1ይ ነገስት 3 FHB Father's Heart Bible™

3 ¹ሰሎሞን ምስ ፈርዖን ንጉስ ግብፂ ብመውስቦ ተዛመደ። ነታ ጓል ፈርዖን ወሲዱ፥ ቤቱን ቤት ኣቦናን መካበብያ ኢየሩሳሌምን ምስራሕ ክሳዕ ዝውድእ፥ ናብ ከተማ ዳዊት ኣምፅአ። ²እቶም ህዝቢ ግና ክሳዕ እቲ ጊዜ እቱይ ንስም ኣቦና ቤት ስለ ዘይተሰርሐ፥ ገና ኣብ ዀረብታታት ይስውኡ ነበሩ። ^a a v2 እቲ ዀረብታታት፥ ቅድሚ ቤተ መቕደስ ንኣምልኾ ሓደ ማሕደር ምሃቡ፥ ህዝቢ ኣብ ርእሲ ዀረብታ ዝስውኡሉ ዝነበሩ ናይ ከባቢ መቕደሳት እዮም። ³ሰሎሞን ንኣቦና ኣፍቀሮ፥ ከም ስርዓት ኣቦኡ ዳዊት ድማ ተመላለሰ፤ ኣብ ዀረብታታት ግና ይስውእን ይዓጥንን ነበረ። ⁴እቲ ንጉስ፥ ገባዖን እቲ ዓብዪ ዀረብታ ስለ ዝነበረ፥ ክስውእ ናብኣ ኸደ፤ ሰሎሞን ከዓ ኣብቲ መሰውኢ እቱይ ሽሕ ዚሓርር መስዋእቲ ኣቕረበ።

⁵ኣብ ገባዖን ኣቦና ብለይቲ ብሕልሚ ንሰሎሞን ተገለፀሉ፤ ከምዙይ ድማ በሎ፦ “እንታይ ክህበካ ኸም እትደሊ ለምን።”

⁶ሰሎሞን ከዓ ኸምዙይ ኢሉ መለሰ፦ “ንስኻ ንባርያኻ ዳዊት ኣቦይ፥ ዓብዪ ምሕረት ኣርኣኻዮ፤ ንሱ ኣብ ቅድሜኻ ብሓቅን ብፅድቅን ኣባኻ ብቕኑዕ ልብን ተመላሊሱ እዩሞ። እዝ ዓብዪ ምሕረት እዙይ ኣፅኒሕካሉ፥ ሎሚ ኣብ ዙፋኑ ዝቕመጥ ወዲ ኸዓ ሃብካዮ። ⁷ሕዚ ኸዓ፥ ኦ ኣቦይ፥ ንስኻ ኣብ ክንዲ ዳዊት ኣቦይ ንባርያኻ ኣንጊስካኒ ኣለኻ፤ ኣነ ግና ገና ንእሽተይ ቆልዓ እየ፥ ምውፃእን ምእታውን ዘይፈልጥ። ⁸ባርያኻ ኣብ ማእኸል ህዝብኻ፥ እቲ ዝሓረኻዮ ህዝቢ፥ ኣሎ፤ ንሱ ኸዓ ካብ ምብዛሑ ዝተልዓለ ኽቝፀርን ኽውሰንን ዘይከኣል ህዝቢ እዩ። ⁹ስለዙይ ፅቡቕን ክፉእን ፈሊዩ ንህዝብኻ ዝፈርድ መስተውዓሊ ልቢ ንባርያኻ ሃቦ። ነዝ ዓብዪ ህዝብኻ መን ክፈርዶ ይኽእል?”

¹⁰ሰሎሞን እዙይ ስለ ዝለመነ ንጐይታ ኣቦ ደስ ኣበሎ።

¹¹ኣቦና ድማ ከምዙይ በሎ፦ “ነዊሕ ዕድመ ወይ ሃብቲ ወይ ነፍሲ ፀላእትኻ ዘይኮነ፥ ፍርዲ ንምስትውዓል ምስትውዓል ደኣ ስለ ዝለመንካ፥ ¹²እንሆ ኸም ቃልካ ገበርኩ፦ ጥበበኛን መስተውዓልን ልቢ እህበካ ኣለኹ፤ ቅድሜኻ ኸማኻ ዝበለ ኣይነበረን፥ ድሕሬኻውን ከማኻ ዝበለ ኣይተስእን እዩ። ¹³ነቲ ዘይለመንካዮ ኸዓ፥ ሃብትን ክብረትን እህበካ ኣለኹ፤ ስለዙይ ብዅሉ ዘመንካ ካብ ነገስታት ከማኻ ዝኸውን ኣይህሉን እዩ። ¹⁴ብመንገደይ እንተ ተመላሊስካ፥ ከምቲ ኣቦኻ ዳዊት ዝገበሮ ሕግጋተይን ትእዛዛተይን እንተ ሓሊኻ፥ መዓልቲታትካ ኸናውሕ እየ።”

¹⁵ሰሎሞን ከዓ ተበራበረ፤ ሕልሚ ምንባሩውን ፈለጠ። ናብ ኢየሩሳሌም ድማ ከደ፤ ኣብ ቅድሚ ታቦት ኪዳን ጐይታ ኣቦ ደው ኢሉ፥ ዚሓርር መስዋእትን መስዋእቲ ምስጋናን ኣቕረበ፤ ንዅሎም ኣገልገልቱ ኸዓ ድግስ ገበረሎም።

ጥበብ ኣቦ ነታ ሓቀኛ ኣደ ገለፀት

¹⁶ሽዑ ኣመናዝር ዝነበራ ኽልተ ኣንስቲ ናብ ንጉስ መፃ፥ ኣብ ቅድሚኡ ኸዓ ደው በላ። ¹⁷ሓንቲ ሰበይቲ ድማ ከምዙይ በለት፦ “ኦ ጐይታይ፥ በጃኻ፥ ኣነን እዛ ሰበይቲ እዚኣን ኣብ ሓደ ቤት ንነብር፤ ኣብቲ ቤት ድማ ምስኣ ወለድኩ። ¹⁸ኣነ ምስ ወለድኩ ኣብ ሳልሳይ መዓልቲ ድማ፥ እዛ ሰበይቲ እዚኣውን ወለደት። ንሕና በይንና ነበርና፤ ኣብ ቤት ብጀካ ኽልቴና ምሳና ጓና ኣይነበረን። ¹⁹ብለይቲ ኸዓ፥ እዛ ሰበይቲ እዚኣ ስለ ዝደቀሰትሉ፥ ወዳ ሞተ። ²⁰ፍርቂ ለይቲ ተሲኣ ድማ፥ ባርያኻ ደቂሳ እንተላ፥ ንወደይ ካብ ጎነይ ወሲዳ ኣብ ሕቑፋ ኣደቀሰቶ፤ ነቲ ዝሞተ ወዳ ኸዓ ኣብ ሕቑፈይ ኣደቀሰቶ። ²¹ኣነ ንግሆ ንወደይ ከጥቡ ተሲአ እንተለኹ፥ ሞይቱ ነበረ። ንግሆ ኣፅቢቐ ምስ ጠመትኩ ድማ፥ እቲ ዝወለድክዎ ወደይ ከም ዘይኮነ ረአኹ።”

²²እታ ኻልአይቲ ሰበይቲ ድማ፥ “ኣይፋሉን! እቲ ህያው ወደይ እዩ፥ እቲ ዝሞተ ኸዓ ናትኪ እዩ” በለት። እታ ቐዳመይቲ ኸዓ፥ “ኣይፋሉን! እቲ ዝሞተ ወድኺ እዩ፥ እቲ ህያው ከዓ ናተይ እዩ” ኢላ መለሰት። ከምዙይ ኢለን ድማ ኣብ ቅድሚ ንጉስ ተበኣሳ።

²³እቲ ንጉስ ድማ፥ “እዛ ሓንቲ ‘ወደይ ህያው እዩ፥ ወድኺ ድማ ሞይቱ’ ትብል ኣላ፤ እታ ኻልአይቲ ኸዓ ‘ኣይፋሉን፥ ወድኺ ሞይቱ፥ ወደይ ህያው እዩ’ ትብል ኣላ” በለ።

²⁴እቲ ንጉስ ድማ፥ “ሰይፊ ኣምፅኡለይ” በለ። ናብ ቅድሚ ንጉስ ከዓ ሰይፊ ኣምፁ። ²⁵እቲ ንጉስ ድማ፥ “ነቲ ህያው ቆልዓ ኽልተ ምቐልዎ፤ ንሓንቲ ፈረቓ፥ ንታ ኻልአይቲ ድማ ፈረቓ ሃብዋ” በለ።

²⁶እታ ኣደ እቲ ህያው ወዲ ድማ፥ ብዛዕባ ወዳ ራህሪሃ፥ ንንጉስ ከምዙይ በለቶ፦ “ኦ ጐይታይ፥ በጃኻ፥ ነቲ ህያው ህፃን ሃባ! ፍፁም ኣይትቕተሎ!” እታ ኻልአይቲ ግና፥ “ናተይ ኮነ ናትኪ ኣይኹን፥ ምቐልዎ ደኣ!” በለት።

²⁷ሽዑ እቲ ንጉስ፥ “ነቲ ህያው ቆልዓ ነታ ቐዳመይቲ ሰበይቲ ሃብዋ፤ ፍፁም ኣይትቕተልዎ፤ ንሳ ኣዲኡ እያ” በለ።

²⁸ኵሎም እስራኤል ነቲ ንጉስ ዝፈረዶ ፍርዲ ሰምዑ፤ ፍትሒ ንምግባር ጥበብ ኣቦና ኣብኡ ከም ዝነበረ ስለ ዝረአዩ፥ ንእኡ ኸዓ ፈርሕዎ።