1 Wungnaobing 4

4 ¹Awunga Solomonna Israel saikorawuitungli awunga sai. ²Hibing hi awui otva̱bingna: Zadokwui naomayara Azariahna pāngmon sai; ³Shishawui naomayarabing Elihoreph eina Ahijahna thuilinga sai; Ahiludwui naomayara Jehoshaphatna kapime sai; ⁴Jehoiadawui naomayara Benaiahna raimibingli yanga; Zadok eina Abiatharna pāngmon sai; ⁵Nathanwui naomayara Azariahna otva̱bingtungli yanga; Nathanwui naomayara Zabudna pāngmon eina awungawui ngasotnao sai; ⁶Ahisharna awungawui shimli yanga; kala Abdawui naomayara Adoniramna thoukai kaphungwui yangsangkhame sai.

⁷Solomonna Israel saikorawuitungli otva̱ tharāda khani sanga; athumna awunga eina awui shimkhurwui vang kashakazā ngarānmi; mi kachiva̱na kumkhali kachāngkha ngarānmi. ⁸Hibing hi athumwui amingna: Ben-hur, Ephraim kaphungramli; ⁹Ben-deker, Makazli, Sha-albim, Beth-shemesh, kala Elon-beth-hanan; ¹⁰Ben-hesed, Arubbothli (Sokoh eina Hepher ngalei saikora awuili zanga); ¹¹Ben-abinadab, Dorwui kajui saikorali (Solomonwui naongalāva̱ Taphath awui preiva̱ sai); ¹²Ahiludwui naomayara Baana: Taanach, Megiddo, kala Jezreelwui azingshong Zarethan ngachaili khalei Beth-shean saikora, Beth-shean eina thuilaga Abel-meholah, Jokmeamwui makāshung tāshungda awuina; ¹³Ben-geber, Ramoth-gileadli (Manassehwui naomayara Jairwui Gileadli khalei kha̱bing awuina, chili lāngda Bashanli khalei Argobwui leiret zangda, pithraiwui phākashut ngavāda phākho khareiya keinung hangtharuka); ¹⁴Iddowui naomayara Ahinadab, Mahanaimli; ¹⁵Ahima-az, Naphtalili (anala Solomonwui naongalāva̱ Basemathli apreiva̱ sākhavai khui); ¹⁶Hushaiwui naomayara Baana, Asher eina Be-aloth; ¹⁷Paruahwui naomayara Jehoshaphat, Issacharli; ¹⁸Elawui naomayara Shime-i, Benjaminshili; ¹⁹Uriwui naomayara Geberna Gilead ngaleili, Amorwui awunga Sihon kala Bashanwui awunga Ogwui ngaleili otva̱ sai; ngalei chili otva̱ akha mānga.

Ngaleili Chingri Kahai kala Kashap

²⁰Judah eina Israel shamadrupheiwui situi ngayāda kachungkha sai; athumna shai, manga, kala ringphai. ²¹Solomonna Euphrates eina thuilaga Philistinewui ngalei, Egyptwui thari tāshungda wungram saikorawuitungli munga. Awui mirin peida athumna ali shai mida otram ngatha̱ya. ²²Solomonwui thangthangwui kashakazā chi: manaktak kahai mathir bushel shākha hangchishat kala mathir bushel shākathum hangtharukta, ²³kathao mukkā tharā, seihomphungli phāzat sei maga̱, kala yao shākha, seichui, chaonao, chaoyur, kala kathao vānaobing mazangla. ²⁴Ana Euphrateswui zingtunshong ngalei saikora, Tiphsah eina thuilaga Gaza vāshungda, awunga saikorawuitungli munga, kala kuikhamareili chingri kahai leisai. ²⁵Judah eina Israelna, Dan eina thuilaga Beer-sheba vāshungda, mi kachiva̱na kachichāwui drakhārong kala khaorārong azingli, Solomonwui mirin peida chingri eina pama. ²⁶Solomonna awui siguigari haikhavai sigui shim thing hangmati, kala siguiraimi thing tharāda khani lei. ²⁷Otva̱bing chi mi kachiva̱na kachichāwui kachāngli, Awunga Solomon kala awui tableli rā mi saikorali kashakazā ngarānmi; khikha mavāt ngasakmana. ²⁸Mi kachiva̱na kachichāwui otsak athishurda nāpai kala lanji chi sigui kala kathaka siguibingwui vang darkar kasā apamli khuirāmi.

²⁹Ithumwui Avāna Solomonli thangkhamei, khamathā theishingkakhui, kala shamadrupheiwui situi ngayāda muiyālungli aret mi. ³⁰Solomonwui thangkhamei chi zingshoshong khalei mibing saikorawui thangkhamei kala Egyptwui thangkhamei saikorali mataimeisersai. ³¹Ana mi kachiva̱li, Ezrahpa Ethanli, kala Maholwui naomayarabing Heman, Calcol, kala Dardali thangmeimeiya; kala awui ming kuikhamareiwui miyur saikorali ngayaovai. ³²Ana chānsam thingkathum hānga, kala awui laa thing kala phangā sai. ³³Ana thingrongbingwui pong, Lebanonwui cedarthing eina thuilaga phākholi khalei maharnā vāshungda, hānga; kala sāyurbing, vānaobing, ngawokazata yurbing, kala khaibingwui pongli hānga. ³⁴Awui pao kashā okathuiwui awunga saikorana chihovāda, Solomonwui thangkhamei nganā khavai miyur saikorawui eina mibing rāsai.