1 ነገሥት 4

4 ¹ንጉሥ ሰሎሞን በመላው እስራኤል ላይ ንጉሥ ነበር። ²ባለሥልጣኖቹም እነዚህ ነበሩ፦ የሳዶቅ ልጅ ካህኑ አዛርያ፤ ³የሺሳ ልጆች ኤሊሆሬፍና አኪያ ጸሐፊዎች ነበሩ፤ የአኪሉድ ልጅ ኢዮሣፍጥ ታሪክ መዝጋቢ ነበር፤ ⁴የዮዳሄ ልጅ በናያስ በሰራዊቱ ላይ ነበር፤ ሳዶቅና አብያታር ካህናት ነበሩ፤ ⁵የናታን ልጅ አዛርያ በአውራጃ ሹማምንቱ ላይ ነበር፤ የናታን ልጅ ዛቡድ ካህንና የንጉሡ ወዳጅ ነበር፤ ⁶አኪሳር በቤተ መንግሥቱ ላይ ነበር፤ የዓብዳ ልጅ አዶኒራም በግዳጅ ሥራው ላይ ነበር።

⁷ሰሎሞን በመላው እስራኤል ላይ ለንጉሡና ለቤተ ሰቡ ቀለብ የሚያቀርቡ ዐሥራ ሁለት የአውራጃ ሹማምንት ነበሩት፤ እያንዳንዱ በዓመት ለአንድ ወር ቀለብ ያቀርብ ነበር። ⁸ስሞቻቸውም እነዚህ ናቸው፦ በኤፍሬም ተራራማ አገር ቤንሁር፤ ⁹በማካስ፣ በሻዕልቢም፣ በቤትሳሚስና በኤሎንቤትሐናን ቤንዴቄር፤ ¹⁰በአሩቦት ቤንሔሴድ (ሶኮና የሔፌር ምድር ሁሉ የእርሱ ነበሩ)፤ ¹¹በዶር ከፍታዎች ሁሉ ቤንአቢናዳብ (የሰሎሞን ልጅ ጣፋት ሚስቱ ነበረች)፤ ¹²የአኪሉድ ልጅ በዓና፦ ታዕናክ፣ መጊዶና ከኢዝራኤል በታች ከሳርታን አጠገብ ያለው ቤትሳን ሁሉ፣ ከቤትሳን እስከ አቤልሞሖላ፣ እስከ ዮቅምዓም ማዶ ድረስ፤ ¹³በራሞትጊልያድ ቤንጌቤር (በጊልያድ ያሉት የምናሴ ልጅ የኢያዕር መንደሮች የእርሱ ነበሩ፤ በባሳን ያለው የአርጎብ አውራጃም ደግሞ የእርሱ ነበር፤ ይህም የናስ መወርወሪያ ያላቸው ስድሳ ታላላቅ ቅጥር ያላቸው ከተሞች ነበሩ)፤ ¹⁴በመሐናይም የአዶ ልጅ አኪናዳብ፤ ¹⁵በንፍታሌም አኪማዓስ (እርሱም ደግሞ የሰሎሞንን ልጅ ባሳማትን አግብቶ ነበር)፤ ¹⁶በአሴርና በበዓሎት የኩሲ ልጅ በዓና፤ ¹⁷በይሳኮር የፋሩዋ ልጅ ኢዮሣፍጥ፤ ¹⁸በብንያም የኤላ ልጅ ሳሚኢ፤ ¹⁹በጊልያድ ምድር፣ በአሞራውያን ንጉሥ በሴዎንና በባሳን ንጉሥ በዐግ ምድር የዑሪ ልጅ ጌቤር ነበር፤ በምድሪቱም ያለው ሹም እርሱ ብቻ ነበር።

በምድሪቱ የሰፈነ ሰላምና ብልጽግና

²⁰ይሁዳና እስራኤል በባሕር ዳር እንዳለ አሸዋ ብዙ ነበሩ፤ ይበሉ፣ ይጠጡና ደስ ይላቸው ነበር። ²¹ሰሎሞን ከኤፍራጥስ ወንዝ ጀምሮ እስከ ፍልስጥኤማውያን ምድርና እስከ ግብፅ ድንበር ድረስ ያሉትን መንግሥታት ሁሉ ይገዛ ነበር። እነርሱም ግብር ያመጡለትና በሕይወት ዘመኑ ሁሉ ያገለግሉት ነበር። ²²የሰሎሞን የዕለት ቀለብ ይህ ነበር፦ 180 ያህል መስፈሪያ የተጣራ ዱቄትና 360 መስፈሪያ ዱቄት፣ ²³ዐሥር የሠቡ በሬዎች፣ ሃያ በሜዳ የተመገቡ ከብቶችና መቶ በጎች፣ ከዚህም በተጨማሪ ዋላዎች፣ ሚዳቋዎች፣ ድኩላዎችና የሠቡ ወፎች ነበሩ። ²⁴ከኤፍራጥስ ወንዝ በስተ ምዕራብ ያለውን አገር ሁሉ፣ ከቲፍሳ አንሥቶ እስከ ጋዛ ድረስ፣ ነገሥታቱን ሁሉ ይገዛ ነበር፤ በየአቅጣጫውም ሰላም ነበረው። ²⁵ከዳን አንሥቶ እስከ ቤርሳቤህ ድረስ ይሁዳና እስራኤል በሰሎሞን ዘመን ሁሉ እያንዳንዱ ከገዛ ወይኑና በለሱ ሥር ተማምነው ይኖሩ ነበር። ²⁶ሰሎሞን ለሠረገሎቹ 40,000 የፈረስ ማደሪያዎችና 12,000 ፈረሰኞች ነበሩት። ²⁷እነዚያ ሹማምንት ለንጉሥ ሰሎሞንና ወደ ማዕዱ ለሚመጡ ሁሉ እያንዳንዱ በወሩ ቀለብ ያቀርቡ ነበር፤ ምንም እንዳያጥር ያደርጉ ነበር። ²⁸ለፈረሶቹና ለፈጣኖቹ ፈረሶች የሚሆነውን ገብስና ገለባ ደግሞ እያንዳንዱ እንደ ተመደበበት ኀላፊነት ወደ ሚያስፈልግበት ስፍራ ያመጡ ነበር።

²⁹አባታችን ለሰሎሞን ጥበብን፣ እጅግ ታላቅ ማስተዋልንና እንደ ባሕር ዳር አሸዋ የሰፋ ልብን ሰጠው። ³⁰የሰሎሞን ጥበብ የምሥራቅ ሕዝቦችን ሁሉ ጥበብና የግብፅን ጥበብ ሁሉ ይበልጥ ነበር። ³¹ከማንም ይልቅ ጠቢብ ነበር፤ ከዝራሃዊው ከኤታን፣ ከማሖል ልጆችም ከሔማን፣ ከከልቆልና ከዳራዳ ይልቅ ጠቢብ ነበር፤ ዝናውም በዙሪያው ወዳሉት ሕዝቦች ሁሉ ደረሰ። ³²3,000 ምሳሌዎችን ተናገረ፤ መዝሙሮቹም 1,005 ነበሩ። ³³ከሊባኖስ ዝግባ ጀምሮ እስከ ግድግዳው ላይ እስከሚበቅለው ሂሶጵ ድረስ ስለ ዛፎች ተናገረ፤ ስለ እንስሳት፣ ስለ ወፎች፣ ስለሚሳቡ ፍጥረታትና ስለ ዓሦችም ተናገረ። ³⁴ስለ ሰሎሞን ጥበብ የሰሙ የምድር ነገሥታት ሁሉ የላኳቸው ሰዎች የሰሎሞንን ጥበብ ለመስማት ከሕዝቦች ሁሉ ይመጡ ነበር።