Hāshokme 2

2 ¹Iwui ningli ina hānga, "Rālu, ningyāng eina nali chāng tamyangra; kaphā chi ringphākhuilu." Kha hila arema sāhaowa. ²Khamana̱wui vang ina hānga, "Hi kapāna," kala ningyāngwui vang, "Hina khi ungshungmikhala?"

³Mikumobingna kazingram azingli athumwui mirin atam kateokha peida khi sāra kaji kaphā leikhala da theira eina tangda, iwui ning chi thangma eina ili thānmi lāngda, drakhāra̱ eina iwui phasā mathān ngasākhavai kala mangkhama̱ chi singtit khavai, iwui ningli ina ara̱yangkhui. ⁴Ina hakkhamei ot sai. Ina iwui vang shim sāmi kala drakhā yāmgui lingsang. ⁵Ina iwui vang yāmgui kala ngasāmphung sāmi, kala chitungli atheirong yur saikora lingsang. ⁶Kharkhangasak thingrong ngahong chili tara̱ chaikhavai, ina iwui vang ra̱khong sāmi. ⁷Ina mayarnao kala sha̱nao rao lokhui, kala shimli pharā rao ngarāla leisai. Iwui rida Jerusalemli khalei khipākhali reikhamei sha̱kei kala yao ngarā ina ngavai. ⁸Ina iwui vang lupā kala sinā, awungabing kala ngalei ngarāwui lan kazipkhui. Ina mayarnao kala sha̱nao laa kasābing, kala miwui ningyāng ungkhavai angashirva̱ kachungkhala samphanga. ⁹Chieina ina hakkhamei ngasāda, iwui rida Jerusalemli khalei saikorali reikhamei ngasāhaowa; kala iwui thangma ila ngasorashumhaowa. ¹⁰Iwui mik eina ningkachāng saikora ina masānhaimana, iwui ning eina khamathān khipākhala makhāmmana; kaja iwui ning chi iwui ot kasā saikorali ringphāhaowa, kala hi iwui ot saikorawui vang iwui sāman sāhaowa. ¹¹Chieina ina ipāngna sāhai ot saikora yangkhui, kala chi sākhavai ina khanang kahai ngalangkazār, kala saikora hi aremana, masili khangahomna; zinghamli khikha tongkazā maleimana.

Thangma kala Mangkhama̱

¹²Chieina ina thangma, kapā, kala mangkhama̱ machukkhui khavai ngareiunga. Kaja awungawui pamli nganingki kaje mina khi sāshapkhala? Sāngngarānda sāhaikasā chimānga. ¹³Kahorna tangkhamangli reikhamei kaji thāda, thangma chi mangkhama̱li reida tongkazā lei da ina thei. ¹⁴Thangma mina awui kuili mik lei, kha mangkhama̱na tangkhamangli zata. Chithālala athum saikorali ngaraikachā kalāshāt shokkahai kaji ina thei. ^a a v14 "Awui kuili mik lei" hi Hebrew tuiyurna: thangma mina achei-arei theingasakna. ¹⁵Chieina ina iwui ningli kahangva, "Mangkhama̱ shokkahai kalāshāt chi ilala shokra. Chithākha khisāda ina hakkhamei thangma ngasāhaokhala?" Chieina ina hila aremana da hānga. ¹⁶Thangma china mangkhama̱ thāda, longa phaningung ngasakmara; kharā atambing anini khanini malaihaira. Thangma china mangkhama̱ thāda thirakhala! ¹⁷Chieina ina mirin chi ningkachaihaowa, kaja zinghamli sākahai ot china ili wukhanang ngasaka; saikora hi aremana, masili khangahomna.

Kha̱mi Akhali Horhaikahai Ngalangkazār

¹⁸Ina okathuili iwui ngalangkazār saikora ningkachai, kaja iwui thili rākhavai mili chi horhaira. ¹⁹Ana thangkhama mi sārala lah mangkhama̱ sāra kaji khipāna theikhala? Chithālala okathuili iwui thangkhameina ngalangzārda ot kasā saikora chi ana shichinra. Hila aremana.

²⁰Chiwui vang eina okathuili ina ngalangzārda ot kasā saikorawui vang iwui ning khāsut mahai khavai horsanga. ²¹Mi akhana thangkhamei, awor kala kathem eina ot sāra, chithālala chiwui vang machishotlakha mi khangatei akhana ringphākhui khavai chi saikora horhaira. Hila aremana, kala makaphā kahaka akhana. ²²Mikumona okathuili awui ngalangkazār kala ningwui ngarar saikorawui eina khi tongzākhala? ²³Awui mirin saikora kakhanangna, awui otsak kachotna; ngayāla awui ningna ngasāmkakhui masamphangmana. Hila aremana. ²⁴Mikumowui vang phāshak phazā kala awui otsakli ringphākhui maningla kaphā ot katei maleimana. Hila Varewui pāng eina kharā da ina thei, ²⁵kaja ana maningla, khipāna zāshaprakhala lah khipāna ringphākhui samphangshaprakhala? ²⁶Varena awui ningyāng ungkhangasaka mi chili thangkhamei, awor kala khamathān mishapa; kha morei kaphungali ana phākakhui kala kazip otsak mi, chi Vareli ningyāng ungkhangasaka mili mikhavaina. Hila aremana, masili khangahomna.