1 Mga Hari 5

5 ¹Nabalitaan ni Hiram na hari ng Tiro na si Solomon ay pinahiran bilang hari kapalit ng kanyang ama, at nagpadala ito sa kanya ng mga lingkod, sapagkat lagi nang minahal ni Hiram si David. ²At ipinadala ni Solomon ang mensaheng ito kay Hiram: ³Alam mong hindi naipagtayo ng aking amang si David ng isang bahay para sa pangalan ng ating Ama, sapagkat napalibutan siya ng mga digmaan sa bawat panig, hanggang sa ilagay ng ating Ama ang kanyang mga kaaway sa ilalim ng talampakan ng kanyang mga paa. ⁴Ngunit ngayon binigyan ako ng aking Ama ng kapahingahan sa bawat panig; walang kaaway, walang kapahamakan.

⁵Nilalayon kong magtayo ng isang bahay para sa pangalan ng aking Ama, gaya ng ipinangako ng ating Ama sa aking amang si David: “Ang iyong anak, na ilalagay ko sa iyong trono kapalit mo, ang magtatayo ng bahay para sa aking pangalan.”

⁶Kaya't ipautol mo para sa akin ang mga sedro mula sa Lebanon. Ang aking mga lingkod ay makikipagtulungan sa iyong mga lingkod; babayaran ko ang anumang kabayarang itakda mo, sapagkat alam mong wala sa amin ang makapuputol ng troso na gaya ng mga taga-Sidon.

⁷Nang marinig ni Hiram ang mga salita ni Solomon, siya ay labis na nagalak at nagsabi, “Purihin ang Panginoon sa araw na ito, na nagbigay kay David ng isang marunong na anak upang mamahala sa dakilang bayang ito.” ⁸Nagpasabi si Hiram kay Solomon: “Narinig ko ang iyong mensahe; gagawin ko ang lahat ng nais mo tungkol sa troso ng sedro at sipres. ⁹Ang aking mga lingkod ang magbababa ng mga troso mula sa Lebanon patungo sa dagat, at palulutangin ko ang mga ito bilang mga balsa sa dagat patungo sa lugar na iyong itatakda, at doon ko ipagkakalas ang mga ito, at kukunin mo. Tutugunan mo ang aking pangangailangan sa pamamagitan ng paglalaan ng pagkain para sa aking sambahayan.”

¹⁰Kaya't ibinigay ni Hiram kay Solomon ang lahat ng troso ng sedro at sipres na kanyang ninanais, ¹¹Nagbigay si Solomon kay Hiram ng humigit-kumulang 120,000 kaban ng trigo para sa kanyang sambahayan at humigit-kumulang 120 kaban ng dalisay na langis, taon-taon. ¹²Binigyan ng ating Ama si Solomon ng karunungan, gaya ng kanyang ipinangako. Nanatili ang kapayapaan sa pagitan nina Hiram at Solomon, at ang dalawa ay gumawa ng isang kasunduan.

¹³Nagtipon si Haring Solomon ng mga manggagawa mula sa buong Israel, at ang bilang ng mga naatasan ay 30,000 katao. ¹⁴Nagpadala siya ng 10,000 sa Lebanon buwan-buwan nang salitan—isang buwan doon, dalawang buwan sa tahanan. Si Adoniram ang namahala sa mga manggagawa. ¹⁵Si Solomon ay may 70,000 na tagapagpasan ng mga kargamento at 80,000 na tagatibag ng bato sa kaburulan, ¹⁶bukod sa 3,300 na punong pinuno ni Solomon na nangasiwa sa gawain at nag-utos sa mga taong gumagawa nito. ¹⁷Sa utos ng hari, tumibag sila ng malalaki at mahahalagang bato upang ilagay ang pundasyon ng bahay sa pamamagitan ng tinabas na bato. ¹⁸Ang mga tagapagtayo nina Solomon, Hiram, at ng mga taga-Gebal ang humubog at naghanda ng troso at bato upang itayo ang bahay.