Pitri pora Solomon ke gyaan thaka ekta mon dise
Amar Pitri pora ki mon ase mangibi koi dile, chutu raja khali bhal aru biya chinibole para mon he mangise, aru namangi thaka dhon bhi paise. Proman to jitia duijon mahila ekta bacha ke nijor laga koi, aru ekta tolwar pora kun taike morom kore dikhai dise.
3 1Solomon pora Egypt laga raja Pharaoh logot te shadi pora milap korise. Tai Pharaoh laga chukri ke loise, aru nijor rajmahal, amar Pitri laga ghor, aru Jerusalem laga dewar bonai khotom nohua tak, tai ke David laga Sheher te anise. 2Kintu manuh khan etiya bhi untcha jagah khan te bolidan di thakise, kilemane hei din khan te amar Pitri laga nam nimite ekta ghor etiya tak bona nai. a a v2 Untcha jagah khan tu gaon laga pahar chuti uporte thaka puja kora jagah thakise, jun jagah te, mondir pora aradhana ke ekta jagah nadiya age te, manuh khan bolidan di thakise. 3Solomon pora amar Pitri ke morom korise, aru nijor pitri David laga niyom khan te jivon korise; kintu tai untcha jagah khan te bolidan dise aru dhup julai dise. 4Raja tu bolidan dibole Gibeon te jaise, kilemane eitu dangor untcha jagah thakise; Solomon pora hei bedi uporte 1,000 jolai diya bolidan dise.
5Gibeon te amar Pitri raat te sapna te Solomon ke dikhai dise, aru koise, “Moi tumi ke ki dibo lage, mangi lobi.”
6Solomon pora jawab dise, “Apuni laga noukar David, moi laga pitri ke, Apuni dangor vachan laga morom dikhaise, kilemane tai Apuni laga age te hosa pora, dharmikota pora, aru Apuni phale sidha mon loi kene berai thakise. Apuni tai nimite eitu dangor vachan laga morom rakhise, aru aji tai laga singhason te bohibole tai ke ekjon putro dise.” 7“Etiya, moi laga Pitri, Apuni pora moi laga pitri David laga jagah te Apuni laga noukar ke raja bonaise, kintu moi khali ekta chutu bacha ase, bahar te jabole aru bhitor te ahhibole najane.” 8“Apuni laga noukar tu Apuni laga manuh khan majote ase, kun ke Apuni basi loise—gina koribole aru hisab koribole napara iman bisi.” 9“Karne Apuni laga noukar ke Apuni laga manuh khan ke sambhalibole, bhal aru biya ke alag chinibole, bujhibole para ekta mon dibi. Kilemane kun pora Apuni laga eitu dangor manuh khan ke sambhalibo pare?”
10Solomon pora eitu mangise koi kene sob uporte thaka Pitri khushi hoise.
11Amar Pitri pora tai ke koise, “Kilemane tumi eitu mangise, lamba jivon nohoi, nohoile dhun-sompoti nohoi, nohoile tumi laga dushman khan laga jivon bhi nohoi, kintu nyay bujhibole gyaan mangise,” 12“Etiya Moi tumi laga kotha hisab te koribo: Moi tumi ke gyaan thaka, bujhibole para ekta mon dibo—tumi laga age te kun bhi tumi nisena thaka nai, aru tumi laga pichete bhi kun tumi nisena uthibo nai.” 13“Moi tumi ki manga nai eitu bhi dibo: dhun-sompoti aru sonman, titia tumi laga sob din te kun raja bhi tumi logot te tulona koribo napare.” 14“Jodi tumi Moi laga rasta khan te berabo, aru tumi laga pitri David pora kora nisena Moi laga niyom aru hukum khan mani kene thakibo, tene hole Moi tumi laga din khan lamba kori dibo.”
15Solomon uthise aru eitu ekta sapna thakise koi kene bujhise. Tai Jerusalem te jaise, aru sob uporte thaka Pitri laga vachan laga sinduk age te khara hoise, jolai diya bolidan aru shanti laga bolidan dise, aru nijor sob noukar khan nimite ekta bhoj korise.
Pitri laga gyaan pora hosa ama ke dikhai dise
16Tetiya beshya kaam kora duijon mahila raja usorte ahhise aru tai age te khara hoise. 17Ekjon mahila pora koise, “Moi laga probhu, binti ase, eitu mahila aru moi ekta ghor te thake, aru moi hei ghor te tai logot te ekta bacha jonom dise.” 18“Moi bacha jonom diya pichete tisra din te, eitu mahila bhi bacha jonom dise. Ami dujon he thakise; ghor te amikhan logot te kun ajnabi manuh thaka nai, khali amikhan dujon he.” 19“Raat te eitu mahila laga putro mori jaise, kilemane tai nijor bacha uporte ghumai jaise.” 20“Tai aadha raat te uthise, aru Apuni laga noukar ghumai thaka homoi te moi laga kinar pora moi laga putro ke loise, aru tai ke nijor buku te rakhise, aru tai laga mora putro ke moi laga kinar te rakhise.” 21“Jitia moi phojur te moi laga putro ke dudh khilabole uthise, tai mori kene thakise. Kintu phojur laga ujala te bhal kori saise, moi jonom diya putro tu nohoi koi kene moi dikhise.”
22Dusra mahila pora koise, “Nohoi! Jinda thaka tu moi laga putro ase; mora tu tumi laga ase.” Poila jon pora jawab dise, “Nohoi! Mora tu tumi laga putro ase; jinda thaka tu moi laga ase.” Eneka pora tarkhan raja age te jhagara korise.
23Raja pora koise, “Eitu jon koi ase, ‘Moi laga putro jinda ase, tumi laga putro mori jaise,’ aru hei jon koi ase, ‘Nohoi, tumi laga putro mori jaise, moi laga putro jinda ase.’”
24Karne raja pora koise, “Moi logote ekta talwar anibi.” Aru tarkhan raja age te ekta talwar anise. 25Raja pora koise, “Jinda bacha ke dui bhag te kati dibi; ekjon ke adha, dusra ke adha dibi.”
26Jinda putro laga ama, tai laga bacha nimite tai laga mon dukh pora, raja ke koise, “Moi laga probhu, binti ase, jinda bacha ke tai ke dibi! Kitia bhi tai ke morai nadibi!” Kintu dusra jon pora koise, “Eitu moi laga bhi nohobo, tumi laga bhi nohobo—dui bhag te kati dibi!”
27Tetiya raja pora koise, “Jinda bacha ke poila mahila ke dibi; kitia bhi tai ke morai nadibi. Tai he bacha laga ama ase.”
28Raja pora diya nyay tu sob Israel pora hunise, aru tarkhan tai ke bhoi korise, kilemane nyay koribole amar Pitri laga gyaan tai bhitor te ase koi kene tarkhan dikhise.