Avāwui Ming vang Shim akha
Davidli leikashi Tyrewui awunga Hiramna ithumwui Avāwui mingwui shimwui vang thing kala khutlai kasāpa mibing chihoa; Solomonna chiwui mān chang kala thao ungmida, awunga khanina tuingashit sāngaroka. Chibing saikora harkhui kala phungkhui khavai, Solomonna Israel mi thingthing kāshunglaga, ngakaishi ngakaishi eina otram sāngasaka.
5 1Tyrewui awunga Hiramna Solomonli awui avāva̱wui thili awunga sāda thao neomi kahaina da kashā tharan, ali raobing chihovai; kaja Hiramna atam kachida Davidli leishilāka. 2Kala Solomonna Hiramli hithāda pao chihovai: 3Ithumwui Avāna awui yangkashebingli awui pheimayā azingli hamsang ngasakranglakha eina tangda raibingna ali ngavei saikorali kuinama; chiwui vang ishāvā Davidna ithumwui Avā mingwui vang shim akha sākā mahaimana kaji nana theihaira. 4Kha ara iwui Avāna ili ngavei saikorali ngasām mihaira; yangkashe maleimana, unshimui maleimana.
5Ina iwui Avā mingwui vang shim akha sākhavai ningchānga, ithumwui Avāna ishāvā Davidli ngashit kahai thada: "Nawui naomayara, nawui mahutle nawui wungpamkhongli ina pamngasak kahai chi, ana imingwui vang shim chi sākāra."
6Chiwui vang, iwui vang Lebanonwui eina cedarthing renmilu. Iwui raobingna nawui raobingli ngasoda ot ngasāra; nana khankahai aman athishurda ina mira, kaja Sidonnaobing thada thing renkhamashapa ithumwui alungli maleimana da nana theihaira.
7Solomonwui tui shālaga, Hiram khamathānna pemtinghaowa, kala hānga, "Mibing kahaka hiwui tungli Davidli thangkhamei naomayara akha mikahai PROHO Vareli aja sochikatranu." 8Hiramna Solomonli pao chihovai: "Nawui pao ina shāhaira; cedarthing kala cypressthing eina nawui ningkachāng athishurda ina sāra. 9Iwui raobingna Lebanonwui eina thing yireili khuitāra, chieina ina marikhong sāda yirei eina nana khānmi pamli khuitāmira, apam chili sāshatmira, kala nana khuiungpaira. Nana iwui shimkhurwui vang kashakazā mida iwui ningkachāng ungshungmira."
10Chiwui vang Hiramna Solomonli ana ningchang cedarthing kala cypressthing saikora mihaowa, 11Solomonna Hiramli awui shimkhurwui vang kehu bushel 120,000 shakha, kala kachanga thao bushel 120 shakha, zingkum kachida mihaowa. 12Ithumwui Avāna ana ngashit kahai thada Solomonli thangkhamei mihaowa. Hiram eina Solomonwui ngachaili chingri leisai, kala anina ngarumkha akha sai.
13Awunga Solomonna Israel saikorawui eina thoukainaobing khuiya, kala thoukainao mashing mi 30,000 sai. 14Ana kachāng kachida mi 10,000 Lebanonli ngatei-ngateida chihovai; athumna kachāng akha apam chili pamlaga kachāng khani shimli pama. Adoniramna thoukainaobingwui kashinana. 15Solomonli otphun phungkazata mi 70,000 kala kaphungramli ngalung kahar mi 80,000 leisai, 16Chili lāngda, otli yangkhame kala ot kasā mibingli thānkhame Solomonwui khareiya otva̱bing 3,300 leisai. 17Awungawui kakaso eina athumna ngalung kahaka aman kasaka chi hākhuilaga, hātkakhui ngalung eina shimwui shimphunga khorkuphaowa. 18Solomonwui, Hiramwui kala Gebalwui shim kasābingna shim sākhavai thing kala ngalung shapada ngarānhaowa.
