1 Mga Hari 5

5 ¹Sa pagkadungog ni Hiram nga hari sa Tiro nga si Solomon gidihogan nga hari puli sa iyang amahan, nagpadala siya kaniya ug mga sulugoon, kay kanunay nga gihigugma ni Hiram si David. ²Ug si Solomon nagpadala niini nga mensahe ngadto kang Hiram: ³Nahibalo ka nga si David nga akong amahan wala makahimo sa pagtukod ug balay alang sa ngalan sa atong Amahan, kay ang mga gubat milibot kaniya sa tanang bahin, hangtod nga gibutang sa atong Amahan ang iyang mga kaaway ilalom sa mga lapalapa sa iyang tiil. ⁴Apan karon ang akong Amahan naghatag kanako ug kapahulayan sa tanang bahin; walay kaaway, walay katalagman.

⁵Nagtinguha ako sa pagtukod ug balay alang sa ngalan sa akong Amahan, sumala sa gisaad sa atong Amahan ngadto kang David nga akong amahan: “Ang imong anak, nga akong ibutang sa imong trono puli kanimo, mao ang motukod sa balay alang sa akong ngalan.”

⁶Busa pagpaputol ug mga kahoyng sedro alang kanako gikan sa Lebanon. Ang akong mga sulugoon magabuhat uban sa imong mga sulugoon; ug bayran ko ang bisan unsang suhol nga imong itakda, kay nahibalo ka nga walay bisan kinsa kanamo nga makaputol ug kahoy sama sa mga taga-Sidon.

⁷Sa pagkadungog sa mga pulong ni Solomon, si Hiram nalipay pag-ayo ug miingon, “Dayegon ang Ginoo karong adlawa, nga naghatag kang David ug usa ka maalamong anak ibabaw niining dakong katawhan.” ⁸Si Hiram nagpadala ug pulong ngadto kang Solomon, “Nadungog ko ang imong mensahe; buhaton ko ang tanan nimong gusto mahitungod sa mga kahoyng sedro ug sipres. ⁹Ang akong mga sulugoon magdala sa mga troso gikan sa Lebanon paubos ngadto sa dagat, unya palutawon ko kini nga mga gakit agi sa dagat ngadto sa dapit nga imong itudlo, bungkagon kini didto, ug imong dad-on. Tagbawon mo ang akong panginahanglan pinaagi sa paghatag ug pagkaon alang sa akong panimalay.”

¹⁰Busa gihatag ni Hiram kang Solomon ang tanang kahoyng sedro ug sipres nga iyang gitinguha, ¹¹Si Solomon naghatag kang Hiram ug mga 120,000 ka bushel nga trigo alang sa iyang panimalay ug mga 120 ka bushel nga lana nga pinuga, tuig human sa tuig. ¹²Ang atong Amahan naghatag kang Solomon ug kaalam, sumala sa iyang gisaad. Ang kalinaw nagpabilin tali kang Hiram ug Solomon, ug ang duha naghimo ug usa ka kasabotan.

¹³Si Haring Solomon nagpatigom ug mga mamumuo gikan sa tibuok Israel, ug ang gipatawag nga mamumuo miabot ug 30,000 ka lalaki. ¹⁴Nagpadala siya ug 10,000 ngadto sa Lebanon matag bulan nga pinulihay—usa ka bulan didto, duha ka bulan sa balay. Si Adoniram mao ang nagdumala sa mga mamumuo. ¹⁵Si Solomon may 70,000 nga nagdala ug mga luwan ug 80,000 nga nagtiltil ug bato sa kabungtoran, ¹⁶gawas pa sa 3,300 ka pangulong opisyal ni Solomon nga nagdumala sa buluhaton ug nagmando sa katawhan nga nagbuhat niini. ¹⁷Sa sugo sa hari nagtiltil sila ug dagko ug mahalong mga bato aron ipahimutang ang patukoranan sa balay pinaagi sa sinapsapang bato. ¹⁸Ang mga magtutukod ni Solomon, ni Hiram, ug sa Gebal naghulma ug nag-andam sa mga kahoy ug bato aron tukoron ang balay.