ ya niile—nke a bụ onyinye Chineke. Amaara m na ihe niile Chineke na-eme na-adịgide ruo mgbe ebighị ebi; o nweghị ihe a ga-agbakwunye, o nweghị ihe a ga-ewepụ. O mere ya ka ụmụ mmadụ tụọ egwu nʼihu ya. Ihe dị ugbu a adịlarị na mbụ, ihe ga-adịkwa adịlarị na mbụ; Chineke na-achọkwa ihe a chụpụrụ achụpụ.

Ajọ Omume nʼEbe Ikpe Ziri Ezi

Ahụkwara m nʼokpuru anyanwụ: ihe ọjọọ nʼebe ikpe, na ihe ọjọọ nʼebe ezi omume. Ekwuru m nʼobi m, sị: “Chineke ga-ekpe ndị ezi omume na ndị ajọ omume ikpe, nʼihi na oge dị maka ihe ọbụla na omume ọbụla, nʼebe ahụ.” Ekwuru m nʼobi m, sị: “Chineke na-anwale ụmụ mmadụ, ka ha wee hụ na ha bụ naanị anụmanụ.” Ụmụ mmadụ na anụmanụ nwere otu akara aka: dịka nke a si anwụ, otu a ka nke ọzọ si anwụ; ha abụọ nwere otu ume. Mmadụ enweghị uru karịrị anụmanụ—ihe niile bụ ikuku efu. Ihe niile na-aga nʼotu ebe; ihe niile sitere nʼaja, ihe niile na-alaghachikwa nʼaja. Onye maara ma mmụọ mmadụ ọ na-arịgo elu, ma mmụọ anụmanụ ọ na-arịda nʼime ala? Ya mere, ahụrụ m na ọ dịghị ihe dị mma karịa ka mmadụ ṅụrịa ọṅụ nʼọrụ ya, nʼihi na nke ahụ bụ oke ya. Nʼihi na onye pụrụ igosi ya ihe ga-abịa nʼazụ ya?