Daniel 2

Chapter 2.

2 ¹Nebuchadnezzarna mungsai kum kakhaneli, ana mang shimana; awui ning mamathānrarthuwa kala awui pikakhui china ali horhaowa. ²Chieina awungana awui mang chi ali hāngmi khavai mitrang kathembing, laivā kathembing, meoworkathembing, kala Chaldeanaobing hokhui khavai kasoi. Athum rālaga awungawui mangāli nganinga. ³Awungana athumli hānga, "Ina mang akha shimana, kala mang chi theikhavai iwui ning mamathānrarthuwa."

⁴Chieina Chaldeanaobingna awungali Aram tui eina hānga, "O awunga, okpeimeiranu! Nawui raobingli mang chi hānglu, kala ithumna chiwui kakhalat hāngmira."

⁵Awungana Chaldeanaobingli ngahānkai, "Iwui hukhum china nganingtitta: kaja nathumna ili mang kala chiwui kakhalat mahāngmiakha, nathumli asā rimkazamihaora kala nathumwui shimbing khorkazam kahaipam sāra. ⁶Kha kaja nathumna mang kala chiwui kakhalat hāngakha, iwui eina lemmet, sāman, kala khayākakā reikhamatai samphangra. Chieina ili mang kala chiwui kakhalat hāngmilu."

⁷Athumna kakhanela ngahānkai, "Awungana awui raobingli mang chi hāngmiranu, kala ithumna chiwui kakhalat hāngmira."

⁸Awungana ngahānkai, "Nathumna atam khalo khavai khangarān sai kaji ina khamashung eina thei, khikhalajila nathumna iwui hukhum china nganingtitta kaji theilaka: ⁹Kaja nathumna ili mang mahāngmiakha, nathumwui vang bichar akhathang lei. Atam ngacheiranglakha eina tangda iwui mangāli kapikta, khamakhao tui matui khavai nathumna mayāngaroka. Chiwui vang eina ili mang hāngmilu, chieina nathumna chiwui kakhalat hāngmishapra kaji ina theira."

¹⁰Chaldeanaobingna awungali ngahānkai, "Okathuili awungana ngahāna chi sāshap mi akhala maleimana. Reikhamatai kala pangshap khalei awunga khipānakhala mitrang kathema, laivā kathema, lah Chaldeanao khipānakha hikathā ot khangasan kathemana.

¹¹Awungawui pokhangai chiwui vang sakkhanā lei; mina alungli maokthui varebing maningla, chi awungali hāngmishap khipākha maleimana."

¹²Chi eina awungana malung thuida malungvātlakhaowa, kala Babylonwui thangkhamabing saikorali sākashimān khavai kasoi. ¹³Chieina thangkhamabing shaothat khavai hukhum china shokphoka, kala athumna Daniel eina awui ngasotnaobingli shaothat khavai shurvai.

¹⁴Chieina Danielna awungawui raikanmewui kathāna Ariochli thangkhamei kala mashunning eina ngahānkai; Ariochna Babylonwui thangkhamabing shaothat khavai vaihaira. ¹⁵Ana awungawui otva̱ Ariochli ngahāna, "Khisāda awungawui eina hikathā zakkashi hukhum shokkhala?" Chieina Ariochna chi Danielli hāngchithei. ¹⁶Chieina Danielna vāzangda, kakhalat chi hāngmi khavai atam milu da awungali poi.

¹⁷Chieina Danielna shimli unghaowa, kala awui ngasotnaobing Hananiah, Mishael, kala Azariahli chi pongli hānga, ¹⁸Daniel kala awui ngasotnaobing Babylonwui thangkhamabing khangatei eina ngarumda mashimān khavai, ngathum kahai hiwui pongli kazingramli khalei ithumwui Avāli lukhamashan khavai polu da athumli shivāta. ¹⁹Chieina ngathum kahai chi ngayā mangshongli Danielli phongmi, kala Danielna kazingramli khalei ithumwui Avāli sochikatta. ²⁰Danielna hānga: "Ithumwui Avāwui ming mashimānda soranu, kaja thangkhamei eina pangshap awuili lei. ²¹Ana atam eina zurkān ngachei ngasaka; ana awungabing khangthui kala awungabing kapangkhui; ana thangkhamabingli thangkhamei mi kala theishingkakhuibingli awor mi. ²²Ana kathuka kala ngathum kahai otbing chithei; tangkhamangli khalei chi ana thei, kala kahor awui ngarumda lei.

²³O ishāvā ngarāwui Vare, ina nali ningshi kala sochikat mi, kaja nana ili thangkhamei eina pangshap mihaira, kala ara ithumna nali kapo chi nana ili theingasakhaira; awungawui khangarān chi nana ithumli theingasakhaira.

Danielna Kahānkā Khuirai

²⁴Chieina awungana Babylonwui thangkhamabing sāshimān khavai kapangkhui Ariochwuili Danielna vai, kala hānga, "Babylonwui thangkhamabing masāshimānhaialu. Ili awungawuili khuiunglu, kala ina ali kakhalat hāngmira."

²⁵Chieina Ariochna Danielli awungawui mangāli katotsisi khuiung, kala hānga, "Judahwui raithā kahaibingwui ngachaili awungali kakhalat hāngmikashap mi akha ina samphanghaira."

²⁶Awungana Belteshazzar kaho Danielli ngahāna, "Ina kashiman mang chi kala chiwui kakhalat nana ili hāngmi shapla?"

²⁷Danielna awungali ngahānkai, "Awungana ngahān kahai ngathum kahai chi thangkhamabing, laivā kathembing, mitrang kathembing, lah Chaldeanaobing khipānakha chithei shapmana.

²⁸Kha kazingramli khalei ithumwui Avāna ngathum kahaibing chithei, kala naoda atamli khi shokrakhala chi awunga Nebuchadnezzarli theingasakhaira. Nawui mang kala na pettungli pida leilakha nawui muiyālungli mahākhami chi hibingna: ^a a v28 "Naoda atam" hiya Varena awui katang makhavai wungram kapangkhui marānglakha eina tangda, okathuiwui naomeikapta atamwui pong hāngkhame.

²⁹"O awunga, na pettungli pida leilakha, nawui kaphaning chi naoda khi rārakhala chi pongli ngareiung, kala ngathum kahaibing chithei kahaina naoda khi shokrakhala chi nali chitheihaira.

³⁰Kha ngathum kahai hi ili phongmi chi ina kharing eina khalei mi khangatei saikorali reimei thangkhamei leiwui vang maningmana, kha awungana chiwui kakhalat theikhavai, kala nana nawui ninglungwui kaphaning theishingkhui khavaina.

³¹"O awunga, nana yangda mima̱ kahakva̱ akha thei. Hakmahā kala kahānna charshi eina mima̱ hi nawui mangāli nganinga, kala awui zakmai chi khangachee-khangachāna.

³²Mima̱ chiwui akui chi sinā khamathāna, awui makā kala apāng chi lupāna, awui awuk kala akhaishāng chi pithraina, ³³awui akhari chi marina, awui aphei chi kaikha mari kala kaikha leikhonna.

³⁴Nana yangda leilakha, pāng maleila hātkakhui ngalung akhana mima̱ chiwui mari kala leikhon eina kasā aphei chi horthatta sātekmiserhaowa. ^b b v34 Mi pāng maleila hātkakhui ngalung chi okathui katongali chipem khavai kaphung akha ngasāra — hi Jishuwui mangā eina ithumwui Avāna kapangkhui wungramna, chi katang makhavai mashimān ngasakmara kala khipākha khangateilila makatāmara.

³⁵Chitharan mari, leikhon, pithrai, lupāsā kala sinā saikora katonga sātekmiserhaowa, kala lumkachāng ranpumli lanji kathāna ngasāhaowa. Masina athumli phanthuihaida, athumwui pam maphāshokmana. Kha mima̱li shaokhai lunggui chi reikhamatai kaphung ngasāda okathui katonga pemhaowa.

³⁶"Hi chi mangna. Ara ithumna awungali chiwui kakhalat chi hāngra.

³⁷Na, O awunga, awungabingwui awungana, kazingramli khalei ithumwui Avāna nali wungram, pangshap, yāng kala tekhamatei mihaira.

³⁸Ana mibingwui naomayara ngarā saikora, luili khalei sāyurbing, kala khamasaiwui vānaobing, athum khaleipam saikora chi nawui pāngli horsangmi kahaina, kala athum saikorawuitungli nali khamung ngasakhaira. Na chi sināwui akuina.

³⁹"Nawui thili wungram khangatei akha, nawuili teomeiya, rāmungra; chiwui thili pithrai eina kasā kakathuma wungramna okathui katongali mungra.

⁴⁰Khamate wungram chi mari thāda pangra, kaja marina ot saikora sāteklaga sākakhuia. Kala marina hibing saikora naikazam kahai thada, chi wungramna athumli sāteklaga naikazamra.

⁴¹Kaikha ham kasāpawui leikhon kala kaikha mari kasā phei kala pheimareng nana theikahai thada, chi ngayarkhai kahai wungram ngasāra; kha nana mari khanim leikhonli manāt kahai theikahai thada, mariwui yāng kaikha chili leira.

⁴²Pheimareng chi kaikha mari kala kaikha leikhon kahai thada, chikathā wungram chi kaikha pangra kala kaikha shaotek ngasakshapa ngasāra.

⁴³Nana mari khanim leikhonli manāt kahai theikahai thada, mibing chi ngakum eina manātrumra, kha mari leikhonli mamanātrum kahai thada katonga mapānpaimara.

⁴⁴"Awungabing chiwui zimiksholi kazingramli khalei ithumwui Avāna wungram akha haimira, chi katang mashimānmara, kala awui khamung yur khangatei akhali mahairaluimara. China hibing wungram saikora naikazamlaga sākānthuimira, kala chi katang makhavai nganingchingra.

⁴⁵Khamahā chiwui kakhalat chi hina: kaphungwui eina, miwui pāng eina maleila, katā kahai ngalung china mari, pithrai, leikhon, lupāsā kala sinā chi sātekmiserhaira. Reikhamatai ithumwui Avāna hiwui thili khi shokra kaji chi awungali chithei kahaina. Mang chi kachangkhatna, kala chiwui kakhalat chi khuisangkapaimānga."

Ithumwui Avā Mangāli Hamsang Kahai Awunga Akha

⁴⁶Chiwui thili awunga Nebuchadnezzarna mai mashunzangda, Danielli khayāshi mihaowa, kala ali kachigat kala nganamkaphā mihaolu da kasoi.

⁴⁷Awungana Danielli hānga, "Kachangkhat eina nawui Vare chi varebingwui Varena, awungabingwui Proho, kala ngathum kahai phongshokpana, khikhalajila nana hi phongmishaphaowa."

⁴⁸Chiwui thili awungana Danielli reisang ngasakta, khayākakā juilak kala lemmet reikhamatai kachungkha mihaowa, kala Babylon ngalei katongawuitungli ali khamung ngasaka, kala thangkhama saikorawuitungli wungva̱ kharei ngasaka. ⁴⁹Danielna awungali seihā sāhaowa, chieina awungana Shadrach, Meshach, kala Abednego athumli Babylon ngaleiwui ot otsakli pangsang ngasaka; kha Danielna awungawui khāmongli pamsai.