Avāwui Shim Sāphoka
Kum shini ngamāthei eina otram kasā: ngalung chi harkhui khavaipamli shānkazakta sākakhui, chieina mari khon akhala mashāmana; ot saikorali cedar thing kala sinā eina khuphup, kala olive thing eina sākakhui cherubimna alungwui tharkhamatheng kā chi pemhaowa. Ngachaili ithumwui Avāna Solomonli hānga, ana tui ngahānakha maman khamashiwui tui chi ngasa̱ra.
6 1Israelnaobing Egypt ngaleiwui eina zatphok kahaiwui eina kum shāmati hangkachishata kumli, kala Solomonwui Israelli mungda kum khamatewui, Ziv kachāng, kaji kachāng kakhaneli, ana ithumwui Avāwui shim sāphoka. 2Awunga Solomonna ithumwui Avāwui vang sākahai shim chi, asān khuining hangtharuk, aret khuining maga̱, kala kajui khuining thumrāna. 3Shimreiwui mangāli khalei shimpho chi asān khuining maga̱, shimwui aret eina ngaraichai; kala shimwui mangāli aret khuining tharāna. 4Kala ana shimwui vang pakra̱ khamachet leikahai charfabing sākhui.
5Ana shimreila alungkayāng kāla khaniwui vang shimwui phākhobingli ngalengda kuimareida sākasang akha sākai; kala ana lākharipwui kābing kuimareida sākhui. 6Mathāng khamaze chi aret khuining phangā, alungthung mathāng chi aret khuining tharuk, kala mathāng kakathuma chi aret khuining shini; kaja khāngenbing shim phākholi mayuisang khavai, ana shimwui phākho ayarshong kuimareida khāngen sangkhavai pam sākhui. 7Shim chi lungkotpamli sākup kahai ngalung eina sākai; chiwui vang shim sālakha chili yāmkarnao, ngahā kala mari khutlai kateiwui khonla mashāla. 8Mathāng khamaze lākharip kāwui khāmong chi shimwui azingshongli sai; kala shairon akha eina alungthung mathāngla kāhai, chieina mathāng kakathumali kāsera. 9Chithāda ana shim chi sākai, kala khāngen kala cedar chikhai eina ngavaimida kuphaowa. 10Ana shim hupva̱li ngalengda lākharipwui sākasang chi sākai, mathāng kachiva̱ kajui khuining phangāna; kala chi cedarthing eina shimli ngarumsanga.
11Chieina ithumwui Avāwui tui china Solomonli rāhānga:
12"Nana sāki kaji shim hiwui pongli, nana iwui shiyanli zatakha, iwui ainbing sāda, kala iwui ningkhami saikora shurda mayonakha, ina navā Davidli ngashithairasai tui chi nawui vang ungshungmira. 13Ina Israelnaobingwui alungli ngasopamra, kala iwui mi Israelli mahorhaimara."
14Chithāda Solomonna shim chi sākai kala kuphaowa. 15Ana shimwui phākho alungshong cedar chikhai eina heimitsanga; chonnar eina thuilaga kasho matang kāshungda alungshong thing eina heimit, kala shimwui chonnar cypress chikhai eina sākai. 16Ana shimwui khanukshong khuining maga̱ chi cedar chikhai eina sākai, chonnar eina phākho kāzokta; chi alungshong tharmathengmeikap kaji alungkayāng kā sākhavai phaishok. 17Alungkayāng kāwui mangāli khalei shimrei chi asān khuining hangmatina. 18Shim alungli cedarthing chi shon kala awon phongshar eina ruksanga; katonga cedarthingna, ngalung khipākha matheimana. 19Ana ithumwui Avāwui tuingashit oko chi apam chili haikhavai shim alungli alung zangkhamayar katharapam chi ngarāna. 20Alung zangkhamayar katharapam chi asān khuining maga̱, aret khuining maga̱, kala kajui khuining maga̱na; ana chi sinā kachanga eina rommithai, kala cedarthingwui hanphutla rommithai. 21Solomonna shim alung chi sinā kachanga eina rommithai, kala alung zangkhamayar katharapamwui mangāshong sinā huishon khāngkhui, kala chi sinā eina rommithai. 22Shim katonga sāhaikupranglakha eina tangda ana shim katonga chi sinā eina rommithai; kala alung zangkhamayar katharapamwui hanphut katonga chila sinā eina rommithai.
23Alung zangkhamayar katharapamli ana olivething eina cherubim khani sākhui; ava̱va̱wui kajui khuining tharāna. 24Cherub chiwui angachāng akha khuining phangāna, kala angachāng akhapala khuining phangāna; angachāng atonwui eina angachāng atonli tangda khuining tharāna. 25Cherub akhapala khuining tharāna; cherubim khanina ngaraichā akhana kala khangachā akhana. 26Cherub akhawui kajui khuining tharāna, kala cherub akhapala chithāda juiya. 27Ana cherubim chi alungkayāng kāli haihai; athumwui angachāng pharonhaida, akhawui angachāng china phākho akhali za̱ya, kala angachāng akhapala phākho akhapāli za̱ya, kala athumwui angachāng chi shim alungthungli akha eina akhali ngasunkhui. 28Ana cherubim chi sinā eina rommithai.
29Shim kuimareida khalei phākho katongali, alung kā kala ayar kāli, ana cherubim, khaneirong kala awon phongshar chi ruksanga. 30Ana shimwui alung kā kala ayar kāwui chonnar chi sinā eina rommithai.
31Alung zangkhamayar katharapamwui zangkhavaiwui vang ana olivething eina khāmong sākhui; khamakhār kala pakra̱ chi arāp phangāya. 32Khāmong khani chi olivething eina sai; achilili ana cherubim, khaneirong kala awon phongshar ruksanga, kala sinā eina rommithai, cherubim kala khaneirongtungli sinā hammithai. 33Chithāda sāda shimreiwui zangkhavaiwui vang ana olivething eina pakra̱ sākhui, arāp matina, 34kala cypressthing eina khāmong khani sākhui; khāmong akhawui khum khani chi khaluihai, kala khāmong akhapāwui khum khanila khaluihai. 35Ana chiwuitungli cherubim, khaneirong, kala awon wonphokkahai yeksanga, kala yeksang kahai chiwuitungli chirira sāda sinā rommithai.
36Ana alung kayāng chi ngalung hātkakhui ngaphor kathum, kala cedarwui khāngen ngaphor akha eina sākai.
37Khamate kumli, Ziv kachāngli, ithumwui Avāwui shimwui shimphunga sārangsai. 38Kum tharāda kharewui, Bul kachāng kaja kachāng kachishatali, khangarān sākahai athishurda tākam saikora shim chi kuphaowa. Ana chi zingkum shini sākai.
