1 ነገሥት 5

5 ¹የጢሮስ ንጉሥ ኪራም ሰሎሞን በአባቱ ፋንታ ንጉሥ ሆኖ እንደ ተቀባ በሰማ ጊዜ፣ አገልጋዮቹን ላከለት፤ ኪራም ዳዊትን ሁልጊዜ ይወድደው ነበርና። ²ሰሎሞንም ወደ ኪራም እንዲህ ብሎ መልእክት ላከ፤ ³አባቴ ዳዊት ለአባታችን ስም ቤት ሊሠራ እንዳልቻለ አንተ ታውቃለህ፤ አባታችን ጠላቶቹን ከእግሩ ጫማ በታች እስኪያደርግ ድረስ፣ ጦርነት በየአቅጣጫው ከብቦት ነበርና። ⁴አሁን ግን አባቴ በየአቅጣጫው ዕረፍት ሰጥቶኛል፤ ባላጋራም የለ፣ መቅሠፍትም የለ።

⁵አባታችን ለአባቴ ለዳዊት በገባው ቃል መሠረት፣ ለአባቴ ስም ቤት ልሠራ አስቤአለሁ፤ “በፋንታህ በዙፋንህ ላይ የማስቀምጠው ልጅህ ለስሜ ቤቱን ይሠራል።”

⁶ስለዚህ ከሊባኖስ የዝግባ ዛፎች እንዲቈረጡልኝ አድርግ። አገልጋዮቼ ከአገልጋዮችህ ጋራ ይሠራሉ፤ አንተ የምትወስነውንም ዋጋ ሁሉ እከፍልሃለሁ፤ ከእኛ መካከል እንደ ሲዶናውያን ዕንጨት የሚቈርጥ አለመኖሩን አንተ ታውቃለህና።

⁷ኪራምም የሰሎሞንን ቃል በሰማ ጊዜ፣ እጅግ ደስ አለው፤ እንዲህም አለ፤ “በዚህ ታላቅ ሕዝብ ላይ ለዳዊት ጥበበኛ ልጅ የሰጠ እግዚአብሔር ዛሬ ይባረክ።” ⁸ኪራምም ወደ ሰሎሞን እንዲህ ብሎ ላከ፤ “መልእክትህን ሰማሁ፤ በዝግባና በጥድ ዕንጨት የምትፈልገውን ሁሉ አደርግልሃለሁ። ⁹አገልጋዮቼ ግንዶቹን ከሊባኖስ ወደ ባሕር ያወርዳሉ፤ እኔም እንደ ታንኳ አስተሳስሬ በባሕር ላይ ወደ ምትመድበው ስፍራ አንሳፍፋቸዋለሁ፤ በዚያም እፈታቸዋለሁ፤ አንተም ትወስዳቸዋለህ። አንተም ለቤተ ሰቤ ምግብ በማቅረብ ፍላጎቴን ትፈጽማለህ።”

¹⁰ስለዚህ ኪራም ሰሎሞን የፈለገውን የዝግባና የጥድ ዕንጨት ሁሉ ሰጠው፤ ¹¹ሰሎሞንም ለኪራም ቤተ ሰብ ዓመት ዓመት ወደ 120,000 የሚጠጋ መስፈሪያ ስንዴ፣ ወደ 120 የሚጠጋ መስፈሪያ የተጨመቀ ዘይትም ይሰጥ ነበር። ¹²አባታችንም እንደ ገባው ቃል ለሰሎሞን ጥበብን ሰጠው። በኪራምና በሰሎሞን መካከል ሰላም ነበረ፤ ሁለቱም ቃል ኪዳን ተዋዋሉ።

¹³ንጉሥ ሰሎሞንም ከእስራኤል ሁሉ የሥራ ሰዎች አስነሣ፤ የተመለመሉትም ሠላሳ ሺህ ሰዎች ነበሩ። ¹⁴በየወሩም በፈረቃ ዐሥር ሺህ ሰዎችን ወደ ሊባኖስ ይልክ ነበር፤ አንድ ወር በዚያ፣ ሁለት ወር በቤታቸው ይቈዩ ነበር። አዶኒራም የሥራ ሰዎቹን ይቈጣጠር ነበር። ¹⁵ሰሎሞንም ሸክም የሚሸከሙ ሰባ ሺህ፣ በተራራማው ምድር ድንጋይ የሚፈልጡ ሰማንያ ሺህ ሰዎች ነበሩት፤ ¹⁶ከእነዚህም ሌላ፣ ሥራውን የሚቈጣጠሩና ሠራተኞቹን የሚመሩ ሦስት ሺህ ሦስት መቶ የሰሎሞን አለቆች ነበሩ። ¹⁷በንጉሡም ትእዛዝ የቤቱን መሠረት በተጠረበ ድንጋይ ለመመሥረት፣ ታላላቅና ውድ ድንጋዮችን ፈለጡ። ¹⁸የሰሎሞንና የኪራም ግንበኞች፣ የጌባልም ሰዎች፣ ቤቱን ለመሥራት ዕንጨቱንና ድንጋዩን ጠረቡ፤ አዘጋጁም።