1ይ ነገስት 2 FHB Father's Heart Bible™

2 ¹ዳዊት ዝመውተሉ ጊዜ ምስ ቀረበ፥ ንወዱ ሰሎሞን ከምዙይ ኢሉ ኣዘዞ፦ ²“ኣነ ከምቲ ኵሉ ምድሪ ዝኸዶ መንገዲ ኽኸይድ እየ። ንስኻ ፅኑዕ ኩን፤ ሰብኣይ ምዃንካ ድማ ኣርኢ። ³ትእዛዝ ኣቦኻ ሓሉ፤ ብመንገዱ ተመላለስ፤ ከምቲ ኣብ ሕጊ ሙሴ ዝተፃሕፈ ድማ ስርዓታቱን ትእዛዛቱን ፍርዳቱን ምስክራቱን ሓሉ፤ ኣብ ኵሉ እትገብሮ ነገርን ናብ ዝኸድካዮ ዅሉን ምእንቲ ኽትሰልጥ። ⁴ኣቦና ኸዓ ነቲ ብዛዕባይ ዝተዛረቦ ቓል ምእንቲ ኸቝሞ እዩ፦ ‘ደቅኻ ብምሉእ ልቦምን ብምሉእ ነፍሶምን ብሓቂ ኣብ ቅድመይ እናተመላለሱ መንገዶም እንተ ሓለዉ፥ ኣብ ዙፋን እስራኤል ዝቕመጥ ሰብ ኣይክስኣነካን እዩ።’

⁵ኢዮኣብ ወዲ ፅሩያ ዝገበረለይ፥ ነቶም ክልተ ሓለቓ ሰራዊት እስራኤል፥ ንኣበኔር ወዲ ኔርን ንኣሜሳይ ወዲ ዮቴር፥ ዝገበሮ ንስኻ ባዕልኻ ትፈልጥ ኢኻ። ንሳቶም ቀቲሉ፥ ኣብ ጊዜ ሰላም ደም ውግእ ኣፍሰሰ፤ ደም ውግእ ከዓ ኣብ ቅናት ሕቘኡን ኣብ ኣሳእን ኣእጋሩን ገበረ። ⁶ከም ጥበብካ ጌርካ ግበር፤ ነቲ ሲበቱ ብሰላም ናብ መቓብር ከይወርድ ኣይትሕደጎ። ⁷ነቶም ደቂ ቤርዜሊ በዓል ገለዓድ ፅቡቕ ግበረሎም፤ ካብ ሓውካ ኣቤሴሎም ክሃድም እንተለኹ ደጊፎምኒ እዮም እሞ፥ ካብቶም ኣብ መኣድኻ ዝበልዑ ይኹኑ።

⁸እንሆ ምሳኻ ሳሚ ወዲ ጌራ፥ ብንያማዊ በዓል ባሑሪም ኣሎ፤ ናብ መሃናይም ኣብ ዝኸድኩላ መዓልቲ መሪር ረጊሙኒ እዩ። ግና ናብ ዮርዳኖስ ክቕበለኒ ወሪዱ መፀ፤ ኣነ ድማ ‘ብሰይፊ ኣይቀትለካን እየ’ ኢለ ብኣቦና መሓልኩሉ። ⁹ስለዙይ ከይተቐፅዐ ኣይትሕደጎ። ንስኻ ጥበበኛ ኢኻ፤ እንታይ ክትገብሮ ኸም ዘለካ ኽትፈልጥ ኢኻ፤ ንሲበቱ ብደም ናብ መቓብር ኣውርዶ።”

¹⁰ሽዑ ዳዊት ምስ ኣቦታቱ ዓረፈ፤ ኣብ ከተማ ዳዊት ድማ ተቐበረ። ¹¹ዳዊት ኣብ ልዕሊ እስራኤል ዝነገሰሉ ጊዜ ኣርብዓ ዓመት እዩ ነይሩ፤ ኣብ ኬብሮን ንሸውዓተ ዓመት ገዚኡ፥ ኣብ ኢየሩሳሌም ከዓ ንሰላሳን ሰለስተን ዓመት ነገሰ። ¹²ሽዑ ሰሎሞን ኣብ ዙፋን ኣቦኡ ዳዊት ተቐመጠ፤ መንግስቱውን ኣዝዩ ፀንዐ።

ሞት ዘስዓበ ልማኖ ኣዶንያስ

¹³ኣዶንያስ ወዲ ሓጊት ድማ ናብ እኖ ሰሎሞን ቤርሳቤህ መፀ። ንሳ ከዓ “ብሰላምዶ መፂእኻ?” ኢላ ጠየቐቶ። ንሱ ድማ “ብሰላም” ኢሉ መለሰ።

¹⁴ሽዑ ንሱ “ዝዛረበኪ ነገር ኣለኒ” በለ። ንሳ ድማ “ተዛረብ” በለቶ።

¹⁵ንሱ ድማ “እታ መንግስቲ ናተይ ከም ዝነበረት፥ ኵሉ እስራኤልውን ከም ዝነግስ ናባይ ይጥምት ከም ዝነበረ፥ ንስኺ ትፈልጢ ኢኺ። ግና ተገምጊማ ናይ ሓወይ ኮይና፤ ካብ ኣቦና ንእኡ ስለ ዝነበረት እያ። ¹⁶ሕዚ ኸዓ ሓንቲ ዝልምነኪ ነገር ኣላትኒ፤ ኣይትኽልእኒ” በለ። ንሳ ድማ “ተዛረብ” በለቶ።

¹⁷ንሱ ድማ “ንንጉስ ሰሎሞን በጃኺ ለምንዮ፥ ንኣኺ ኣይኽልእክን እዩ እሞ፥ ንኣቢሳ እታ ሱናማዊት ሰበይቲ ኽትከውነኒ ይሃበኒ” በለ።

¹⁸ቤርሳቤህ ድማ “ፅቡቕ፤ ኣነ ብዛዕባኻ ንንጉስ ክዛረቦ እየ” በለት።

¹⁹ቤርሳቤህ ድማ ብዛዕባ ኣዶንያስ ክትዛረቦ ናብ ንጉስ ሰሎሞን ከደት። እቲ ንጉስ ከዓ ክቕበላ ተሲኡ ሰገደላ፤ ኣብ ዙፋኑ ድማ ተቐመጠ። ንእኖ ንጉስ ከዓ ዙፋን ኣንበረላ፤ ንሳውን ኣብ የማን ኢዱ ተቐመጠት። ²⁰ንሳ ድማ “ሓንቲ ንእሽተይ ዝልምነካ ነገር ኣላትኒ፤ ኣይትኽልኣኒ” በለት። እቲ ንጉስ ከዓ “ኦ እኖይ ለምኒ፤ ኣይኽልእክን እየ” በለ።

²¹ንሳ ድማ “ኣቢሳ እታ ሱናማዊት ንሓውካ ኣዶንያስ ሰበይቱ ኽትከውን ትወሃቦ” በለት።

²²ንጉስ ሰሎሞን ከዓ ንእኖኡ ኸምዙይ ኢሉ መለሰላ፦ “ስለ ምንታይ ንኣዶንያስ ንኣቢሳ እታ ሱናማዊት እትልምንሉ ዘለኺ? ንሱ ዓብዪ ሓወይ እዩ እሞ፥ ነታ መንግስቲ ኸዓ ንእኡ ልምንሉ፤ ንእኡን ንኻህን ኣብያታርን ንኢዮኣብ ወዲ ፅሩያን!” ²³ሽዑ ንጉስ ሰሎሞን ብኣቦና ኸምዙይ ኢሉ መሓለ፦ “ኣዶንያስ ነዝ ቓል እዙይ ኣብ ልዕሊ ህይወቱ እንተ ዘይተዛሪቡ፥ ኸምኡ፥ ካብኡ ዝገደደ እውን ይግበረኒ! ²⁴ሕዚ ኸዓ፥ እቲ ዘፅንዓኒ፥ ኣብ ዙፋን ኣቦይ ዳዊት ዘቐመጠኒ፥ ከምቲ ቓል ዝኣተወለይ ድማ ቤት ዝገበረለይ ኣቦና ህያው እዩ፤ ኣዶንያስ ሎሚ ብርግፅ ክቕተል እዩ።”

²⁵ሽዑ ንጉስ ሰሎሞን ንበናያስ ወዲ ዮዳሄ ለኣኾ፤ ንሱ ኸዓ ንኣዶንያስ ወቒዑ ቐተሎ፤ ንሱ ድማ ሞተ። ²⁶እቲ ንጉስ ድማ ንኻህን ኣብያታር “ናብ ግራትካ ናብ ኣናቶት ኪድ። ሞት ይግብኣካ እዩ፤ ግና ኣብ ቅድሚ ኣቦይ ዳዊት ታቦት ጐይታ ኣቦ ስለ ዝተሸከምካ፥ ኣብ ኵሉ ስቓዩውን ስለ እተኻፈልካ፥ ሕዚ ኣይቀትለካን እየ” በሎ። ²⁷ሽዑ ሰሎሞን ነቲ ኣቦና ኣብ ሴሎ ብዛዕባ ቤት ኤሊ ዝተዛረቦ ቓል ምእንቲ ኽፍፅሞ፥ ንኣብያታር ካብ ክህነት ኣቦና ኣወገዶ።

²⁸እዝ ወረ ናብ ኢዮኣብ በፅሐ፤ ኢዮኣብ ድማ ናብ ኣቤሴሎም ዘይኮነስ ናብ ኣዶንያስ ዘንቢሉ ነበረ እሞ፥ ናብ ድንኳን ኣቦና ሃዲሙ ነቲ ኣቕርንቲ መሰውኢ ሓዞ። ²⁹ኢዮኣብ ናብ ድንኳን ኣቦና ኸም ዝሃደመን ኣብ ጥቓ መሰውኢ ኸም ዘሎን፥ ንንጉስ ሰሎሞን ነገርዎ። ሽዑ ንበናያስ ወዲ ዮዳሄ “ኪድ እሞ ውቕዓዮ” ኢሉ ለኣኾ።

³⁰በናያስ ድማ ናብ ድንኳን ኣቦና መፂኡ ንኢዮኣብ “ንጉስ ‘ውፃእ’ ይብል ኣሎ” በሎ። ንሱ ኸዓ “ኣይፋሉን፥ ኣብዙይ ክመውት እየ” ኢሉ መለሰ። በናያስ ድማ “ኢዮኣብ ከምዙይ በለ፥ ከምዙይ ከዓ መለሰለይ” ኢሉ ንንጉስ ነገሮ።

³¹እቲ ንጉስ ድማ “ከምቲ ዝበሎ ፈፅም። ወቒዕካ ቕበሮ፤ ነቲ ኢዮኣብ ብዘይ ምኽንያት ዘፍሰሶ ንፁህ ደም ድማ ካባይን ካብ ስድራ ኣቦይን ኣወግዶ። ³²ኣቦና ድማ ነቲ ዘፍሰሶ ደም ኣብ ርእሱ ባዕሉ ክመልሶ እዩ፤ ንሱ ኻብኡ ዝበልፁን ዝሓሹን ክልተ ሰብኡት፥ ንኣበኔር ወዲ ኔር ሓለቓ ሰራዊት እስራኤልን ንኣሜሳይ ወዲ ዮቴር ሓለቓ ሰራዊት ይሁዳን፥ ኣቦይ ዳዊት ከይፈለጠ ብሰይፊ ወቒዑ ቐቲልዎም እዩ እሞ። ³³ደሞም ድማ ናብ ርእሲ ኢዮኣብን ናብ ርእሲ ዘርኡን ንዘለኣለም ይውረድ፤ ንዳዊት ግና፥ ንዘርኡን ንቤቱን ንዙፋኑን ካብ ኣቦና ንዘለኣለም ሰላም ይኹን።”

³⁴ሽዑ በናያስ ወዲ ዮዳሄ ደዪቡ ንኢዮኣብ ወቒዑ ቐተሎ፤ ኣብ ገዛ ባዕሉ ኣብ ምድረ በዳ ድማ ተቐበረ። ³⁵እቲ ንጉስ ድማ ኣብ ክንዲ ኢዮኣብ ንበናያስ ወዲ ዮዳሄ ኣብ ልዕሊ ሰራዊት ሸሞ፤ ኣብ ክንዲ ኣብያታር ከዓ ንኻህን ሳዶቅ ሸሞ።

³⁶ሽዑ እቲ ንጉስ ንሳሚ ፀዊዑ “ኣብ ኢየሩሳሌም ቤት ስራሕ ኣብኣ ድማ ተቐመጥ፤ ናብ ካልእ ቦታ ኸዓ ካብኣ ኣይትውፃእ። ³⁷ናብ ወፃኢ ወፂእኻ ንሩባ ቄድሮን ኣብ እትሳገረላ መዓልቲ፥ ብርግፅ ከም እትመውት ፍለጥ፤ ደምካ ኣብ ርእስኻ ይኹን።”

³⁸ሳሚ ድማ ንንጉስ “እቲ ቓልካ ፅቡቕ እዩ። ከምቲ ጐይታይ ንጉስ ዝበሎ፥ ኣነ ባርያኻ ከምኡ ኽገብር እየ” በሎ። ሳሚ ኸዓ ኣብ ኢየሩሳሌም ነዊሕ ጊዜ ተቐመጠ።

³⁹ድሕሪ ሰለስተ ዓመት ድማ ካብ ኣገልገልቲ ሳሚ ክልተ ሰባት ናብ ኣኪሽ ወዲ መዓካ፥ ንጉስ ጌት፥ ሃዲሞም ከዱ። ንሳሚ ድማ “እንሆ ኣገልገልትኻ ኣብ ጌት ኣለዉ” ተባሂሉ ተነግሮ።

⁴⁰ሽዑ ሳሚ ተሲኡ ኣድጉ ፀዓነ፤ ነቶም ኣገልገልቱ ኽደሊ ድማ ናብ ኣኪሽ ናብ ጌት ከደ፤ ከይዱ ኸዓ ነቶም ኣገልገልቱ ኻብ ጌት ኣምፅኦም። ⁴¹ሳሚ ካብ ኢየሩሳሌም ናብ ጌት ከይዱ ከም ዝተመለሰ ንሰሎሞን ምስ ተነግሮ፥ ⁴²እቲ ንጉስ ድማ ንሳሚ ልኢኹ ፀዊዑ ከምዙይ በሎ፦ “ብኣቦና ኣምሒለ፥ ‘ወፂእኻ ናብ ዝኾነ ቦታ ብእትኸደላ መዓልቲ፥ ብርግፅ ከም እትመውት ፍለጥ’ ኢለ ኣጠንቂቐካዶ ኣይነበርኩን? ንስኻ ኸዓ ‘እቲ ቓልካ ፅቡቕ እዩ፤ ክእዘዝ እየ’ በልካኒ። ⁴³እሞ ስለ ምንታይ ደኣ ነቲ ኣብ ቅድሚ ኣቦና ዝመሓልካዮ መሐላን ነቲ ዝኣዘዝኩኻ ትእዛዝን ዘይሓለኻዮ?” ⁴⁴እቲ ንጉስ ድማ ንሳሚ ኸምዙይ ከዓ በሎ፦ “ነቲ ንዳዊት ኣቦይ ዝገበርካዮ ዅሉ ክፉእ፥ ባዕልኻ ብልብኻ ትፈልጦ ኢኻ። ሕዚ ድማ ኣቦና ነቲ ክፍኣትካ ናብ ርእስኻ ክመልሶ እዩ። ⁴⁵ንጉስ ሰሎሞን ግና ብሩኽ ክኸውን እዩ፤ ዙፋን ዳዊት ከዓ ኣብ ቅድሚ ኣቦና ንዘለኣለም ክፀንዕ እዩ።” ⁴⁶እቲ ንጉስ ድማ ንበናያስ ወዲ ዮዳሄ ኣዘዞ፤ ንሱ ኸዓ ወፂኡ ንሳሚ ወቒዑ ቐተሎ እሞ ንሱ ሞተ። ስለዙይ እታ መንግስቲ ኣብ ኢድ ሰሎሞን ፀንዐት።