1 Wungnaobing 3

3 ¹Solomonna Egyptwui awunga Pharaohshili ngalā ngakhota. Ana Pharaohwui naongalāva̱li khuida, awui konung, ithumwui Avāwui shim, kala Jerusalemwui raipan sāda kuptheirarlakha eina tangda ali Davidwui keinungli khuiunga. ²Kha chi atambing ithumwui Avāwui ming vang shim akha masākārangsai kajiwui vang, mibingna kajuipambingli pha̱kaphayā ot sāchingda leithuwa. ^a a v2 Kajuipambing hi, khokharumwui vang shim akhamāng leirangsai atamli, mibingna kaphungtungli pha̱kaphayā ot sākahai khokharumpambing china. ³Solomonna ithumwui Avāli leishida, awui avāva̱ Davidwui ain athishurda ringa; kha ana kajuipambingli pha̱kaphayā ot sāda nganamkaphā riktāthuwa. ⁴Awungana pha̱kaphayā ot sākhavai Gibeonli vāhaowa, kaja chi kajuipam kahakva̱na; Solomonna chi hanphuttungli rikkatā kachigat thingkha chigata.

⁵Gibeonli ithumwui Avāna Solomonli thangngayākha mangshongli rāchitheida hānga, "Ina nali khi mira kaji chi polu."

⁶Solomonna ngahānkai, "Nana nawui rao David, iwui avāva̱li lukhamashan kahaka sāda chithei, kaja ana nawui mangāli ningtonglak eina, khamashung khangarong eina, kala nashong wuklung khangatara zata. Nana ali hi lukhamashan kahaka khamayonmida, ajala awui wungpamkhongli pamkhavai ali mayarnao akha mihaira. ⁷Ara, iwui Avā, nana nawui rao ili iwui avāva̱ Davidwui thotli awunga sāngasaka; kha i naoshinao kateowana, kala kathāda shokra, kathāda ungra kaji matheimana. ⁸Nawui rao hi nana kapangkhuimi nawui mibingwui alungli lei; athum shānla makakhui kachungkhana. ⁹Chiwui vang eina kaphā eina makaphā khala theikhui khavai, nawui rao ili nawui mibing mung khavai theishingkakhuiwui ning khamilu. Kaja khipāna nawui mi kachungkha kahaka hi mungrarkhala?"

¹⁰Solomonna hi po kahai chi Avā Kahakali ningyāng ungngasaka.

¹¹Chiwui thili ithumwui Avāna ali hānga, "Nana hi po kahaiwui vang eina, mirin kasāngkha lah kashāng lah nawui yangkashibingwui mirin po maningla, kha mashun theishingkhui khavai theishingkakhui po kahaiwui vang eina, ¹²yanglu, ina ara nawui tui athishurda sāhaira; ina nali thangmei kala theishingkakhuiwui ning khami, chieina nawui achālakhawui mi khipāna nashong maleila kahaina, kala nawui thili khipāna nashong marāluimara. ¹³Nana mapo kahaila ina nali khami: kashāng kala khayākakā, chieina nawui mirin peichaoda awunga khipāna nashong ngaheokapai maleimara. ¹⁴Nana nawui avāva̱ Davidna kasā athishurda iwui apongli zatta, iwui ain kala ningkhami mayonakha, ina nawui mirin sāngsang ngasakra."

¹⁵Solomonna thuimathukta, chi mang kahaina da theihaowa. Ana Jerusalemli vāda, Avā Kahakvawui tuingashit okowui mangāli nganingda, rikkatā kachigat kala ningyatchigat chigata, kala awui rao saikorawui vang zātkhān sai.

Avāwui Thangmeina Kachangkha Ava̱va̱ Phongmi

¹⁶Chiwui thili khayorva̱ sha̱nao khani awungawuili rāda awui mangāli nganinga. ¹⁷Sha̱nao akhana hānga, "Ili kapona, amei, sha̱nao hi ini shim akhali okthuiching, kala ali ngasoda shim chi ngalungli ina nao pharai. ¹⁸Ina nao pharākhui kakathumathang, sha̱nao hinala pharai. Ini kasaikha pama; shimli inili kha̱mi akhala maleithuwa, ini khani māng. ¹⁹Chithang ngayā sha̱nao hiwui naomayara thihaowa, kaja ana awuitungli pisai. ²⁰Ngayā sailung ana ngakarthuida, narao ngayaizangda pilakha iwui naomayara iwui ngalemwui eina khuithui, kala awui asuk chipethai, kala awui naomayara thikahai chi iwui asuk chipethai. ²¹Ngathor ina iwui naomayara nganaomi khavai ngakarthuida, a thihaisai. Kha ngathor kahorli yangkazakta, a ina kapharā naomayara maningmana da theihaira."

²²Sha̱nao akhapāna hānga, "Maningmana! Kharing chi iwui naomayarana; thikahai chi nawuina." Kharepā china ngahānkai, "Maningmana! Thikahai chi nawui naomayarana; kharing chi iwuina." Chithāda athumna awungawui mangāli ngazeka.

²³Awungana hānga, "Hipāna hānga, 'Iwui naomayara ringda lei, nawui naomayara thihaira,' kala akhapāna hānga, 'Maningmana, nawui naomayara thihaira, iwui naomayara ringda lei.'"

²⁴Chieina awungana hānga, "Iwuili raighai akha khuirālu." Chieina athumna awungawui mangāli raighai akha khuirai. ²⁵Awungana hānga, "Kharing nao chi khani sāda kapang khuiranu; tangkhai akha akhali milu, tangkhai akhapa akhapāli milu."

²⁶Kharing naomayarawui ava̱va̱na awui naomayarawui vang ning lumashanhaoda awungali hānga, "Amei, kharing angangnao chi ali milu! Ali mashaothatalu, maningphut!" Kha akhapāna hānga, "A iwuila nawuila maningmara—ali khani sāda kapang khuiranu!"

²⁷Chieina awungana hānga, "Kharing nao chi kharepā sha̱naoli milu; ali mashaothatalu, maningphut. Ava awui ava̱va̱na."

²⁸Israel saikorana awungana sākahai bichar chi shāhaira, kala athumna ali ngacheehaowa, kaja khamashung eina bichar sākhavai ithumwui Avāwui thangkhamei awui lungli lei kaji athumna theihaira.