Daniel 2 FHB Father's Heart Bible™

Adhyay 2.

2 ¹Nebuchadnezzar pora raj kora dusera bosor te, tai sapna khan dikhise; tar atma chinta pora bhorta hoise aru tar ghum tu harai jaise. ²Karne Raja pora jadu kora khan, mantra kora khan, maya kora khan, aru tara sabi kora khan ke tar sapna kobole mati bole hukum dise. Tarkhan ahhi kene Raja age te khara hoise. ³Raja pora tarkhan ke koise, “Moi ekta sapna dikhise, aru hei sapna tu janibole moi laga atma chinta hoi ase.”

⁴Tetiya tara sabi kora khan pora Aramaic bhasa te Raja ke koise, “He Raja, hodai jinda thakibi! Apuni laga noukar khan ke sapna tu kobi, aru amikhan tar ortho dikhai dibo.”

⁵Raja pora tara sabi kora khan ke jawab dise, “Moi laga hukum tu thik hoise: jodi tumikhan moi ke sapna tu aru tar ortho nakoi, tumikhan ke tukra tukra kati dibo aru tumikhan laga ghor khan khotom kori dibo. ⁶Kintu jodi tumikhan sapna tu aru tar ortho koi, tumikhan moi pora uphar, inam, aru dangor sonman pabo. Karne moi ke sapna tu aru tar ortho kobi.”

⁷Tarkhan pora dusera bar jawab dise, “Raja pora tar noukar khan ke sapna tu kobi, aru amikhan tar ortho dibo.”

⁸Raja pora jawab dise, “Moi bhal pora jane tumikhan homoi bisari ase, kilemane tumikhan moi laga hukum thik ase koi kene dikhi ase: ⁹Jodi tumikhan moi ke sapna tu nakoi, tumikhan nimite ekta he saja ase. Homoi bodli nohua tak moi age te misa aru biya kotha kobole tumikhan raji hoise. Karne moi ke sapna tu kobi, tetiya moi janibo tumikhan tar ortho dikhai dibo pare.”

¹⁰Tara sabi kora khan pora Raja ke jawab dise, “Prithibi te kun bhi Raja mangise eitu koribo napare. Kun bhi dangor, takot thaka Raja pora kitia bhi eneka jinis kun bhi jadu kora, mantra kora, nahole Chaldean manuh ke munga nai.

¹¹Raja laga mangna tu bisi digdar ase; khali debota khan, kun manuh khan laga majot te nathake, Raja ke eitu dikhai dibo pare.”

¹²Eitu huni Raja bisi khong uthise, aru Babylon laga sob gyani manuh khan ke khotom koribole hukum dise. ¹³Karne gyani manuh khan ke morai dibole hukum ulai jaise, aru tarkhan pora Daniel aru tar sathi khan ke morai dibole bisarise.

¹⁴Tetiya Daniel pora Raja laga pohora khan laga mukhyo adhikari Arioch ke gyan aru buddhi pora jawab dise; Arioch tu Babylon laga gyani manuh khan ke morai dibole ulai jaise thakise. ¹⁵Tai Raja laga adhikari Arioch ke hudise, “Raja pora kele eneka kathin hukum ulaise?” Tetiya Arioch pora Daniel ke eitu bujhai dise. ¹⁶Karne Daniel bhitor te jai kene Raja ke homoi mangise, titia tai Raja ke ortho dikhai dibo pare.

¹⁷Tetiya Daniel ghor te jai kene tar sathi khan Hananiah, Mishael, aru Azariah ke hei kotha tu koise, ¹⁸hei lukai thaka kotha nimite Sorgot te thaka amar Pitri pora doya mangibole tarkhan ke koise, titia Daniel aru tar sathi khan Babylon laga dusra gyani manuh khan logote khotom nahobo. ¹⁹Tetiya rati laga ekta darshan te hei lukai thaka kotha tu Daniel ke dikhai dise, aru Daniel pora Sorgot te thaka amar Pitri laga stuti korise. ²⁰Daniel koise: “Amar Pitri laga nam hodai aru hodai nimite stuti hobi, kilemane gyan aru takot Tar ase. ²¹Tai homoi aru din khan bodlai diye; Tai raja khan ke hatai diye aru raja khan ke bohai diye; Tai gyani khan ke gyan diye aru bujha thaka khan ke jaankari diye. ²²Tai gabhir aru lukai thaka jinis khan dikhai diye; Tai andhera te ki ase eitu jane, aru puhor Tar logote thake.

²³Apuni ke, moi laga baba khan laga Isor ke, moi dhanyabad aru stuti diye, kilemane Apuni pora moi ke gyan aru takot dise, aru etiya Apuni amikhan Apuni pora ki mangise eitu moi ke janai dise; Apuni amikhan ke Raja laga kotha tu janai dise.”

Daniel pora jawab anise

²⁴Karne Daniel, kun ke Raja pora Babylon laga gyani manuh khan ke khotom koribole niyukti korise thakise, hei Arioch logote jai kene koise, “Babylon laga gyani manuh khan ke khotom nakoribi. Moi ke Raja logote loijabi, aru moi tai ke ortho dibo.”

²⁵Tetiya Arioch pora Daniel ke joldi Raja age te anise aru koise, “Judah laga bondhi khan majot te moi ekjon manuh paise kun pora Raja ke ortho kobo pare.”

²⁶Raja pora Daniel, kun ke Belteshazzar koi, tai ke hudise, “Moi dikha sapna tu aru tar ortho ki ase, tumi moi ke kobo pare?”

²⁷Daniel pora Raja ke jawab dise, “Raja pora huda hei lukai thaka kotha tu kun bhi gyani manuh, mantra kora, jadu kora, nahole tara sabi kora khan pora dikhai dibo napare.

²⁸Kintu Sorgot te thaka amar Pitri pora lukai thaka kotha khan dikhai diye, aru ses din khan te ki hobo eitu Raja Nebuchadnezzar ke janai dise. Apuni laga sapna tu aru apuni bisna te huti thaka homoi te apuni laga mon te aha darshan khan eitu thakise: ^a a v28 “Ses din khan” mane Isor pora Tar ananta rajyo bonai nadiya age laga itihas laga ses homoi ke koi ase.

²⁹“He Raja, apuni bisna te huti thaka homoi te, aha din te ki hobo eitu laga chinta apuni laga mon te ahise, aru lukai thaka kotha dikhai diya Jon pora ki hobo eitu apuni ke dikhai dise.

³⁰Kintu hei lukai thaka kotha tu moi ke dikhai diya tu, moi jinda thaka sob manuh pora bisi gyan thaka karne nohoi, kintu Raja pora tar ortho janibole, aru apuni laga mon laga chinta apuni bujhibole nimite ase.

³¹“He Raja, apuni saise aru ekta dangor murti dikhise. Hei murti tu, bisi dangor aru bisi ujjol, apuni age te khara thakise, aru tar chehera bhoyonkar thakise.

³²Hei murti laga matha tu khansa suna thakise, tar chati aru hath khan chandi, tar pet aru ran khan pitol, ³³tar theng khan loha laga, tar bhori khan kunba loha aru kunba matti laga.

³⁴Apuni sai thaka homoi te, hath nalagai kene kata ekta pathor pora hei murti laga loha aru matti laga bhori khan te marise, aru eitu khan ke bhangi dise. ^b b v34 Kun manuh laga hath pora nakata hei pathor tu ekta pahar hoise aru pura prithibi ke bhorta kore — eitu amar Pitri pora Jisu dwara bonai diya rajyo ase, juntu kitia bhi khotom nahobo aru kitia bhi dusra kun ke nadibo.

³⁵Tetiya loha, matti, pitol, chandi, aru suna sob eke logote tukra tukra bhangise, aru garom din laga dhaan mara jagah laga bhush nisina hoise. Hawa pora eitu khan ke uribai loijaise, aru eku chihna bhi thaka nai. Kintu hei murti te mara pathor tu ekta dangor pahar hoise aru pura prithibi ke bhorta korise.

³⁶“Eitu sapna tu thakise. Etiya amikhan Raja ke tar ortho kobo.

³⁷Apuni, he Raja, raja khan laga Raja ase, kun ke Sorgot te thaka amar Pitri pora rajyo, hokti, takot, aru mohima dise.

³⁸Sob manuh, jongol laga janwar khan, aru akas laga chiriya khan, tarkhan kot thakile bhi, Tai apuni laga hath te dise, aru apuni ke eitu sob uporte raja bonaise. Apuni suna laga matha tu ase.

³⁹“Apuni pichete dusra ekta rajyo uthibo, juntu apuni laga pora chutu ase; tetiya tisra ekta rajyo, pitol laga, pura prithibi uporte raj koribo.

⁴⁰Charta number rajyo tu loha nisina takot hobo—loha pora sob jinis bhangai aru tukra kore—aru loha pora eitu sob ke pisi diya nisina, eitu pora bhangai aru pisi dibo.

⁴¹Apuni bhori aru bhori laga anguli khan—kunba kumar laga matti, kunba loha—dikha nisina, eitu ekta bhag hua rajyo hobo; hoilebi eitu te loha laga olop takot thakibo, apuni loha ke norom matti logote milai diya dikha nisina.

⁴²Bhori laga anguli khan kunba loha aru kunba matti thaka nisina, eneka rajyo tu kunba takot aru kunba komjur hobo.

⁴³Apuni loha ke norom matti logote milai diya dikha nisina, manuh khan shadi te milibo kintu eke logote thakibo napare, thik loha matti logote nemila nisina.

⁴⁴“Hei raja khan laga din khan te Sorgot te thaka amar Pitri pora ekta rajyo bonabo juntu kitia bhi khotom nahobo, aru tar raj bhi dusra manuh khan ke nadibo. Eitu pora hei sob rajyo khan ke pisi dibo aru khotom kori dibo, aru eitu hodai nimite khara thakibo.

⁴⁵Hei darshan laga ortho eitu ase: manuh laga hath pora nohoi, ekta pahar pora kata pathor tu pora loha, pitol, matti, chandi, aru suna ke tukra tukra bhangise. Amar dangor Pitri pora eitu pichete ki hobo eitu Raja ke dikhai dise. Hei sapna tu hosa ase, aru tar ortho biswas koribo pare.”

Amar Pitri age te niche hua ekjon Raja

⁴⁶Tetiya Raja Nebuchadnezzar matha niche kori kene giri jaise, Daniel ke pranam korise, aru tai ke bolidaan aru dhup dibole hukum dise.

⁴⁷Raja pora Daniel ke koise, “Hosa pora tumi laga Isor tu debota khan laga Isor, raja khan laga Prabhu, aru lukai thaka kotha khan dikhai diya ekjon ase, kilemane tumi eitu dikhai dibo parise.”

⁴⁸Tetiya Raja pora Daniel ke dangor sonman dise, tai ke bisi dangor uphar khan dise, aru tai ke Babylon laga pura desh laga raja aru tar sob gyani manuh khan uporte mukhyo adhikari bonaise. ⁴⁹Daniel pora Raja ke mangise, aru Raja pora Shadrach, Meshach, aru Abednego ke Babylon desh laga kaam khan uporte rakhise; kintu Daniel tu Raja laga darbar te thakise.