Imba Mak Aang Nge
Manpa pakhatna lan, takung tazei khatle sa raza khat amga le, haba brumza bina sa lang bakhou pi make; bachan sianu naanu ga maan lak pina bachamga ri rwe diga Bachu thangnupa na rinne. Baza ga imba make, ningting toga le mun khat make, khatle bazaa kadan dingbo tudannu pakhatchale thei make.
6 1Eina lumik thwei bi munu kasianu khat amme, khatle haga misa lu chung bi bazin takka kazin nge: 2Rikrwang na manpa pakhat ding lan, lan tam khatle takung tazei pi thangnu, bakatha na bathainu khatchale baat maknu—atiyeda Rikrwang na haba bina sa lang bakhou pi thang make; man mi khatna haba ding sa swake. Heiya bakaan toiza gaye, bachan sianu naanu gaye.
3Manpa pakhatna sa nao raza pon thangluga sangwan sei ring ongluga—baringnu khwa taktakka seiga ongta—atiyeda bakatha na kasanu thinu bina imba make, khatle maan ding le ri thang make dabe, pon bina thinu nao ga maan ma bathai rwe diga eina rinnuwe. 4Haga bakaan toiza bi hungluga zingnu bi seye; zingnu na bameng ding hwam lemme. 5Haga lumik le mu khat make, khatchale thei khat make dabe le, haba manpa ma inkuga basaknu amme. 6Maanna sangwan sangin leng ni ring ongluga le kasanu khatchale khaang mak dabe le, mi bingza bariak khatcha bi se mak bo? 7Misa om chwan riangre bingza bamun lang nge, atiyeda bachaamnu ga imba mak aang nge. 8Ningtingnu mina kapangnu mi ma pa-aam tongnu ambo? Lungsianu mina mi meithaan bi lamchat tatoga to dingbo dinu theinuna pa-aam tongnu ambo? 9Bathainu zwang koinu ma mik munu ga bathai rwe. Heiya le bakaan toiza gaye, thiraang bakung senuwe. 10Am ongnu bing ga meithaanna nameng pi thang drwe khatle misa pa-aam gaye dinu thei thang rwe; khatle maan ma nat inkunu pakhat le diga maanna kae kale lang ngam make.
11Chong taswang khak amga, bingza bakaan toiza le taswang inkuga tolune, atiga hagana mi khat lang pa-aam tongnu ambo? 12Balangbe misa om bakaan toiza ringnu om ni titcha bi, lim danga se phao hungnu bi, misa lang pa-aam kasanu gaye dinu tuna theiye? Balangbe maan nung bi lumik thwei bi pa-aam ta thanglune dinu tuna maan khou rin ngam bo?