Imba yeZita raBaba

Hiramu weTire, aida Dhavhidhi, anotumira matanda nevavezi kuti vavake imba yeZita raBaba vedu; Soromoni anomudzorera gorosi nemafuta, uye madzimambo maviri aya anoita sungano. Kuti vachere matombo nekuatakura ose, Soromoni anomanikidza vaIsraeri vane zviuru zvakawanda kushanda vachichinjana.

Chitsauko 5.

Hiramu mambo weTire akanzwa kuti Soromoni akanga azodzwa kuva mambo panzvimbo yababa vake, akamutumira varanda, nokuti Hiramu akanga achigara achida Dhavhidhi. Soromoni akatumira shoko iri kuna Hiramu, achiti: Munoziva kuti Dhavhidhi baba vangu havana kugona kuvaka imba yeZita raBaba vedu, nokuti hondo dzakamukomba kumativi ose, kusvikira Baba vedu vaisa vavengi vake pasi petsoka dzake. Asi zvino Baba vangu vandipa zororo kumativi ose; hakuna muvengi, hakuna njodzi.

Ndinoda kuvaka imba yeZita raBaba vangu, sezvakavimbisa Baba vedu baba vangu Dhavhidhi, vachiti, “Mwanakomana wako, wandichagadza pachigaro chako choumambo panzvimbo yako, ndiye achavaka imba yeZita rangu.”

Saka nditemerei misidhari kubva kuRebhanoni. Varanda vangu vachashanda navaranda venyu; ndichakubhadharai mubhadharo wose wamunotara, nokuti munoziva kuti hapana pakati pedu anotema matanda sezvinoita vaSidhoni.

Hiramu paakanzwa mashoko aSoromoni, akafara zvikuru akati, “Jehovha ngaarumbidzwe nhasi, iye akapa Dhavhidhi mwanakomana akachenjera anotonga vanhu ava vazhinji.” Hiramu akatumira shoko kuna Soromoni, achiti, “Ndanzwa shoko renyu; ndichaita zvose zvamunoda nematanda emisidhari neemisipuresi. “Varanda vangu vachaburutsa matanda kubva kuRebhanoni kuenda kugungwa, ipapo ndichaaeredza napagungwa ari magwa kusvika panzvimbo yamuchandiratidza, ndiaparadzanise ipapo, uye imi muchaatakura. Imi muchandigutsa nokundipa zvokudya zvemba yangu.”

Saka Hiramu akapa Soromoni matanda ose emisidhari neemisipuresi aaida, Soromoni akapa Hiramu zviyero zvinenge zviuru zana namakumi maviri (120 000) zvegorosi zvemba yake nezviyero zvinenge zana namakumi maviri (120) zvamafuta akasvinwa, gore negore. Baba vedu vakapa Soromoni uchenjeri, sezvavakanga vavimbisa. Rugare rwakavapo pakati paHiramu naSoromoni, uye ivo vaviri vakaita sungano.

Mambo Soromoni akaunganidza vashandi kubva kuvaIsraeri vose, uye vakasarudzwa vaisvika varume zviuru makumi matatu (30 000). Akatuma varume zviuru gumi kuRebhanoni mwedzi woga woga vachichinjana—mwedzi mumwe vari ikoko, mwedzi miviri vari kumba. Adhoniramu ndiye aitarisira vashandi. Soromoni akanga aine varume zviuru makumi manomwe (70 000) vaitakura mitoro nezviuru makumi masere (80 000) vaichera matombo kunzvimbo yezvikomo, kunze kwavakuru vakuru vaSoromoni zviuru zvitatu namazana matatu (3 300) vaitarisira basa vachitungamirira vanhu vairiita. Vachirayirwa namambo, vakachera matombo makuru, anokosha, kuti vateye nheyo dzeimba namatombo akavezwa. Vavaki vaSoromoni, navaHiramu, naveGebhari, vakaveza vakagadzirira matanda namatombo okuvaka imba.